ਆਕਲੈਂਡ ਦੇ ਪੱਛਮੀ ਇਲਾਕੇ ਵਿੱਚ ਪੁਲਿਸ ਨੇ ਕੱਲ੍ਹ ਸਵੇਰੇ ਕੀਤੀਆਂ ਛਾਪੇਮਾਰ ਕਾਰਵਾਈਆਂ ਦੌਰਾਨ ਇਕ ਵਿਅਕਤੀ ਨੂੰ ਗੈਰਕਾਨੂੰਨੀ ਤੌਰ ‘ਤੇ ਹਥਿਆਰ ਬਣਾਉਂਦੇ ਹੋਏ ਕਾਬੂ ਕੀਤਾ ਹੈ। ਪੁਲਿਸ ਵੱਲੋਂ ਹਥਿਆਰਾਂ ਨਾਲ ਸੰਬੰਧਿਤ ਅਪਰਾਧਾਂ ‘ਤੇ ਕਾਰਵਾਈ ਦੇ ਤਹਿਤ ਦੋ ਥਾਵਾਂ ‘ਤੇ ਛਾਪੇ ਮਾਰੇ ਗਏ। ਹੈਂਡਰਸਨ ਵੈਲੀ ਦੇ ਮਾਊਂਟਨ ਰੋਡ ‘ਤੇ ਇਕ ਘਰ ਦੀ ਤਲਾਸ਼ ਦੌਰਾਨ ਪਤਾ ਲੱਗਿਆ ਕਿ ਉਥੇ ਗੈਰਕਾਨੂੰਨੀ ਹਥਿਆਰਾਂ ਦੀ ਤਿਆਰੀ ਅਤੇ ਸਪਲਾਈ ਕੀਤੀ ਜਾ ਰਹੀ ਸੀ। ਡਿਟੈਕਟਿਵ ਸੀਨੀਅਰ ਸਰਜੰਟ ਜੋਸ਼ ਲਾਊਟੋਗੋ ਦੇ ਮੁਤਾਬਿਕ, ਜਦੋਂ ਪੁਲਿਸ ਘਰ ਵਿੱਚ ਦਾਖਲ ਹੋਈ ਤਾਂ ਇਕ ਵਿਅਕਤੀ ਹਥਿਆਰ ਤਿਆਰ ਕਰ ਰਿਹਾ ਸੀ। ਉਸਨੂੰ ਤੁਰੰਤ ਹਿਰਾਸਤ ਵਿੱਚ ਲਿਆ ਗਿਆ। ਤਲਾਸ਼ ਦੌਰਾਨ ਪੁਲਿਸ ਨੂੰ ਕਈ ਸਮੱਗਰੀ ਅਤੇ .22 ਕੈਲੀਬਰ ਦਾ ਗੋਲਾਬਾਰੂਦ ਮਿਲਿਆ ਜੋ ਹਥਿਆਰ ਬਣਾਉਣ ਲਈ ਵਰਤਿਆ ਜਾਂਦਾ ਹੈ।
35 ਸਾਲਾ ਵਿਅਕਤੀ ਨੂੰ ਬਿਨਾਂ ਲਾਇਸੈਂਸ ਹਥਿਆਰ ਬਣਾਉਣ ਅਤੇ ਵੇਚਣ ਅਤੇ ਗੋਲਾਬਾਰੂਦ ਦੀ ਗੈਰਕਾਨੂੰਨੀ ਮਲਕੀਅਤ ਦੇ ਦੋਸ਼ਾਂ ‘ਚ ਸ਼ੁੱਕਰਵਾਰ ਨੂੰ ਵੈਟਾਕੇਰੇ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ ਹੈ। ਇਸਦੇ ਨਾਲ ਹੀ ਪੁਲਿਸ ਨੇ ਵਿਊ ਰੋਡ ‘ਤੇ ਵੈਸਟ ਹੈਡਹੰਟਰਜ਼ ਮੋਟਰਸਾਈਕਲ ਗੈਂਗ ਦੇ ਠਿਕਾਣੇ ‘ਤੇ ਵੀ ਛਾਪਾ ਮਾਰਿਆ। ਇਹ ਕਾਰਵਾਈ ਗੈਂਗ ਨਾਲ ਜੁੜੇ ਸ਼ੱਕੀ ਲੋਕਾਂ ਨੂੰ ਨਿਸ਼ਾਨਾ ਬਣਾਉਂਦੀ ਸੀ।
ਛਾਪੇ ਦੌਰਾਨ ਇਕ ਬੈਗ ਵਿੱਚੋਂ .22 ਸੈਮੀ-ਆਟੋਮੈਟਿਕ ਰਾਈਫਲ ਅਤੇ ਉਸਦੇ ਨਾਲ ਗੋਲਾਬਾਰੂਦ ਵੀ ਬਰਾਮਦ ਕੀਤਾ ਗਿਆ। ਇਸ ਤੋਂ ਇਲਾਵਾ ਇਕ ਚੋਰੀਸ਼ੁਦਾ ਹਾਰਲੇ-ਡੇਵਿਡਸਨ V-ਰਾਡ ਮੋਟਰਸਾਈਕਲ ਅਤੇ ਕੈਡਿਲੈਕ ਐਸਕਲੇਡ ਕਾਰ ਵੀ ਮਿਲੀ, ਜਿਨ੍ਹਾਂ ਨੂੰ ਜ਼ਬਤ ਕਰ ਲਿਆ ਗਿਆ।
ਇਕ ਗੱਡੀ ਦੀ ਤਲਾਸ਼ ਦੌਰਾਨ ਪੁਲਿਸ ਨੂੰ 1 ਕਿਲੋਗ੍ਰਾਮ ਸੁੱਕੀ ਕੈਨਾਬਿਸ ਵੀ ਮਿਲੀ, ਜਿਸਦੀ ਬਾਜ਼ਾਰੀ ਕੀਮਤ ਕਾਫੀ ਉੱਚੀ ਦੱਸੀ ਜਾ ਰਹੀ ਹੈ। ਇਸ ਕਾਰਵਾਈ ਦੌਰਾਨ ਦੋ ਹੋਰ ਲੋਕਾਂ ਨੂੰ ਵੀ ਬਿਨਾਂ ਕਿਸੇ ਵਿਰੋਧ ਦੇ ਗ੍ਰਿਫਤਾਰ ਕੀਤਾ ਗਿਆ। 42 ਸਾਲਾ ਵਿਅਕਤੀ ‘ਤੇ ਗੈਰਕਾਨੂੰਨੀ ਹਥਿਆਰ ਅਤੇ ਗੋਲਾਬਾਰੂਦ ਰੱਖਣ ਦੇ ਦੋਸ਼ ਲਗੇ ਹਨ, ਜਦਕਿ 69 ਸਾਲਾ ਵਿਅਕਤੀ ‘ਤੇ ਸਪਲਾਈ ਲਈ ਕੈਨਾਬਿਸ ਰੱਖਣ ਦਾ ਦੋਸ਼ ਲਗਾਇਆ ਗਿਆ ਹੈ। ਦੋਵੇਂ ਦੋਸ਼ੀਆਂ ਨੂੰ ਅੱਜ ਵੈਟਾਕੇਰੇ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ।