ਨਿਊਜ਼ੀਲੈਂਡ ਵਾਸੀਆਂ ਲਈ ਇੱਕ ਅਹਿਮ ਖ਼ਬਰ ਸਾਹਮਣੇ ਆਈ ਹੈ। ਦਰਅਸਲ ਨਿਊਜ਼ੀਲੈਂਡ ਪੁਲਿਸ ਵੱਲੋਂ ਕਰੰਸੀ ਨੂੰ ਲੈ ਕੇ ਇੱਕ ਚਿਤਾਵਨੀ ਜਾਰੀ ਕੀਤੀ ਗਈ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਦੇਸ਼ ਭਰ ਵਿੱਚ ਨਕਲੀ $50 ਅਤੇ $100 ਦੇ ਨੋਟ ਚਲਾਏ ਜਾਣ ਦੀਆਂ ਸ਼ਿਕਾਇਤਾਂ ਵੱਧ ਰਹੀਆਂ ਹਨ ਜਿਸ ਕਾਰਨ ਲੋਕਾਂ ਨੂੰ ਸਾਵਧਾਨ ਰਹਿਣ ਦੀ ਜ਼ਰੂਰਤ ਹੈ। ਖ਼ਾਸ ਤੌਰ ’ਤੇ ਰੀਟੇਲ ਅਤੇ ਹੋਟਲ-ਰੇਸਟੋਰੈਂਟ ਸੈਕਟਰ ਵਿੱਚ ਕੰਮ ਕਰਨ ਵਾਲੇ ਕਰਮਚਾਰੀ ਸਭ ਤੋਂ ਵੱਧ ਖ਼ਤਰੇ ਵਿੱਚ ਹਨ ਕਿਉਂਕਿ ਉਹ ਬਿਨਾਂ ਜਾਣੇ ਨਕਲੀ ਨੋਟ ਲੈ ਸਕਦੇ ਹਨ।
ਰਿਜ਼ਰਵ ਬੈਂਕ ਆਫ਼ ਨਿਊਜ਼ੀਲੈਂਡ ਨੇ ਅਸਲੀ ਨੋਟਾਂ ਦੀ ਪਛਾਣ ਲਈ “Look–Feel–Tilt” ਟੈਸਟ ਵਰਤਣ ਦੀ ਸਿਫ਼ਾਰਸ਼ ਕੀਤੀ ਹੈ। ਅਸਲੀ ਨੋਟ ਵਿੱਚ ਹੋਲੋਗ੍ਰਾਫ਼ਿਕ ਵਿੰਡੋ ਹੁੰਦੀ ਹੈ, ਜਿਸ ਵਿੱਚ ਪੰਛੀ ਦੀ ਆਕ੍ਰਿਤੀ, ਨਿਊਜ਼ੀਲੈਂਡ ਦਾ ਨਕਸ਼ਾ ਅਤੇ 3D ਅੰਕ ਦਿਖਾਈ ਦਿੰਦਾ ਹੈ। ਇਸਦੇ ਨਾਲ ਹੀ “Reserve Bank of New Zealand Te Pūtea Matua” ਲਿਖਤ ਉਭਰੀ ਹੋਈ ਸਿਆਹੀ ਵਿੱਚ ਹੁੰਦੀ ਹੈ ਅਤੇ ਨੋਟ ਨੂੰ ਝੁਕਾਉਣ ’ਤੇ ਰੌਸ਼ਨੀ ਦੀ ਲਹਿਰ ਅਤੇ ਰੰਗ ਬਦਲਣ ਵਾਲਾ ਪ੍ਰਭਾਵ ਨਜ਼ਰ ਆਉਂਦਾ ਹੈ। ਪੁਲਿਸ ਨੇ ਕਿਹਾ ਹੈ ਕਿ ਜੇ ਕਿਸੇ ਨੂੰ ਨਕਲੀ ਨੋਟ ਮਿਲਣ ਦਾ ਸ਼ੱਕ ਹੋਵੇ, ਤਾਂ ਤੁਰੰਤ ਇਸਦੀ ਸੂਚਨਾ ਪੁਲਿਸ ਨੂੰ ਦਿੱਤੀ ਜਾਵੇ। ਦੱਸ ਦੇਈਏ ਨਕਲੀ ਕਰੰਸੀ ਤਿਆਰ ਕਰਨਾ ਜਾਂ ਜਾਣਬੁੱਝ ਕੇ ਵਰਤਣਾ ਕਾਨੂੰਨੀ ਜੁਰਮ ਹੈ। ਕਾਨੂੰਨ ਅਨੁਸਾਰ, ਨਕਲੀ ਨੋਟ ਰੱਖਣ ’ਤੇ 7 ਸਾਲ ਤੱਕ ਕੈਦ ਹੋ ਸਕਦੀ ਹੈ, ਜਦਕਿ ਉਸਨੂੰ ਵਰਤਣ ’ਤੇ 10 ਸਾਲ ਤੱਕ ਦੀ ਸਜ਼ਾ ਹੋ ਸਕਦੀ ਹੈ।