ਦਿੱਲੀ ਪ੍ਰੀਮੀਅਰ ਲੀਗ ਦਾ ਇੱਕ ਮੁਕਾਬਲਾ ਭਾਰਤੀ ਕ੍ਰਿਕਟਰ ਨਿਤੀਸ਼ ਰਾਣਾ ਲਈ ਬੇਹੱਦ ਭਾਵੁਕ ਪਲਾਂ ਨਾਲ ਭਰਿਆ ਰਿਹਾ। ਮਾਂ ਦੇ ਦਿਹਾਂਤ ਤੋਂ ਕੁਝ ਹੀ ਦਿਨਾਂ ਬਾਅਦ ਮੈਦਾਨ ’ਤੇ ਵਾਪਸੀ ਕਰਦੇ ਹੋਏ ਰਾਣਾ ਨੇ ਸ਼ਾਨਦਾਰ ਅਰਧ ਸੈਂਕੜਾ ਜੜਿਆ, ਪਰ 50 ਦੌੜਾਂ ਪੂਰੀਆਂ ਕਰਦੇ ਹੀ ਉਹ ਭਾਵਨਾਵਾਂ ’ਤੇ ਕਾਬੂ ਨਾ ਰੱਖ ਸਕੇ।
ਆਸਮਾਨ ਵੱਲ ਵੇਖਿਆ ਤੇ ਫੁੱਟ-ਫੁੱਟ ਕੇ ਰੋਏ
ਵੈਸਟ ਦਿੱਲੀ ਲਾਇੰਸ ਵੱਲੋਂ ਖੇਡਦਿਆਂ ਰਾਣਾ ਨੇ ਸਿਰਫ਼ 27 ਗੇਂਦਾਂ ’ਚ ਅਰਧ ਸੈਂਕੜਾ ਪੂਰਾ ਕੀਤਾ। ਉਨ੍ਹਾਂ ਨੇ 33 ਗੇਂਦਾਂ ’ਤੇ 60 ਦੌੜਾਂ ਬਣਾਈਆਂ, ਜਿਸ ਵਿੱਚ 4 ਚੌਕੇ ਅਤੇ 6 ਛੱਕੇ ਸ਼ਾਮਲ ਸਨ। ਅਰਧ ਸੈਂਕੜਾ ਪੂਰਾ ਕਰਦੇ ਹੀ ਰਾਣਾ ਨੇ ਆਸਮਾਨ ਵੱਲ ਇਸ਼ਾਰਾ ਕੀਤਾ ਅਤੇ ਆਪਣੀ ਮਾਂ ਨੂੰ ਯਾਦ ਕਰਦਿਆਂ ਮੈਦਾਨ ’ਤੇ ਹੀ ਰੋ ਪਏ। ਵਿਰੋਧੀ ਟੀਮ ਦੇ ਖਿਡਾਰੀਆਂ ਅਤੇ ਅੰਪਾਇਰ ਨੇ ਉਨ੍ਹਾਂ ਨੂੰ ਸੰਭਾਲਿਆ।
ਜਰਸੀ ’ਤੇ ਵੀ ਮਾਂ ਦਾ ਨਾਮ
ਰਾਣਾ ਨੇ ਆਪਣੀ ਮਾਂ ਨੂੰ ਖਾਸ ਢੰਗ ਨਾਲ ਯਾਦ ਕੀਤਾ। ਮੈਚ ਦੌਰਾਨ ਉਨ੍ਹਾਂ ਦੀ ਜਰਸੀ ਦੇ ਪਿੱਛੇ ‘N. Satish’ ਲਿਖਿਆ ਹੋਇਆ ਸੀ। ਉਨ੍ਹਾਂ ਦੀ ਪਤਨੀ ਸਾਚੀ ਮਾਰਵਾਹ ਨੇ ਵੀ ਸੋਸ਼ਲ ਮੀਡੀਆ ’ਤੇ ਲਿਖਿਆ, “Mumma is here with you.”
ਸ਼ਾਨਦਾਰ ਪਾਰੀ ਦੇ ਬਾਵਜੂਦ ਟੀਮ ਹਾਰੀ
ਰਾਣਾ ਦੀ 60 ਦੌੜਾਂ ਦੀ ਪਾਰੀ ਦੇ ਬਾਵਜੂਦ ਵੈਸਟ ਦਿੱਲੀ ਲਾਇੰਸ 169 ਦੌੜਾਂ ’ਤੇ ਆਲ ਆਊਟ ਹੋ ਗਈ। ਜਵਾਬ ਵਿੱਚ ਸਾਊਥ ਦਿੱਲੀ ਸੁਪਰਸਟਾਰਜ਼ ਨੇ ਬਿਨਾਂ ਕੋਈ ਵਿਕਟ ਗੁਆਏ ਟੀਚਾ ਹਾਸਿਲ ਕਰ ਲਿਆ। ਸਨਤ ਸਾਂਗਵਾਨ ਨੇ ਨਾਬਾਦ 111 ਅਤੇ ਅਨਮੋਲ ਸ਼ਰਮਾ ਨੇ ਨਾਬਾਦ 55 ਦੌੜਾਂ ਬਣਾਈਆਂ। ਟੀਮ ਨੇ 28 ਗੇਂਦਾਂ ਬਾਕੀ ਰਹਿੰਦਿਆਂ 10 ਵਿਕਟਾਂ ਨਾਲ ਜਿੱਤ ਦਰਜ ਕੀਤੀ।