ਨਿਊਜ਼ੀਲੈਂਡ ਵਾਸੀ ਪਿਛਲੇ ਕਈ ਦਿਨਾਂ ਤੋਂ ਖਰਾਬ ਮੌਸਮ ਦੀ ਮਾਰ ਨਾਲ ਜੂਝ ਰਹੇ ਹਨ। ਉੱਥੇ ਹੀ ਹੁਣ ਨਾਰਥਲੈਂਡ ਅਤੇ ਕੋਰੋਮੰਡਲ ਵਿੱਚ ਭਾਰੀ ਮੀਂਹ ਦੀਆਂ ਚੇਤਾਵਨੀਆਂ ਹਟਾ ਦਿੱਤੀਆਂ ਗਈਆਂ ਹਨ ਪਰ ਦੱਖਣੀ ਟਾਪੂ ਹੁਣ ਚਿੰਤਾ ਦਾ ਵਿਸ਼ਾ ਹੈ। ਸੋਮਵਾਰ ਨੂੰ ਉੱਤਰ ਵਿੱਚ ਤਬਾਹੀ ਮਚਾਉਣ ਵਾਲੀ ਭਾਰੀ ਬਾਰਿਸ਼ ਅਤੇ ਹਵਾ ਹੁਣ ਦੱਖਣ ਵੱਲ ਵੱਧ ਗਈ ਹੈ। ਦੱਖਣੀ ਟਾਪੂ ਦੇ ਪੂਰਬੀ ਤੱਟ ‘ਤੇ ਭਾਰੀ ਮੀਂਹ ਪੈ ਰਿਹਾ ਹੈ, ਜਿਸ ਕਾਰਨ ਕੈਂਟਰਬਰੀ ਵਿੱਚ ਹੜ੍ਹ ਆਉਣ ਦੀ ਸੰਭਾਵਨਾ ਹੈ। ਤਸਮਾਨ ਡਿਸਟ੍ਰਿਕਟ, ਮਾਰਲਬਰੋ, ਕੈਂਟਰਬਰੀ, ਉੱਤਰੀ ਓਟੈਗੋ ਅਤੇ ਡੁਨੇਡਿਨ ਲਈ ਭਾਰੀ ਮੀਂਹ ਦੀਆਂ ਚਿਤਾਵਨੀਆਂ ਲਾਗੂ ਹਨ। ਪਿਛਲੇ ਹਫਤੇ ਦੀ ਭਾਰੀ ਬਾਰਿਸ਼ ਨਾਲ ਪਹਿਲਾਂ ਹੀ ਸੰਤ੍ਰਿਪਤ ਖੇਤਰਾਂ ਵਿੱਚ ਨਦੀਆਂ ਉੱਚੀਆਂ ਹੋ ਰਹੀਆਂ ਹਨ ਅਤੇ ਐਸ਼ਬਰਟਨ ਜ਼ਿਲ੍ਹੇ ਸਮੇਤ ਕਈ ਥਾਵਾਂ ‘ਤੇ ਹੜ੍ਹ ਆਉਣ ਦੀ ਸੰਭਾਵਨਾ ਹੈ।
ਐਮਰਜੈਂਸੀ ਮੈਨੇਜਮੈਂਟ ਓਟੈਗੋ ਨੇ ਕਿਹਾ ਕਿ ਉੱਤਰੀ ਓਟਾਗੋ ਵਿੱਚ 130mm ਅਤੇ ਡੁਨੇਡਿਨ ਵਿੱਚ 90mm ਤੱਕ ਮੀਂਹ ਪੈਣ ਦੀ ਭਵਿੱਖਬਾਣੀ ਦੇ ਵਿਚਕਾਰ ਓਟਾਗੋ ਦੇ ਲੋਕਾਂ ਨੂੰ ਖੇਤਰ ਵਿੱਚ ਤੇਜ਼ੀ ਨਾਲ ਵੱਧ ਰਹੀਆਂ ਨਦੀਆਂ ਤੋਂ ਦੂਰ ਰਹਿਣ ਅਤੇ ਉੱਚੇ ਵਹਾਅ ਲਈ ਤਿਆਰ ਰਹਿਣ ਦੀ ਅਪੀਲ ਕੀਤੀ ਗਈ ਹੈ। ਵੈਤਾਕੀ ਡਿਸਟ੍ਰਿਕਟ ਅਤੇ ਡੁਨੇਡਿਨ ਸਿਟੀ ਕੌਂਸਲਾਂ ਨੇ ਆਪਣੇ ਐਮਰਜੈਂਸੀ ਓਪਰੇਸ਼ਨ ਸੈਂਟਰਾਂ ਨੂੰ ਸਰਗਰਮ ਕਰ ਦਿੱਤਾ ਹੈ। ਐਮਰਜੈਂਸੀ ਮੈਨੇਜਮੈਂਟ ਓਟੈਗੋ ਨੇ ਪੁਸ਼ਟੀ ਕੀਤੀ ਹੈ ਕਿ ਨਿਊਜ਼ੀਲੈਂਡ ਡਿਫੈਂਸ ਫੋਰਸ ਲੋੜ ਪੈਣ ‘ਤੇ ਸਹਾਇਤਾ ਪ੍ਰਦਾਨ ਕਰਨ ਲਈ ਸਟੈਂਡਬਾਏ ‘ਤੇ ਹੈ।