ਨਿਊਜ਼ੀਲੈਂਡ ਵਿੱਚ ਇੱਕ ਫਾਰਮਾਸਿਸਟ ਨੂੰ ਉਸ ਵੇਲੇ ਅਨੁਸ਼ਾਸਨਾਤਮਕ ਕਾਰਵਾਈ ਦਾ ਸਾਹਮਣਾ ਕਰਨਾ ਪਿਆ ਜਦੋਂ ਹੈਲਥ ਨਿਊਜ਼ੀਲੈਂਡ ਵੱਲੋਂ ਕੀਤੀਆਂ ਗਈਆਂ 49 ਹਜ਼ਾਰ ਡਾਲਰ ਤੋਂ ਵੱਧ ਦੀਆਂ ਅਦਾਇਗੀਆਂ ਗਲਤੀ ਨਾਲ ਉਸਦੇ ਨਿੱਜੀ ਬੈਂਕ ਖਾਤੇ ਵਿੱਚ ਜਮ੍ਹਾਂ ਹੋ ਗਈਆਂ। Health Practitioners Disciplinary Tribunal ਨੇ ਮੁਰਾਦ ਅਲ ਗੈਲਾਨੀ ਨੂੰ ਰਸਮੀ ਤੌਰ ’ਤੇ ਸੈਂਸਰ ਕਰਦਿਆਂ ਉਸਦੇ ਵਿਵਹਾਰ ਨੂੰ ਪੇਸ਼ੇਵਰ ਦੁਰਵਿਹਾਰ ਕਰਾਰ ਦਿੱਤਾ ਹੈ। ਟ੍ਰਿਬਿਊਨਲ ਅਨੁਸਾਰ ਅਗਸਤ 2022 ਤੋਂ ਜੁਲਾਈ 2023 ਦਰਮਿਆਨ ਕੁੱਲ 49,343 ਡਾਲਰ ਤੋਂ ਵੱਧ ਦੀ ਰਕਮ ਅਲ ਗੈਲਾਨੀ ਦੇ ਨਿੱਜੀ ਖਾਤੇ ਵਿੱਚ ਟਰਾਂਸਫਰ ਹੋਈ। ਇਹ ਰਕਮ ਅਸਲ ਵਿੱਚ Totem Pharmacy Group ਨੂੰ ਮਿਲਣੀ ਸੀ, ਜੋ ਹੈਲਥ ਨਿਊਜ਼ੀਲੈਂਡ ਨਾਲ ਹੋਏ ਇਕ ਸਮਝੌਤੇ ਤਹਿਤ ਸਿਹਤ ਸੇਵਾਵਾਂ ਪ੍ਰਦਾਨ ਕਰ ਰਹੀ ਸੀ।
ਮਾਮਲਾ ਉਸ ਸਮੇਂ ਸਾਹਮਣੇ ਆਇਆ ਜਦੋਂ ਫਾਰਮੇਸੀ ਮਾਲਕ ਕੰਪਨੀ ਨੇ ਉਮੀਦ ਅਨੁਸਾਰ ਭੁਗਤਾਨ ਨਾ ਮਿਲਣ ਬਾਰੇ ਪੁੱਛਗਿੱਛ ਕੀਤੀ। ਜਾਂਚ ਦੌਰਾਨ ਪਤਾ ਲੱਗਾ ਕਿ ਰਜਿਸਟ੍ਰੇਸ਼ਨ ਦਸਤਾਵੇਜ਼ਾਂ ਵਿੱਚ ਗਲਤੀ ਕਾਰਨ ਅਦਾਇਗੀਆਂ ਅਲ ਗੈਲਾਨੀ ਦੇ ਖਾਤੇ ਵਿੱਚ ਜਾ ਰਹੀਆਂ ਸਨ। ਇਸ ਦੌਰਾਨ ਉਹ ਆਸਟ੍ਰੇਲੀਆ ਚਲਾ ਗਿਆ ਸੀ। ਭਾਵੇਂ ਫਾਰਮਾਸਿਸਟ ਨੇ ਬਾਅਦ ਵਿੱਚ ਸਾਰੀ ਰਕਮ ਵਾਪਸ ਕਰ ਦਿੱਤੀ ਅਤੇ ਦਾਅਵਾ ਕੀਤਾ ਕਿ ਉਸਨੇ ਇਸ ਵਿੱਚੋਂ ਕੋਈ ਪੈਸਾ ਖਰਚ ਨਹੀਂ ਕੀਤਾ, ਫਿਰ ਵੀ ਉਸ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਹੋਈ। ਅਦਾਲਤ ਨੇ ਉਸਨੂੰ ਧੋਖਾਧੜੀ ਰਾਹੀਂ ਰਕਮ ਪ੍ਰਾਪਤ ਕਰਨ ਦਾ ਦੋਸ਼ੀ ਮੰਨਦਿਆਂ ਛੇ ਮਹੀਨੇ ਦੀ ਕਮਿਊਨਟੀ ਡਿਟੈਨਸ਼ਨ ਅਤੇ ਨਿਗਰਾਨੀ ਦੀ ਸਜ਼ਾ ਸੁਣਾਈ ਸੀ, ਜੋ ਉਹ ਪੂਰੀ ਕਰ ਚੁੱਕਾ ਹੈ।
