ਨਿਊਜ਼ੀਲੈਂਡ ‘ਚ ਵੱਧਦੀ ਬੇਰੁਜ਼ਗਾਰੀ ਨੇ ਲਕਸਨ ਸਰਕਾਰ ਨੂੰ ਸਖ਼ਤ ਫੈਸਲੇ ਲੈ ਲਈ ਮਜ਼ਬੂਰ ਕਰ ਦਿੱਤਾ ਹੈ। ਜੇਕਰ ਕੋਈ NZ ਕਾਰੋਬਾਰੀ ਬੇਰੁਜ਼ਗਾਰ ਨਿਊਜ਼ੀਲੈਂਡ ਵਾਸੀਆਂ ਨੂੰ ਨੌਕਰੀ ਦੇਣ ਦੀ ਕੋਸ਼ਿਸ਼ ਨਹੀਂ ਕਰੇਗਾ ਤਾਂ ਉਨ੍ਹਾਂ ਤੋਂ ਪ੍ਰਵਾਸੀਆਂ ਨੂੰ ਭਰਤੀ ਕਰਨ ਦਾ ਮੌਕਾ ਖੋਹ ਲਿਆ ਜਾਵੇਗਾ ਯਾਨੀ ਕਿ ਮਨਜ਼ੂਰੀ ਰੱਦ ਕਰ ਦਿੱਤੀ ਜਾਵੇਗੀ। ਇਹ ਕਹਿਣਾ ਹੈ ਕਿ ਮੰਤਰੀ ਏਰਿਕਾ ਸਟੈਨਫੋਰਡ ਦਾ। ਦੱਸ ਦੇਈਏ ਮਹਾਂਮਾਰੀ ਤੋਂ ਬਾਅਦ ਇੱਥੇ ਆਏ ਹਜ਼ਾਰਾਂ ਵਿਦੇਸ਼ੀ ਕਾਮਿਆਂ ਦੇ ਵੀਜ਼ੇ ਅਗਲੇ ਕੁਝ ਮਹੀਨਿਆਂ ਵਿੱਚ ਖਤਮ ਹੋ ਰਹੇ ਹਨ। ਏਰਿਕਾ ਸਟੈਨਫੋਰਡ ਨੇ ਕਿਹਾ ਕਿ ਪ੍ਰਵਾਸੀ ਨੂੰ ਨੌਕਰੀ ‘ਤੇ ਰੱਖਣ ਦੇ ਚਾਹਵਾਨ ਛੇ ਵਿੱਚੋਂ ਇੱਕ ਤੋਂ ਵੱਧ ਮਾਲਕਾਂ ਨੇ ਘੱਟ ਹੁਨਰਮੰਦ ਨੌਕਰੀਆਂ ਲਈ ਸਟਾਫ ਲੱਭਣ ਲਈ ਸਮਾਜਿਕ ਵਿਕਾਸ ਮੰਤਰਾਲੇ (MSD) ਨਾਲ ਸੰਪਰਕ ਨਹੀਂ ਕੀਤਾ ਜਾਂ ਭੂਮਿਕਾ ਦਾ ਇਸ਼ਤਿਹਾਰ ਦੇਣ ਲਈ ਜ਼ਰੂਰੀ ਕੋਸ਼ਿਸ ਵੀ ਨਹੀਂ ਕੀਤੀ।
ਉਨ੍ਹਾਂ ਐਸੋਸੀਏਸ਼ਨ ਫਾਰ ਮਾਈਗ੍ਰੇਸ਼ਨ ਐਂਡ ਇਨਵੈਸਟਮੈਂਟ ਦੀ ਸਾਲਾਨਾ ਕਾਨਫਰੰਸ ਦੌਰਾਨ ਦੱਸਿਆ ਕਿ 2022 ਵਿੱਚ ਪਹਿਲੀ ਵਾਰ ਜਾਰੀ ਕੀਤੇ ਗਏ ਮਾਨਤਾ ਪ੍ਰਾਪਤ ਵਰਕ ਵੀਜ਼ੇ ਤੋਂ ਬਾਅਦ 20,000 ਹੋਰ ਨਿਊਜ਼ੀਲੈਂਡ ਵਾਸੀ ਬੇਰੁਜ਼ਗਾਰ ਹਨ। ਬਹੁਤ ਸਾਰੇ ਪ੍ਰਵਾਸੀ ਤਿੰਨ ਸਾਲਾਂ ਦੇ ਵੱਧ ਤੋਂ ਵੱਧ ਠਹਿਰਨ ਵਾਲੇ ਵੀਜ਼ਿਆਂ ‘ਤੇ ਹਨ, ਜਿਸਦਾ ਮਤਲਬ ਹੈ ਕਿ ਜੇਕਰ ਉਹ ਕਿਸੇ ਹੋਰ ਵੀਜ਼ੇ, ਜਿਵੇਂ ਕਿ ਰਿਹਾਇਸ਼ ‘ਤੇ ਨਹੀਂ ਜਾ ਰਹੇ ਹਨ ਤਾਂ ਉਨ੍ਹਾਂ ਨੂੰ ਘੱਟੋ-ਘੱਟ ਇੱਕ ਸਾਲ ਲਈ ਦੇਸ਼ ਛੱਡਣਾ ਪਵੇਗਾ।
ਡਾਟਾ ਅਨੁਸਾਰ, ਮਾਰਚ ਤੋਂ ਜੁਲਾਈ ਦਰਮਿਆਨ 17% ਕਾਰੋਬਾਰੀਆਂ ਨੇ ਘੱਟ ਹੁਨਰ ਵਾਲੀਆਂ ਨੌਕਰੀਆਂ ਲਈ MSD ਦੀ ਸ਼ਰਤਾਂ ਦੀ ਪਾਲਣਾ ਨਹੀਂ ਕੀਤੀ, ਅਤੇ 11% ਮਾਮਲਿਆਂ ‘ਚ ਉਨ੍ਹਾਂ ਨੇ MSD ਨਾਲ ਸੰਪਰਕ ਹੀ ਨਹੀਂ ਕੀਤਾ। ਸਟੈਨਫੋਰਡ ਨੇ ਸਪੱਸ਼ਟ ਕਿਹਾ ਕਿ ਮੰਤ੍ਰਾਲਾ ਪਰਵਾਸੀ ਕਰਮਚਾਰੀਆਂ ਦੇ ਵਿਰੁੱਧ ਨਹੀਂ, ਪਰ ਨਿਊਜ਼ੀਲੈਂਡਰਾਂ ਨੂੰ ਰੋਜ਼ਗਾਰ ‘ਚ ਪਹਿਲੀ ਤਰਜੀਹ ਦੇਣ ਦੀ ਨੀਤੀ ‘ਤੇ ਸਮਝੌਤਾ ਨਹੀਂ ਕੀਤਾ ਜਾਵੇਗਾ।