ਆਕਲੈਂਡ: ਰੀਅਲ ਅਸਟੇਟ ਏਜੰਸੀ ਵਨ ਅੱਪ ਰਿਐਲਟੀ ਨੂੰ ਟਰੱਸਟ ਅਕਾਊਂਟ ਨਾਲ ਸਬੰਧਿਤ ਕਾਨੂੰਨੀ ਆਡਿਟ ਨਾ ਕਰਵਾਉਣ ਦੇ ਮਾਮਲੇ ਵਿੱਚ $18,000 ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਏਜੰਸੀ ਨੇ ਛੇ ਸਾਲ ਤੋਂ ਵੱਧ ਸਮੇਂ ਤੱਕ ਆਪਣੇ ਟਰੱਸਟ ਅਕਾਊਂਟ ਦਾ ਲਾਜ਼ਮੀ ਆਡਿਟ ਨਹੀਂ ਕਰਵਾਇਆ ਸੀ।
ਜਾਣਕਾਰੀ ਮੁਤਾਬਿਕ, ਵਨ ਅੱਪ ਰਿਐਲਟੀ ਨੇ 2017 ਵਿੱਚ ਕੰਮ ਸ਼ੁਰੂ ਕੀਤਾ ਸੀ ਅਤੇ ਉਸੇ ਸਮੇਂ ਇਸ ਲਈ ਆਡੀਟਰ ਨਿਯੁਕਤ ਕਰਨਾ ਲਾਜ਼ਮੀ ਸੀ। ਪਰ ਏਜੰਸੀ ਨੇ ਛੇ ਸਾਲ ਅਤੇ ਪੰਜ ਦਿਨ ਤੱਕ ਆਡੀਟਰ ਨਿਯੁਕਤ ਨਹੀਂ ਕੀਤਾ। ਇਸ ਦੌਰਾਨ ਰੀਅਲ ਅਸਟੇਟ ਅਥਾਰਟੀ ਵੱਲੋਂ ਟਰੱਸਟ ਅਕਾਊਂਟ ਦੀਆਂ ਕਾਨੂੰਨੀ ਜ਼ਿੰਮੇਵਾਰੀਆਂ ਪੂਰੀਆਂ ਕਰਨ ਲਈ ਕਈ ਵਾਰ ਯਾਦ ਦਿਵਾਇਆ ਗਿਆ।
ਰੀਅਲ ਅਸਟੇਟ ਏਜੰਟਸ ਡਿਸਿਪਲਿਨਰੀ ਟ੍ਰਿਬਿਊਨਲ ਦੇ ਫੈਸਲੇ ਮੁਤਾਬਿਕ, ਇਸ ਮਿਆਦ ਦੌਰਾਨ ਏਜੰਸੀ ਨੇ 275 ਜਾਇਦਾਦੀ ਲੈਣ-ਦੇਣਾਂ ਨਾਲ ਸਬੰਧਿਤ ਰਕਮ ਆਪਣੇ ਟਰੱਸਟ ਅਕਾਊਂਟ ਵਿੱਚ ਪ੍ਰਾਪਤ ਕੀਤੀ।
ਰੀਅਲ ਅਸਟੇਟ ਅਥਾਰਟੀ ਨੇ ਦੱਸਿਆ ਕਿ ਉਸ ਨੇ ਤੁਰੰਤ ਕਾਨੂੰਨੀ ਕਾਰਵਾਈ ਇਸ ਲਈ ਨਹੀਂ ਕੀਤੀ ਕਿਉਂਕਿ ਏਜੰਸੀ ਨਵੀਂ ਸੀ ਅਤੇ ਨਵੀਆਂ ਏਜੰਸੀਆਂ ਨੂੰ ਪਹਿਲਾਂ ਸਹਿਯੋਗ ਦੇ ਕੇ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣਾ ਉਸ ਦੀ ਪਹੁੰਚ ਰਹੀ ਹੈ। ਇਸ ਸਮੇਂ ਦੌਰਾਨ ਅਥਾਰਟੀ ਨੂੰ ਵਨ ਅੱਪ ਰਿਐਲਟੀ ਖ਼ਿਲਾਫ਼ ਕੋਈ ਸ਼ਿਕਾਇਤ ਨਹੀਂ ਮਿਲੀ ਅਤੇ ਨਾ ਹੀ ਕੋਈ ਹੋਰ ਪਾਲਣਾ-ਸਬੰਧੀ ਚਿੰਤਾ ਸਾਹਮਣੇ ਆਈ।
