ਨਿਊਜ਼ੀਲੈਂਡ ਵਿੱਚ ਫਿਲਹਾਲ ਨਿੱਜੀ ਤੌਰ ‘ਤੇ ਪਟਾਕਿਆਂ ਦੀ ਵਿਕਰੀ ਅਤੇ ਵਰਤੋਂ ਜਾਰੀ ਰਹੇਗੀ। ਸਰਕਾਰ ਨੇ ਸੰਸਦੀ ਪਟੀਸ਼ਨ ਕਮੇਟੀ ਵੱਲੋਂ ਨਿੱਜੀ ਪਟਾਕਿਆਂ ‘ਤੇ ਪਾਬੰਦੀ ਲਗਾਉਣ ਦੀ ਸਿਫ਼ਾਰਸ਼ ਨੂੰ ਸਵੀਕਾਰ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ। ਇਸ ਫ਼ੈਸਲੇ ਤੋਂ ਬਾਅਦ ਜਾਨਵਰਾਂ ਦੀ ਭਲਾਈ ਲਈ ਕੰਮ ਕਰਨ ਵਾਲੀ ਸੰਸਥਾ SPCA ਨਿਊਜ਼ੀਲੈਂਡ ਨੇ ਡੂੰਘੀ ਨਿਰਾਸ਼ਾ ਪ੍ਰਗਟਾਈ ਹੈ।
ਯਾਦ ਰਹੇ ਕਿ ਅਪ੍ਰੈਲ 2026 ਵਿੱਚ ਸੰਸਦ ਦੀ ਪਟੀਸ਼ਨ ਕਮੇਟੀ ਨੇ ਸਿਫ਼ਾਰਸ਼ ਕੀਤੀ ਸੀ ਕਿ ਨਿੱਜੀ ਪਟਾਕਿਆਂ ਦੀ ਵਿਕਰੀ ਅਤੇ ਵਰਤੋਂ ‘ਤੇ ਰੋਕ ਲਗਾਈ ਜਾਵੇ, ਜਦਕਿ ਲਾਇਸੈਂਸਸ਼ੁਦਾ ਪੇਸ਼ੇਵਰਾਂ ਵੱਲੋਂ ਕਰਵਾਏ ਜਾਣ ਵਾਲੇ ਜਨਤਕ ਫਾਇਰਵਰਕ ਸ਼ੋਅ ਜਾਰੀ ਰਹਿਣ। ਹਾਲਾਂਕਿ ਸਰਕਾਰ ਨੇ ਇਸ ਪ੍ਰਸਤਾਵ ਨੂੰ ਮਨਜ਼ੂਰੀ ਨਹੀਂ ਦਿੱਤੀ ਅਤੇ ਮੌਜੂਦਾ ਨਿਯਮਾਂ ਨੂੰ ਹੀ ਬਰਕਰਾਰ ਰੱਖਣ ਦਾ ਫ਼ੈਸਲਾ ਕੀਤਾ ਹੈ।
SPCA ਦਾ ਕਹਿਣਾ ਹੈ ਕਿ ਨਿੱਜੀ ਪਟਾਕਿਆਂ ਕਾਰਨ ਹਰ ਸਾਲ ਵੱਡੀ ਗਿਣਤੀ ਵਿੱਚ ਪਾਲਤੂ ਅਤੇ ਜੰਗਲੀ ਜਾਨਵਰ ਡਰ, ਸੱਟਾਂ ਅਤੇ ਮਾਨਸਿਕ ਤਣਾਅ ਦਾ ਸਾਹਮਣਾ ਕਰਦੇ ਹਨ। ਸੰਸਥਾ ਦੇ ਅਨੁਸਾਰ ਅਚਾਨਕ ਚਲਾਏ ਗਏ ਪਟਾਕਿਆਂ ਕਾਰਨ ਕਈ ਜਾਨਵਰ ਘਰਾਂ ਤੋਂ ਭੱਜ ਜਾਂਦੇ ਹਨ, ਜ਼ਖ਼ਮੀ ਹੋ ਜਾਂਦੇ ਹਨ ਅਤੇ ਕੁਝ ਮਾਮਲਿਆਂ ਵਿੱਚ ਉਨ੍ਹਾਂ ਦੀ ਜਾਨ ਵੀ ਚਲੀ ਜਾਂਦੀ ਹੈ।
ਸੰਸਥਾ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਉਹ ਦੀਵਾਲੀ, ਮਾਤਾਰਿਕੀ, ਚਾਈਨੀਜ਼ ਨਿਊ ਇਅਰ ਅਤੇ ਗਾਇ ਫਾਕਸ ਵਰਗੇ ਮੌਕਿਆਂ ‘ਤੇ ਪਹਿਲਾਂ ਤੋਂ ਐਲਾਨ ਕਰਕੇ ਪੇਸ਼ੇਵਰ ਢੰਗ ਨਾਲ ਕਰਵਾਏ ਜਾਣ ਵਾਲੇ ਜਨਤਕ ਫਾਇਰਵਰਕ ਸ਼ੋਅ ਦਾ ਸਮਰਥਨ ਕਰਦੀ ਹੈ। SPCA ਵੱਲੋਂ ਕਰਵਾਏ ਗਏ ਇੱਕ ਸਰਵੇਖਣ ਮੁਤਾਬਕ 63 ਫ਼ੀਸਦੀ ਨਿਊਜ਼ੀਲੈਂਡ ਵਾਸੀ ਨਿੱਜੀ ਪਟਾਕਿਆਂ ਦੀ ਵਿਕਰੀ ਅਤੇ ਵਰਤੋਂ ‘ਤੇ ਪਾਬੰਦੀ ਦੇ ਹੱਕ ਵਿੱਚ ਹਨ।