Auckland ਵਿੱਚ ਵੱਧ ਰਹੇ ਟ੍ਰੈਫਿਕ ਜਾਮ ਨੂੰ ਕਾਬੂ ਕਰਨ ਲਈ ਇੱਕ ਨਵੀਂ ਯੋਜਨਾ ‘ਤੇ ਤੇਜ਼ੀ ਨਾਲ ਕੰਮ ਕੀਤਾ ਜਾ ਰਿਹਾ ਹੈ। ਸ਼ਹਿਰ ਦੇ ਮੇਅਰ Wayne Brown ਨੇ ਸੰਕੇਤ ਦਿੱਤਾ ਹੈ ਕਿ Congestion Charging ਪ੍ਰਣਾਲੀ ਨੂੰ ਜਲਦ ਲਾਗੂ ਕੀਤਾ ਜਾ ਸਕਦਾ ਹੈ, ਜਿਸ ਤਹਿਤ ਭੀੜ ਵਾਲੇ ਇਲਾਕਿਆਂ ਵਿੱਚ ਗੱਡੀ ਲੈ ਕੇ ਜਾਣ ‘ਤੇ ਡਰਾਈਵਰਾਂ ਨੂੰ ਫੀਸ ਦੇਣੀ ਪਵੇਗੀ।
ਮੇਅਰ ਦਾ ਕਹਿਣਾ ਹੈ ਕਿ ਆਕਲੈਂਡ ਦੀਆਂ ਸੜਕਾਂ ‘ਤੇ ਦਿਨੋਂ-ਦਿਨ ਵਧ ਰਹੀ ਭੀੜ ਨੂੰ ਘਟਾਉਣ ਲਈ ਇਹ ਕਦਮ ਬਹੁਤ ਜ਼ਰੂਰੀ ਬਣ ਗਿਆ ਹੈ। ਉਨ੍ਹਾਂ ਦੇ ਅਨੁਸਾਰ ਜੇ ਲੋਕਾਂ ਨੂੰ ਪੀਕ ਸਮੇਂ ਦੌਰਾਨ ਵਾਧੂ ਚਾਰਜ ਦੇਣਾ ਪਵੇਗਾ ਤਾਂ ਉਹ ਆਪਣੇ ਸਫ਼ਰ ਦੇ ਸਮੇਂ ਵਿੱਚ ਬਦਲਾਅ ਕਰਨ, ਕਾਰ-ਪੂਲਿੰਗ ਕਰਨ ਜਾਂ ਜਨਤਕ ਆਵਾਜਾਈ ਦੀ ਵਰਤੋਂ ਵੱਲ ਵੱਧ ਧਿਆਨ ਦੇਣਗੇ।
Congestion Charging ਇੱਕ ਐਸੀ ਪ੍ਰਣਾਲੀ ਹੈ ਜੋ ਦੁਨੀਆ ਦੇ ਕਈ ਵੱਡੇ ਸ਼ਹਿਰਾਂ ਵਿੱਚ ਪਹਿਲਾਂ ਹੀ ਲਾਗੂ ਹੈ। ਇਸ ਦਾ ਮੁੱਖ ਮਕਸਦ ਟ੍ਰੈਫਿਕ ਨੂੰ ਕੰਟਰੋਲ ਕਰਨਾ, ਸੜਕਾਂ ‘ਤੇ ਦਬਾਅ ਘਟਾਉਣਾ ਅਤੇ ਯਾਤਰਾ ਨੂੰ ਸੁਚੱਜਾ ਬਣਾਉਣਾ ਹੁੰਦਾ ਹੈ।
ਹਾਲਾਂਕਿ ਇਸ ਯੋਜਨਾ ਦੀਆਂ ਦਰਾਂ, ਲਾਗੂ ਖੇਤਰਾਂ ਅਤੇ ਸ਼ੁਰੂਆਤੀ ਤਾਰੀਖ ਬਾਰੇ ਅਜੇ ਤੱਕ ਕੋਈ ਅੰਤਿਮ ਐਲਾਨ ਨਹੀਂ ਕੀਤਾ ਗਿਆ। ਪਰ ਮੇਅਰ ਨੇ ਸਾਫ਼ ਕੀਤਾ ਹੈ ਕਿ ਉਹ ਇਸਨੂੰ ਜਿੰਨੀ ਜਲਦੀ ਹੋ ਸਕੇ ਲਾਗੂ ਦੇਖਣਾ ਚਾਹੁੰਦੇ ਹਨ।
ਇਸ ਪ੍ਰਸਤਾਵ ਨੂੰ ਲੈ ਕੇ ਲੋਕਾਂ ਵਿੱਚ ਵੱਖ-ਵੱਖ ਪ੍ਰਤੀਕਿਰਿਆਵਾਂ ਸਾਹਮਣੇ ਆ ਰਹੀਆਂ ਹਨ। ਕੁਝ ਲੋਕਾਂ ਦਾ ਮੰਨਣਾ ਹੈ ਕਿ ਇਸ ਨਾਲ ਟ੍ਰੈਫਿਕ ਅਤੇ ਯਾਤਰਾ ਸਮੇਂ ਵਿੱਚ ਸੁਧਾਰ ਆਵੇਗਾ, ਜਦਕਿ ਕਈ ਡਰਾਈਵਰਾਂ ਨੂੰ ਚਿੰਤਾ ਹੈ ਕਿ ਇਸ ਨਾਲ ਰੋਜ਼ਾਨਾ ਆਉਣ-ਜਾਣ ਦਾ ਖਰਚ ਵਧੇਗਾ।