ਨਿਊਜ਼ੀਲੈਂਡ ‘ਚ ਜਿੱਥੇ ਮੌਜੂਦਾ ਸਮੇਂ ਕਈ ਕਾਰੋਬਾਰ ਕਰਮਚਾਰੀਆਂ ਦੀ ਘਾਟ ਨਾਲ ਜੂਝ ਰਹੇ ਨੇ, ਉੱਥੇ ਹੀ ਸਿਹਤ ਸਹੂਲਤਾਂ ‘ਚ ਵੀ ਇੰਨ੍ਹਾਂ ਕਮੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ, ਉੱਥੇ ਹੀ ਹੁਣ ਸਿਹਤ ਸਹੂਲਤਾਂ ‘ਚ ਲੋਕਾਂ ਨੂੰ ਕੁੱਝ ਹੋਰ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ, ਕਿਉਂਕ ਦੇਸ਼ ਭਰ ਵਿੱਚ ਅਗਲੇ ਹਫਤੇ ਤੋਂ ਨਰਸਾਂ ਨੇ ਆਪਣੀਆਂ ਵਾਧੂ ਸ਼ਿਫਟਾਂ ‘ਤੇ ਕੰਮ ਨਾ ਕਰਨ ਦਾ ਫੈਸਲਾ ਲਿਆ ਹੈ, ਹਾਲਾਂਕਿ ਇਸ ਦੇ ਉਲਟ ਨਵੀਂ ਹੈਲਥ ਅਥਾਰਟੀ ਇੰਨ੍ਹਾਂ ਵਾਧੂ ਦੀਆਂ ਸ਼ਿਫਟਾਂ ਨੂੰ ਨਰਸਾਂ ਦੇ ਕੰਮ ਦਾ ਹਿੱਸਾ ਦੱਸ ਨਰਸਾਂ ਦੇ ਫੈਸਲੇ ਨੂੰ ਗੈਰ-ਕਾਨੂੰਨੀ ਦੱਸ ਰਹੀ ਹੈ। ਜੇਕਰ ਨਰਸਾਂ ਅਗਲੇ ਹਫ਼ਤੇ ਤੋਂ ਵਾਧੂ ਸ਼ਿਫਟਾਂ ‘ਤੇ ਕੰਮ ਕਰਨ ਤੋਂ ਇਨਕਾਰ ਕਰਦੀਆਂ ਹਨ ਤਾਂ ਡਾਕਟਰ ਹਸਪਤਾਲਾਂ ਵਿੱਚ ਵਿਆਪਕ ਵਿਘਨ ਦੀ ਉਮੀਦ ਕਰ ਰਹੇ ਹਨ।
ਜੇਕਰ ਮਾਮਲੇ ਦੀ ਗੱਲ ਕਰੀਏ ਤਾਂ ਇਹ ਸਾਰਾ ਮਾਮਲਾ ਨਰਸਾਂ ਨੂੰ ਵਾਧੂ ਦੀਆਂ ਸ਼ਿਫਟਾਂ ਬਦਲੇ $100 ਸਪੈਸ਼ਲ ਵਿੰਟਰ ਬੋਨਸ ਦੇਣ ਸਬੰਧੀ ਹੈ। ਕਿਉਂਕ ਇਸ ਤੋਂ ਪਹਿਲਾ ਕੋਰੋਨਾ ਮਹਾਂਮਾਰੀ ਅਤੇ ਫਿਰ ਸਰਦੀਆਂ ‘ਚ ਫਲੂ ਦੇ ਵਧੇ ਮਰੀਜਾਂ ਦੀ ਗਿਣਤੀ ਕਾਰਨ ਇਨ੍ਹਾਂ ਨਰਸਾਂ ਨੂੰ ਵਾਧੂ ਦੀਆਂ ਸ਼ਿਫਟਾਂ ਬਦਲੇ $100 ਸਪੈਸ਼ਲ ਵਿੰਟਰ ਬੋਨਸ ਦੇਣ ਦਾ ਫੈਸਲਾ ਲਿਆ ਗਿਆ ਸੀ ਜੋ ਹੁਣ 1 ਅਕਤੂਬਰ ਤੋਂ ਖਤਮ ਹੋ ਰਿਹਾ ਹੈ, ਇਸੇ ਕਾਰਨ ਨਰਸਾਂ ਦੀ ਨੁਮਾਇੰਦਗੀ ਕਰਦੀ ਨਰਸਜ਼ ਐਨ ਜੈਡ ਨੇ ਇਸ ਦਾ ਵਿਰੋਧ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਨਰਸਾਂ ਨਾਲ ਧੱਕਾ ਹੈ, ਕਿਉਂਕਿ ਔਖੇ ਵੇਲੇ ਕੰਮ ਲੈਣ ਤੋਂ ਬਾਅਦ ਹੁਣ ਵਾਧੂ ਦੀਆਂ ਸ਼ਿਫਟਾਂ ‘ਤੇ ਸਪੈਸ਼ਲ ਬੋਨਸ ਬੰਦ ਕੀਤੇ ਜਾਣਾ ਬਹੁਤ ਗਲਤ ਹੈ ਤੇ ਇਸ ਫੈਸਲੇ ਖਿਲਾਫ ਨਿਊਜੀਲੈਂਡ ਭਰ ਦੀਆਂ 35,000 ਨਰਸਾਂ ਇੱਕਜੁੱਟ ਹੋਕੇ ਵਿਰੋਧ ਕਰਨਗੀਆਂ। ਜ਼ਿਕਰਯੋਗ ਹੈ ਕਿ ਨਰਸਾਂ ਕੋਵਿਡ ਦੇ ਸਮੇਂ ਤੋਂ ਲਗਾਤਾਰ ਦਬਾਅ ਹੇਠ ਕੰਮ ਕਰ ਰਹੀਆਂ ਹਨ।