ਨਿਊਜ਼ੀਲੈਂਡ ‘ਚ ਬੱਸ ਡਰਾਈਵਰਾਂ ‘ਤੇ ਹੁੰਦੇ ਹਮਲੇ ਰੁਕਣ ਦਾ ਨਾਮ ਨਹੀਂ ਲੈ ਰਹੇ। ਤਾਜ਼ਾ ਮਾਮਲਾ ਮੈਨੂਕਾਊ ਬੱਸ ਇੰਟਰਚੇਂਜ਼ ਤੋਂ ਸਾਹਮਣੇ ਆਇਆ ਹੈ ਜਿੱਥੇ ਇੱਕ ਭਾਰਤੀ ਮੂਲ ਦੇ ਬੱਸ ਡਰਾਈਵਰ ‘ਤੇ ਬੇਵਜ੍ਹਾ ਹਮਲਾ ਕੀਤਾ ਗਿਆ ਸੀ। ਹਮਲਾ ਇੰਨਾਂ ਭਿਆਨਕ ਸੀ ਕਿ ਇਸ ਤੋਂ ਬਾਅਦ ਉਸਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਉਣਾ ਪਿਆ। ਇਹ ਘਟਨਾ ਪਿਛਲੇ ਸੋਮਵਾਰ ਦੁਪਹਿਰ ਵਾਪਰੀ ਸੀ ਜਿਸ ਨੇ ਜਨਤਕ ਆਵਾਜਾਈ ਸਥਾਨਾਂ ‘ਤੇ ਵਧ ਰਹੀ ਅਸੁਰੱਖਿਆ ਨੂੰ ਫਿਰ ਚਰਚਾ ਵਿੱਚ ਲਿਆ ਦਿੱਤਾ ਹੈ। ਪੀੜਤ ਡਰਾਈਵਰ ਸ਼੍ਰੀ ਸਵਾਮੀ, ਜੋ ਹਾਲ ਹੀ ਵਿੱਚ ਰਿਚੀਜ਼ ਟ੍ਰਾਂਸਪੋਰਟ (Auckland Transport ਦੇ ਤਹਿਤ) ਨਾਲ ਜੁੜੇ ਸਨ, ਆਪਣੀ ਰੂਟ ਬਦਲਣ ਦੀ ਉਡੀਕ ਕਰ ਰਹੇ ਸਨ ਜਦੋਂ ਇੱਕ ਵਿਅਕਤੀ ਨੇ ਉਨ੍ਹਾਂ ‘ਤੇ ਅਚਾਨਕ ਮੁੱਕਾ ਮਾਰਿਆ। ਇਸ ਹਮਲੇ ਨਾਲ ਉਨ੍ਹਾਂ ਦੇ ਨੱਕ ਦੀ ਹੱਡੀ ਟੁੱਟ ਗਈ ਅਤੇ ਚਿਹਰੇ ‘ਤੇ ਕਾਫ਼ੀ ਸੋਜ ਆ ਗਈ। ਹਾਲਾਂਕਿ ਪੁਲਿਸ ਨੇ ਹਮਲਾਵਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਪਰ ਇਸ ਘਟਨਾ ਨੇ ਸੁਰੱਖਿਆ ਸਬੰਧੀ ਵੱਡੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
