Otara-Papatoetoe Local Board ਚੋਣਾਂ ਨਾਲ ਜੁੜੀ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਦਰਅਸਲ ਇਹ ਰੇੜਕਾ ਮੁੱਕਣ ਦਾ ਨਾਂਮ ਨਹੀਂ ਲੈ ਰਿਹਾ ਹੁਣ Papatoetoe Otara Action Team ਨੇ ਕਿਹਾ ਹੈ ਕਿ ਅਕਤੂਬਰ 2025 ਵਿੱਚ Papatoetoe ਸਬਡਿਵਿਜ਼ਨ ਤੋਂ ਚੁਣੇ ਗਏ ਚਾਰ ਮੈਂਬਰਾਂ ਦੀ ਚੋਣ ਨੂੰ District Court ਵੱਲੋਂ 16 ਦਸੰਬਰ 2025 ਨੂੰ ਰੱਦ ਕਰ ਦਿੱਤਾ ਗਿਆ ਸੀ, ਜਿਸ ਤੋਂ ਬਾਅਦ ਮਾਰਚ 2026 ਵਿੱਚ ਉਪ ਚੋਣ ਹੋਣੀ ਹੈ। ਟੀਮ ਨੇ ਕਿਹਾ ਕਿ ਇਹ ਅਦਾਲਤੀ ਫੈਸਲਾ ਗੰਭੀਰ ਅਤੇ ਗੁੰਝਲਦਾਰ ਹੈ ਅਤੇ ਇਸਦੀ ਕਾਨੂੰਨੀ ਸਲਾਹਕਾਰਾਂ ਨਾਲ ਧਿਆਨ ਨਾਲ ਸਮੀਖਿਆ ਕੀਤੀ ਗਈ। ਜਾਰੀ ਬਿਆਨ ‘ਚ ਅੱਗੇ ਕਿਹਾ ਗਿਆ ਕਿ Papatoetoe Otara Action Team ਦੇ ਉਮੀਦਵਾਰ District Court ਦੀ ਕਾਰਵਾਈ ਦਾ ਹਿੱਸਾ ਨਹੀਂ ਸਨ, ਇਸ ਲਈ ਉਨ੍ਹਾਂ ਨੂੰ ਉਥੇ ਆਪਣਾ ਪੱਖ ਰੱਖਣ ਦਾ ਮੌਕਾ ਨਹੀਂ ਮਿਲਿਆ।
District Court ਨੇ ਕਿਹਾ ਕਿ 79 ਬੈਲਟ ਪੇਪਰ (ਕੁੱਲ ਵੋਟਾਂ ਦਾ ਲਗਭਗ 0.7%) ਗਲਤ ਤਰੀਕੇ ਨਾਲ ਵਰਤੇ ਗਏ। ਪਰ ਦੂਜੇ ਪਾਸੇ ਟੀਮ ਨੇ ਕਿਹਾ ਕਿ ਕਿਸੇ ਵੀ ਉਮੀਦਵਾਰ ਜਾਂ ਟੀਮ ਖ਼ਿਲਾਫ਼ ਕੋਈ ਗਲਤ ਜਾਣਕਾਰੀ ਨਹੀਂ ਮਿਲੀ ਸੀ। ਇਸੇ ਕਾਰਨ ਹੁਣ ਇਹ ਮਾਮਲਾ High Court ‘ਚ ਵੀ ਪਹੁੰਚ ਗਿਆ ਹੈ। ਟੀਮ ਨੇ ਅਰਜ਼ੀ ਦਾਇਰ ਕਰਦਿਆਂ ਦਲੀਲ ਦਿੱਤੀ ਹੈ ਕਿ District Court ਅੱਗੇ ਰੱਖਿਆ ਕੇਸ ਚੋਣ ਰੱਦ ਕਰਨ ਲਈ ਲੋੜੀਂਦੇ ਉੱਚ ਕਾਨੂੰਨੀ ਅਤੇ ਤੱਥਾਤਮਕ ਮਾਪਦੰਡਾਂ ‘ਤੇ ਖਰਾ ਨਹੀਂ ਉਤਰਦਾ। ਟੀਮ ਨੇ ਤੁਰੰਤ ਸੁਣਵਾਈ ਦੀ ਮੰਗ ਕੀਤੀ ਹੈ, ਕਿਉਂਕਿ ਜੇ ਫੈਸਲਾ ਰੱਦ ਹੁੰਦਾ ਹੈ ਤਾਂ ਮਾਰਚ ਵਿੱਚ ਉਪ ਚੋਣ ਨਾ ਹੋਣ ਦੀ ਸੰਭਾਵਨਾ ਬਣ ਸਕਦੀ ਹੈ।
ਜੇ ਉਪ ਚੋਣ ਹੁੰਦੀ ਹੈ, ਤਾਂ ਟੀਮ ਦੇ ਸਾਰੇ ਚਾਰ ਉਮੀਦਵਾਰ ਮੁਕਾਬਲਾ ਕਰਨਗੇ। ਟੀਮ ਨੇ ਕਿਹਾ ਕਿ ਨਤੀਜੇ ਜੋ ਵੀ ਹੋਣ, Papatoetoe ਦੇ ਵੋਟਰਾਂ ਨੂੰ ਦੁਬਾਰਾ ਆਜ਼ਾਦ ਅਤੇ ਨਿਆਯਪੂਰਨ ਚੋਣ ਦਾ ਮੌਕਾ ਮਿਲਣਾ ਚਾਹੀਦਾ ਹੈ। ਟੀਮ ਨੇ ਗਲਤ ਜਾਣਕਾਰੀਆਂ ਅਤੇ ਅਟਕਲਾਂ ‘ਤੇ ਚਿੰਤਾ ਜਤਾਈ, ਖ਼ਾਸ ਕਰਕੇ ਨਸਲੀ ਤੌਰ ‘ਤੇ ਪ੍ਰੇਰਿਤ ਟਿੱਪਣੀਆਂ ‘ਤੇ। ਲੋਕਾਂ ਨੂੰ ਅਪੀਲ ਕੀਤੀ ਗਈ ਕਿ ਕਾਨੂੰਨੀ ਪ੍ਰਕਿਰਿਆ ਨੂੰ ਆਪਣਾ ਕੰਮ ਕਰਨ ਦਿੱਤਾ ਜਾਵੇ ਅਤੇ ਬਿਨਾਂ ਆਧਾਰ ਨਤੀਜੇ ਨਾ ਕੱਢੇ ਜਾਣ।