Auckland ਦੇ ਇੱਕ ਘਰ ਤੋਂ ਚੋਰੀ ਕੀਤਾ ਗਿਆ ਗੈਸ ਹੀਟਿੰਗ ਸਮਾਨ ਅਤੇ LPG ਗੈਸ ਸਿਲੰਡਰਾਂ ਦਾ ਵੱਡਾ ਜਖੀਰਾ ਬਰਾਮਦ ਹੋਣ ਤੋਂ ਬਾਅਦ ਇੱਕ ਔਰਤ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਡਿਟੈਕਟਿਵ ਸੀਨੀਅਰ ਸਰਜੈਂਟ Natalie Nelson ਨੇ ਦੱਸਿਆ ਕਿ ਪੁਲਿਸ ਨੂੰ ਸ਼ੱਕ ਸੀ ਕਿ ਹਾਲ ਹੀ ਵਿੱਚ ਹੋਈ ਚੋਰੀ ਦਾ ਸਮਾਨ Papakura ਵਿੱਚ ਇੱਕ ਜਾਇਦਾਦ ‘ਤੇ ਰੱਖਿਆ ਗਿਆ ਹੈ। ਉਨ੍ਹਾਂ ਨੇ ਕਿਹਾ, “ਬੁੱਧਵਾਰ ਨੂੰ Counties Manukau South Tactical Crime Unit ਨੇ Arimu Road ਸਥਿਤ ਇਕ ਪਤੇ ‘ਤੇ ਤਲਾਸ਼ੀ ਵਾਰੰਟ ਤਹਿਤ ਕਾਰਵਾਈ ਕੀਤੀ ਅਤੇ ਉੱਥੋਂ ਕਈ ਚੋਰੀ ਕੀਤੀਆਂ ਵਸਤਾਂ ਬਰਾਮਦ ਕੀਤੀਆਂ।”
ਬਰਾਮਦ ਸਮਾਨ ਵਿੱਚ ਅੱਠ ਗੈਸ ਕੈਲੀਫੋਂਟ (ਛੋਟੇ ਪਾਣੀ ਗਰਮ ਕਰਨ ਵਾਲੇ ਸਿਸਟਮ) ਅਤੇ ਕਈ 45 ਕਿਲੋਗ੍ਰਾਮ ਵਾਲੇ LPG ਗੈਸ ਸਿਲੰਡਰ ਸ਼ਾਮਿਲ ਸਨ। ਪੁਲਿਸ ਮੁਤਾਬਿਕ ਮੌਕੇ ‘ਤੇ ਮੌਜੂਦ 44 ਸਾਲਾ ਔਰਤ ਨੂੰ ਬਿਨਾਂ ਕਿਸੇ ਵਿਰੋਧ ਦੇ ਗ੍ਰਿਫ਼ਤਾਰ ਕਰ ਲਿਆ ਗਿਆ। ਉਸ ਨੂੰ ਚੋਰੀ ਦੇ ਮਾਮਲੇ ਵਿੱਚ 28 ਮਈ ਨੂੰ Papakura District Court ਵਿੱਚ ਪੇਸ਼ ਕੀਤਾ ਜਾਵੇਗਾ। ਬਰਾਮਦ ਕੀਤੇ ਗਏ ਅੱਠ ਵਿੱਚੋਂ ਪੰਜ ਗੈਸ ਕੈਲੀਫੋਂਟਾਂ ਨੂੰ ਪਾਪਾਕੁਰਾ ਵਿੱਚ ਹੋਈ ਚੋਰੀ ਨਾਲ ਜੋੜਿਆ ਗਿਆ ਹੈ, ਕਿਉਂਕਿ ਮਾਲਕ ਨੇ ਉਨ੍ਹਾਂ ਦੇ ਸੀਰੀਅਲ ਨੰਬਰ ਦਰਜ ਕਰਕੇ ਰੱਖੇ ਹੋਏ ਸਨ। ਪੁਲਿਸ ਹੁਣ ਬਾਕੀ ਸਮਾਨ ਦੇ ਮਾਲਕਾਂ ਦੀ ਪਹਿਚਾਣ ਕਰਨ ਵਿੱਚ ਜੁਟੀ ਹੋਈ ਹੈ।
ਡਿਟੈਕਟਿਵ ਸੀਨੀਅਰ ਸਰਜੈਂਟ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੇ ਕੀਮਤੀ ਸਮਾਨ ਅਤੇ ਔਜ਼ਾਰਾਂ ਦੇ ਸੀਰੀਅਲ ਨੰਬਰ ਸੰਭਾਲ ਕੇ ਰੱਖਣ ਜਾਂ ਉਨ੍ਹਾਂ ‘ਤੇ ਆਪਣੀ ਪਹਿਚਾਣ ਵਾਲਾ ਨਿਸ਼ਾਨ ਲਗਾਉਣ। ਉਨ੍ਹਾਂ ਨੇ ਕਿਹਾ, “ਜੇ ਸਮਾਨ ਚੋਰੀ ਹੋ ਜਾਵੇ ਤਾਂ ਇਸ ਨਾਲ ਪੁਲਿਸ ਨੂੰ ਉਹ ਵਾਪਸ ਲੱਭ ਕੇ ਅਸਲੀ ਮਾਲਕ ਤੱਕ ਪਹੁੰਚਾਉਣ ਵਿੱਚ ਮਦਦ ਮਿਲਦੀ ਹੈ।”