ਅਥਾਰਟੀ ਮੁਤਾਬਕ, ਏਜੰਸੀ ਨੇ ਆਡੀਟਰ ਨਿਯੁਕਤ ਕਰਨ ਲਈ ਕਈ ਵਾਰ ਕੋਸ਼ਿਸ਼ਾਂ ਕੀਤੀਆਂ ਸਨ, ਪਰ ਉਹ ਸਫਲ ਨਹੀਂ ਹੋ ਸਕੀ। ਬਾਅਦ ਵਿੱਚ ਜਦੋਂ ਪਿਛਲੇ ਸਮੇਂ ਦਾ ਆਡਿਟ ਕਰਵਾਇਆ ਗਿਆ ਤਾਂ ਟਰੱਸਟ ਫੰਡਾਂ ਦੀ ਸੰਭਾਲ ਵਿੱਚ ਕੋਈ ਬੇਨਿਯਮਤਾ ਨਹੀਂ ਮਿਲੀ।
ਪਿਛਲੇ ਮਹੀਨੇ ਏਜੰਸੀ ਨੇ ਰੀਅਲ ਅਸਟੇਟ ਏਜੰਟਸ ਐਕਟ 2008 ਦੀ ਲਾਪਰਵਾਹੀ ਨਾਲ ਉਲੰਘਣਾ ਕਰਨ ਦੇ ਦੋਸ਼ ਨੂੰ ਸਵੀਕਾਰ ਕਰ ਲਿਆ, ਜਿਸ ਤੋਂ ਬਾਅਦ ਟ੍ਰਿਬਿਊਨਲ ਨੇ $18,000 ਦਾ ਜੁਰਮਾਨਾ ਲਗਾਇਆ।
ਰੀਅਲ ਅਸਟੇਟ ਅਥਾਰਟੀ ਦੀ ਮੁੱਖ ਕਾਰਜਕਾਰੀ ਬੇਲਿੰਡਾ ਮੌਫਟ ਨੇ ਕਿਹਾ ਕਿ ਇਹ ਮਾਮਲਾ ਰੀਅਲ ਅਸਟੇਟ ਕੰਪਨੀਆਂ ਲਈ ਟਰੱਸਟ ਅਕਾਊਂਟ ਆਡਿਟ ਨਿਯਮਾਂ ਦੀ ਪਾਲਣਾ ਦੀ ਮਹੱਤਤਾ ਨੂੰ ਦਰਸਾਉਂਦਾ ਹੈ।
ਉਨ੍ਹਾਂ ਕਿਹਾ ਕਿ ਰੀਅਲ ਅਸਟੇਟ ਏਜੰਸੀਆਂ ਜਾਇਦਾਦੀ ਲੈਣ-ਦੇਣਾਂ ਦੌਰਾਨ ਗਾਹਕਾਂ ਅਤੇ ਖਪਤਕਾਰਾਂ ਦੀ ਵੱਡੀ ਰਕਮ ਸੰਭਾਲਦੀਆਂ ਹਨ। ਟਰੱਸਟ ਅਕਾਊਂਟ ਨਾਲ ਸਬੰਧਤ ਨਿਯਮ ਗਾਹਕਾਂ ਅਤੇ ਉਨ੍ਹਾਂ ਦੇ ਪੈਸੇ ਦੀ ਸੁਰੱਖਿਆ ਲਈ ਬਣਾਏ ਗਏ ਹਨ।
ਮੌਫਟ ਨੇ ਕਿਹਾ ਕਿ ਜੇਕਰ ਟਰੱਸਟ ਅਕਾਊਂਟ ਸਹੀ ਢੰਗ ਨਾਲ ਨਾ ਸੰਭਾਲੇ ਜਾਣ ਤਾਂ ਖਪਤਕਾਰਾਂ ਨੂੰ ਵਿੱਤੀ ਨੁਕਸਾਨ, ਏਜੰਸੀ ਦੀ ਸਾਖ ਨੂੰ ਨੁਕਸਾਨ ਅਤੇ ਪੂਰੇ ਰੀਅਲ ਅਸਟੇਟ ਖੇਤਰ ’ਤੇ ਭਰੋਸੇ ਵਿੱਚ ਕਮੀ ਆ ਸਕਦੀ ਹੈ।
ਉਨ੍ਹਾਂ ਕਿਹਾ ਕਿ ਟਰੱਸਟ ਅਕਾਊਂਟ ਨਾਲ ਸਬੰਧਤ ਆਡਿਟ ਨਿਯਮਾਂ ਦੀ ਉਲੰਘਣਾ ਗੰਭੀਰ ਮਾਮਲਾ ਹੈ ਅਤੇ ਇਸ ਦੇ ਖਪਤਕਾਰਾਂ ’ਤੇ ਮਹੱਤਵਪੂਰਨ ਪ੍ਰਭਾਵ ਪੈ ਸਕਦੇ ਹਨ। ਏਜੰਸੀਆਂ ਦੇ ਸਿਸਟਮ ਅਤੇ ਕਾਰਜ-ਪ੍ਰਣਾਲੀਆਂ ਪੂਰੀ ਤਰ੍ਹਾਂ ਕਾਨੂੰਨੀ ਨਿਯਮਾਂ ਦੇ ਅਨੁਕੂਲ ਹੋਣੀਆਂ ਚਾਹੀਦੀਆਂ ਹਨ ਅਤੇ ਕੰਪਨੀ ਦੇ ਅਧਿਕਾਰੀ ਇਸ ਦੀ ਪਾਲਣਾ ਲਈ ਜ਼ਿੰਮੇਵਾਰ ਹਨ।
ਫਿਲਹਾਲ ਵਨ ਅੱਪ ਰਿਐਲਟੀ ਵੱਲੋਂ ਇਸ ਮਸਲੇ ‘ਤੇ ਕੋਈ ਟਿੱਪਣੀ ਨਹੀਂ ਕੀਤੀ ਗਈ ਹੈ।