ਮੁੰਬਈ ਤੋਂ ਸਾਇਬਰ ਠੱਗੀ ਦਾ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ 78 ਸਾਲ ਦੀ ਇੱਕ ਮਹਿਲਾ ਨੂੰ ਠੱਗਾਂ ਨੇ ਨਿਸ਼ਾਨਾ ਬਣਾਕੇ ਉਸਦੇ ਖਾਤੇ ਵਿਚੋਂ ਕਰੀਬ 25 ਲੱਖ ਰੁਪਏ ਉਡਾ ਲਏ।
ਪੁਲਿਸ ਮੁਤਾਬਕ ਠੱਗਾਂ ਨੇ ਵਟਸਐਪ ਰਾਹੀਂ ਮਹਿਲਾ ਨਾਲ ਸੰਪਰਕ ਕੀਤਾ ਅਤੇ ਇੱਕ ਫਾਈਲ ਡਾਊਨਲੋਡ ਕਰਨ ਲਈ ਕਿਹਾ। ਮਹਿਲਾ ਨੂੰ ਸਿਰਫ 13 ਰੁਪਏ ਦੀ ਭੁਗਤਾਨ ਕਰਨ ਲਈ ਕਿਹਾ ਗਿਆ, ਪਰ ਜਿਵੇਂ ਹੀ ਉਸ ਨੇ ਦਿੱਤੀ ਗਈ APK ਫਾਈਲ ਡਾਊਨਲੋਡ ਕੀਤੀ, ਠੱਗਾਂ ਨੂੰ ਉਸਦੇ ਫੋਨ ਦਾ ਐਕਸੈਸ ਮਿਲ ਗਿਆ।
ਜਾਣਕਾਰੀ ਅਨੁਸਾਰ ਮਹਿਲਾ ਨੂੰ ਇੱਕ ਅਣਜਾਣ ਵਿਅਕਤੀ ਨੇ ਕਾਲ ਕਰਕੇ ਆਪਣੇ ਆਪ ਨੂੰ ਬਿਜਲੀ ਵਿਭਾਗ ਦਾ ਕਰਮਚਾਰੀ ਦੱਸਿਆ ਅਤੇ ਕਿਹਾ ਕਿ ਕਨੈਕਸ਼ਨ ‘ਤੇ ਨਾਮ ਅਪਡੇਟ ਕਰਨ ਲਈ ਛੋਟੀ ਜਿਹੀ ਫੀਸ ਦੇਣੀ ਪਵੇਗੀ। ਫਾਈਲ ਡਾਊਨਲੋਡ ਕਰਨ ਤੋਂ ਬਾਅਦ ਠੱਗਾਂ ਨੇ ਮਹਿਲਾ ਤੋਂ ਬੈਂਕ ਅਤੇ ਕਰੈਡਿਟ ਕਾਰਡ ਦੀ ਜਾਣਕਾਰੀ ਵੀ ਲੈ ਲਈ।
ਇਸ ਤੋਂ ਬਾਅਦ ਉਸਦੇ ਖਾਤੇ ਵਿਚੋਂ ਲਗਾਤਾਰ ਰਕਮ ਕੱਟੀ ਗਈ ਅਤੇ ਕੁੱਲ ਮਿਲਾਕੇ 25 ਲੱਖ ਰੁਪਏ ਦੀ ਠੱਗੀ ਹੋ ਗਈ। ਮੈਸੇਜ ਆਉਣ ‘ਤੇ ਮਹਿਲਾ ਨੂੰ ਠੱਗੀ ਦਾ ਪਤਾ ਲੱਗਾ ਅਤੇ ਉਸ ਨੇ ਪੁਲਿਸ ਵਿੱਚ ਸ਼ਿਕਾਇਤ ਦਰਜ ਕਰਵਾ ਦਿੱਤੀ।
ਸਾਇਬਰ ਠੱਗੀ ਤੋਂ ਬਚਣ ਲਈ ਧਿਆਨਯੋਗ ਗੱਲਾਂ:
ਅਣਜਾਣ ਨੰਬਰਾਂ ਤੋਂ ਆਏ ਲਿੰਕ ਜਾਂ ਫਾਈਲ ਕਦੇ ਵੀ ਡਾਊਨਲੋਡ ਨਾ ਕਰੋ
ਕਿਸੇ ਨਾਲ ਵੀ ਆਪਣਾ OTP ਜਾਂ ਬੈਂਕ ਡੀਟੇਲਸ ਸਾਂਝੇ ਨਾ ਕਰੋ
ਵਟਸਐਪ ਜਾਂ ਥਰਡ ਪਾਰਟੀ ਤੋਂ ਆਈਆਂ ਐਪਸ ਤੋਂ ਸਾਵਧਾਨ ਰਹੋ
ਫਰਜ਼ੀ ਕਾਲਾਂ, SMS ਜਾਂ ਈਮੇਲ ‘ਤੇ ਤੁਰੰਤ ਭਰੋਸਾ ਨਾ ਕਰੋ
ਕੋਈ ਵੀ ਸ਼ੱਕੀ ਗੱਲ ਹੋਵੇ ਤਾਂ ਪਹਿਲਾਂ ਜਾਂਚ ਕਰੋ
ਮਾਹਿਰਾਂ ਦਾ ਕਹਿਣਾ ਹੈ ਕਿ ਸਾਇਬਰ ਠੱਗ ਨਵੇਂ-ਨਵੇਂ ਤਰੀਕਿਆਂ ਨਾਲ ਲੋਕਾਂ ਨੂੰ ਨਿਸ਼ਾਨਾ ਬਣਾਉਂਦੇ ਹਨ, ਇਸ ਲਈ ਜਾਗਰੂਕ ਰਹਿਣਾ ਹੀ ਸਭ ਤੋਂ ਵੱਡੀ ਸੁਰੱਖਿਆ ਹੈ।