ਸੁਣਵਾਈ ਦੌਰਾਨ ਅਲ ਗੈਲਾਨੀ ਨੇ ਕਿਹਾ ਕਿ ਉਹ ਇਹ ਭੁਗਤਾਨ ਕੋਵਿਡ-19 ਦੌਰਾਨ ਕੀਤੀਆਂ ਸੇਵਾਵਾਂ ਦਾ ਮੁਆਵਜ਼ਾ ਸਮਝਦਾ ਸੀ। ਹਾਲਾਂਕਿ ਟ੍ਰਿਬਿਊਨਲ ਨੇ ਇਸ ਦਲੀਲ ਨੂੰ ਸਵੀਕਾਰ ਨਹੀਂ ਕੀਤਾ ਅਤੇ ਕਿਹਾ ਕਿ ਇਹ ਭੁਗਤਾਨ ਮਹਾਮਾਰੀ ਦੇ ਖਤਮ ਹੋਣ ਤੋਂ ਕਾਫ਼ੀ ਬਾਅਦ ਤੱਕ ਜਾਰੀ ਰਹੇ ਸਨ। ਟ੍ਰਿਬਿਊਨਲ ਨੇ ਕਿਹਾ ਕਿ ਜਿਸ ਰਕਮ ਦਾ ਉਹ ਹੱਕਦਾਰ ਨਹੀਂ ਸੀ, ਉਸਨੂੰ ਸਵੀਕਾਰ ਕਰਨਾ ਬੇਈਮਾਨੀ ਦੇ ਦਾਇਰੇ ਵਿੱਚ ਆਉਂਦਾ ਹੈ ਅਤੇ ਇਸ ਨਾਲ ਫਾਰਮੇਸੀ ਪੇਸ਼ੇ ਦੀ ਸਾਖ ਨੂੰ ਨੁਕਸਾਨ ਪਹੁੰਚਿਆ ਹੈ। ਹਾਲਾਂਕਿ ਮੁਅੱਤਲੀ ਦੀ ਮੰਗ ਕੀਤੀ ਗਈ ਸੀ, ਪਰ ਟ੍ਰਿਬਿਊਨਲ ਨੇ ਇਹ ਮੰਗ ਰੱਦ ਕਰ ਦਿੱਤੀ ਕਿਉਂਕਿ ਉਹ ਪਹਿਲਾਂ ਹੀ ਆਪਣੀ ਅਦਾਲਤੀ ਸਜ਼ਾ ਦੌਰਾਨ ਕੰਮ ਤੋਂ ਦੂਰ ਰਹਿ ਚੁੱਕਾ ਸੀ।
ਫੈਸਲੇ ਮੁਤਾਬਿਕ ਜੇਕਰ ਅਲ ਗੈਲਾਨੀ ਅਗਲੇ ਤਿੰਨ ਸਾਲਾਂ ਦੌਰਾਨ ਨਿਊਜ਼ੀਲੈਂਡ ਵਿੱਚ ਮੁੜ ਪ੍ਰੈਕਟਿਸ ਕਰਦਾ ਹੈ ਤਾਂ ਉਸਨੂੰ ਹਰ ਸੰਭਾਵੀ ਨਿਯੋਗਕਰਤਾ ਨੂੰ ਇਸ ਮਾਮਲੇ ਅਤੇ ਸਜ਼ਾ ਬਾਰੇ ਜਾਣਕਾਰੀ ਦੇਣੀ ਪਵੇਗੀ। ਇਸ ਤੋਂ ਇਲਾਵਾ ਉਸਨੂੰ 17 ਹਜ਼ਾਰ ਡਾਲਰ ਤੋਂ ਵੱਧ ਦੇ ਖਰਚੇ ਵੀ ਅਦਾ ਕਰਨੇ ਹੋਣਗੇ।
ਟ੍ਰਿਬਿਊਨਲ ਨੇ ਇਹ ਵੀ ਨੋਟ ਕੀਤਾ ਕਿ ਅਲ ਗੈਲਾਨੀ ਇਸ ਸਮੇਂ ਆਸਟ੍ਰੇਲੀਆ ਵਿੱਚ ਰਜਿਸਟਰਡ ਫਾਰਮਾਸਿਸਟ ਵਜੋਂ ਕੰਮ ਕਰ ਰਿਹਾ ਹੈ ਅਤੇ ਉੱਥੋਂ ਦੇ ਸਿਹਤ ਨਿਯੰਤਰਕ ਇਸ ਮਾਮਲੇ ਬਾਰੇ ਜਾਣੂ ਹਨ। ਉਸਦੇ ਹੱਕ ਵਿੱਚ ਪੇਸ਼ ਕੀਤੇ ਗਏ ਚਰਿੱਤਰ ਪ੍ਰਮਾਣ ਪੱਤਰਾਂ ਵਿੱਚ ਉਸਨੂੰ ਮਿਹਨਤੀ, ਯੋਗ ਅਤੇ ਸਮਾਜ ਸੇਵਾ ਲਈ ਸਮਰਪਿਤ ਵਿਅਕਤੀ ਵਜੋਂ ਦਰਸਾਇਆ ਗਿਆ, ਜਦਕਿ ਉਸਨੇ ਆਪਣੇ ਵਿਵਹਾਰ ਲਈ ਡੂੰਘਾ ਪਛਤਾਵਾ ਵੀ ਜਤਾਇਆ ਹੈ।