ਨਿਊਜ਼ੀਲੈਂਡ ਪੁਲਿਸ ਵਿੱਚ ਘੱਟ ਗਿਣਤੀ ਨਾਲ ਹੋ ਰਹੀ ਭਰਤੀ ਨੂੰ ਲੈ ਕੇ ਪੁਲਿਸ ਕਮਿਸ਼ਨਰ ਰਿਚਰਡ ਚੈਂਬਰਜ਼ ਨੇ ਚਿੰਤਾ ਜਤਾਈ ਹੈ ਅਤੇ ਸੰਬੰਧਿਤ ਅਧਿਕਾਰੀਆਂ ਤੋਂ ਇਸ ਬਾਰੇ ਸਪਸ਼ਟੀਕਰਨ ਮੰਗਿਆ ਹੈ। ਹਾਲੀਆ ਭਰਤੀ ਬੈਚਾਂ ਵਿੱਚ ਉਮੀਦਵਾਰਾਂ ਦੀ ਗਿਣਤੀ ਉਮੀਦ ਤੋਂ ਘੱਟ ਰਹਿਣ ਕਾਰਨ ਇਹ ਮਾਮਲਾ ਗੰਭੀਰ ਬਣ ਗਿਆ ਹੈ। ਜਾਣਕਾਰੀ ਮੁਤਾਬਿਕ ਇਕ ਤਾਜ਼ਾ ਬੈਚ ਵਿੱਚ 50 ਤੋਂ ਘੱਟ ਰਿਕਰੂਟ ਸ਼ਾਮਿਲ ਸਨ, ਜਿਸ ਨਾਲ ਭਰਤੀ ਪ੍ਰਕਿਰਿਆ ‘ਤੇ ਸਵਾਲ ਖੜੇ ਹੋਏ ਹਨ। 2023 ਵਿੱਚ ਨੈਸ਼ਨਲ ਅਤੇ ਨਿਊਜ਼ੀਲੈਂਡ ਫਰਸਟ ਵਿਚਾਲੇ ਹੋਈ ਗਠਜੋੜ ਸਹਿਮਤੀ ਅਨੁਸਾਰ ਪਹਿਲੇ ਦੋ ਸਾਲਾਂ ਵਿੱਚ 500 ਨਵੇਂ ਫਰੰਟਲਾਈਨ ਪੁਲਿਸ ਕਰਮਚਾਰੀ ਭਰਤੀ ਕਰਨ ਦਾ ਟੀਚਾ ਰੱਖਿਆ ਗਿਆ ਸੀ।
ਹੁਣ ਤੱਕ ਕਰੀਬ 297 ਕਾਂਸਟੇਬਲ ਫੁੱਲ-ਟਾਈਮ ਇਕਵੀਵਲੈਂਟ ਤੌਰ ‘ਤੇ ਸੇਵਾ ਵਿੱਚ ਸ਼ਾਮਿਲ ਹੋ ਚੁੱਕੇ ਹਨ, ਜਦਕਿ 275 ਰਿਕਰੂਟ ਇਸ ਵੇਲੇ ਟ੍ਰੇਨਿੰਗ ਹਾਸਿਲ ਕਰ ਰਹੇ ਹਨ। ਅਸਿਸਟੈਂਟ ਕਮਿਸ਼ਨਰ ਜੀਨੈੱਟ ਪਾਰਕ ਨੇ ਕਿਹਾ ਕਿ 500 ਅਧਿਕਾਰੀਆਂ ਦੀ ਭਰਤੀ ਪੁਲਿਸ ਵਿਭਾਗ ਦੀ ਪਹਿਲੀ ਤਰਜੀਹ ਹੈ ਅਤੇ ਇਸ ਨੂੰ ਹਰ ਹਾਲ ਵਿੱਚ ਪੂਰਾ ਕੀਤਾ ਜਾਵੇਗਾ।
ਉਨ੍ਹਾਂ ਦੱਸਿਆ ਕਿ ਭਰਤੀ ਲਈ ਅਰਜ਼ੀਆਂ ਦੀ ਗਿਣਤੀ ਅਜੇ ਵੀ ਵਧੀਆ ਹੈ ਅਤੇ ਆਕਲੈਂਡ ਤੇ ਪੋਰੀਰੂਆ ਦੇ ਟ੍ਰੇਨਿੰਗ ਕੇਂਦਰ ਲਗਭਗ ਪੂਰੀ ਸਮਰੱਥਾ ਨਾਲ ਕੰਮ ਕਰ ਰਹੇ ਹਨ। ਇਸ ਵੇਲੇ ਲਗਭਗ 1000 ਉਮੀਦਵਾਰ ਚੋਣ ਪ੍ਰਕਿਰਿਆ ਦੇ ਵੱਖ-ਵੱਖ ਪੜਾਅ ‘ਚ ਹਨ।
ਕਮਿਸ਼ਨਰ ਵੱਲੋਂ ਸਪਸ਼ਟ ਹਦਾਇਤਾਂ ਦਿੱਤੀਆਂ ਗਈਆਂ ਹਨ ਕਿ ਭਰਤੀ ਪ੍ਰਕਿਰਿਆ ਵਿੱਚ ਕੋਈ ਵੀ ਰੁਕਾਵਟ ਬਰਦਾਸ਼ਤ ਨਹੀਂ ਕੀਤੀ ਜਾਵੇਗੀ। 20 ਅਪ੍ਰੈਲ ਤੱਕ ਦੇ ਅੰਕੜਿਆਂ ਮੁਤਾਬਕ ਦੇਸ਼ ਵਿੱਚ ਕੁੱਲ 10,508 ਕਾਂਸਟੇਬਲ ਡਿਊਟੀ ‘ਤੇ ਸਨ। ਸਰਕਾਰ ਵੱਲੋਂ ਇਸ ਟਾਰਗੇਟ ਨੂੰ ਪੂਰਾ ਕਰਨ ਲਈ ਵਾਧੂ ਫੰਡ ਵੀ ਮੁਹੱਈਆ ਕਰਵਾਇਆ ਗਿਆ ਹੈ।