ਨਿਊਜ਼ੀਲੈਂਡ ਦੇ ਵੱਖੋ-ਵੱਖ ਵਿਭਾਗਾਂ ਦੇ ਵਿੱਚ ਕਈ ਪੰਜਾਬੀ ਦੀ ਪਿਛਲੇ ਕਈ ਸਾਲਾਂ ਤੋਂ ਜੀਜਾਨ ਨਾਲ ਸੇਵਾਵਾਂ ਨਿਭਾ ਰਹੇ ਹਨ। ਇਸੇ ਤਰਾਂ ਫਾਇਰ ਐਂਡ ਐਮਰਜੈਂਸੀ ਨਿਊਜ਼ੀਲੈਂਡ (FENZ) ਦੇ ਵਿੱਚ 5 ਸਾਲਾਂ ਦੀ ਸੇਵਾ ਲਈ ਇੱਕ ਪੰਜਾਬੀ ਪੁਨੀਤ ਸਿੰਘ ਨੂੰ ਫਾਈਵ-ਈਅਰ ਸਰਵਿਸ ਆਨਰ ਮੈਡਲ ਨਾਲ ਸਨਮਾਨਿਤ ਕੀਤਾ ਗਿਆ ਹੈ। ਇਹ ਸਨਮਾਨ ਪੁਨੀਤ ਦੀ ਸਮਰਪਿਤ ਸੇਵਾ ਤੇ ਕਮਿਊਨਿਟੀ ਪ੍ਰਤੀ ਜ਼ਿੰਮੇਵਾਰੀ ਦੀ ਮਿਸਾਲ ਲਈ ਦਿੱਤਾ ਗਿਆ ਹੈ।
ਇੱਕ ਚੈੱਨਲ ਵੱਲੋਂ ਪੁਨੀਤ ਦੇ ਹਵਾਲੇ ਤੋਂ ਸਾਂਝੀ ਕੀਤੀ ਜਾਣਕਾਰੀ ਅਨੁਸਾਰ, “ਪੁਨੀਤ ਦਾ ਕਹਿਣਾ ਹੈ ਕਿ ਮੇਰੇ ਘਰ ਦੇ ਨੇੜੇ ਇੱਕ ਫਾਇਰ ਸਟੇਸ਼ਨ ਸੀ। ਮੈਂ ਆਪਣੇ ਇੱਕ ਦੋਸਤ (ਜੋ ਪੁਲਿਸ ਅਫਸਰ ਹੈ) ਨਾਲ ਗੱਲ ਕੀਤੀ, ਉਸਨੇ ਦੱਸਿਆ ਕਿ ਇਹ ਵੋਲੰਟੀਅਰ ਅਧਾਰਿਤ ਫਾਇਰ ਬ੍ਰਿਗੇਡ ਹੈ ਅਤੇ ਇਸ ਦੇ ਸਾਰੇ ਮੈਂਬਰ ਆਪਣਾ ਰੋਜ਼ਾਨਾ ਕੰਮ ਕਰਦੇ ਹਨ ਤੇ ਰਾਤ ਸਮੇਂ ਕਮਿਊਨਿਟੀ ਲਈ ਸੇਵਾ ਦਿੰਦੇ ਹਨ,”। ਮੈਨੂੰ ਹਮੇਸ਼ਾਂ ਪੁਲਿਸ ਅਫਸਰ ਬਣਨ ਦਾ ਸ਼ੌਂਕ ਸੀ ਪਰ ਸੋਚਦਾ ਸੀ ਕਿ ਮੇਰੇ ਕੋਲ ਉਹ ਜਿਹੀ ਫਿਟਨੈੱਸ ਨਹੀਂ। ਫਾਇਰਫਾਇਟਰ ਬਣ ਕੇ ਮੈਂ ਉਹ ਖ਼ੁਆਹਿਸ ਪੂਰੀ ਕੀਤੀ।” ਪੁਨੀਤ ਨੇ ਕਿਹਾ ਕਿ ਮੈਂ ਵੈਬਸਾਈਟ ਰਾਹੀਂ ਵੋਲੰਟੀਅਰ ਫਾਇਰਫਾਇਟਰ ਲਈ ਅਰਜ਼ੀ ਦਿੱਤੀ ਅਤੇ ਸਟੇਸ਼ਨ ਅਫਸਰ ਵੱਲੋਂ ਇੰਟਰਵਿਊ ਲਈ ਬੁਲਾਵਾ ਮਿਲਿਆ।ਕੁਝ ਟ੍ਰੇਨਿੰਗ ਲੈਣ ਤੋਂ ਬਾਅਦ ਮੈਂ ਅਧਿਕਾਰਕ ਤੌਰ ’ਤੇ ਬ੍ਰਿਗੇਡ ਜੁਆਇਨ ਕਰ ਲਈ। ਟ੍ਰੇਨਿੰਗ ਹਫ਼ਤੇ ਵਿੱਚ ਇੱਕ ਦਿਨ ਸ਼ਾਮ 7 ਤੋਂ 9 ਵਜੇ ਤੱਕ ਹੁੰਦੀ ਸੀ ਜਿਸ ਵਿੱਚ ਉਨ੍ਹਾਂ ਨੂੰ ਮੂਲ ਫਾਇਰਫਾਇਟਿੰਗ ਹੁਨਰਾਂ ਨਾਲ ਨਾਲ ਫਰਸਟ ਏਡ ਤੇ ਮੈਡੀਕਲ ਕਾਲਾਂ ਸੰਬੰਧੀ ਸਿਖਲਾਈ ਦਿੱਤੀ ਗਈ। ਇਸ ਬੁਨਿਆਦੀ ਸਿਖਲਾਈ ਤੋਂ ਬਾਅਦ ਉਨ੍ਹਾਂ ਨੇ ਇਕ ਹਫ਼ਤੇ ਦੀ ਇੰਟੈਂਸਿਵ ਫਾਇਰਫਾਇਟਰ ਕੋਰਸ ਪੂਰੀ ਕੀਤੀ ਅਤੇ ਸਫ਼ਲਤਾ ਨਾਲ ਪਾਸ ਕੀਤੀ। ਹੁਣ ਉਹ ਐਮਰਜੈਂਸੀ ਕਾਲਾਂ ਦੌਰਾਨ ਟੀਮ ਨਾਲ ਜੁੜ ਕੇ ਸੇਵਾ ਕਰਦੇ ਹਨ।”
ਦੱਸ ਦੇਈਏ ਪੁਨੀਤ ਸਿੰਘ ਜ਼ਿਲ੍ਹਾ ਗੁਰਦਾਸਪੁਰ ਦੇ ਪਿੰਡ ਖੇੜਾ ਸੁਲਤਾਨ ਨਾਲ ਸਬੰਧਿਤ ਹੈ। ਉਹ 2012 ‘ਚ ਨਿਊਜ਼ੀਲੈਂਡ ਦੇ ਵੈਲਿੰਗਟਨ ਸ਼ਹਿਰ ਵਿੱਚ ਹੋਸਪਿਟੈਲਿਟੀ ਵਿਸ਼ੇ ਦੀ ਪੜ੍ਹਾਈ ਕਰਨ ਆਇਆ ਸੀ। ਪੜ੍ਹਾਈ ਪੂਰੀ ਕਰਨ ਤੋਂ ਬਾਅਦ ਉਨ੍ਹਾਂ ਨੇ ਵੱਖ-ਵੱਖ ਕੈਫੇ ਤੇ ਹੋਟਲਾਂ ਵਿੱਚ ਕੰਮ ਕੀਤਾ। ਪੁਨੀਤ ਨੂੰ 2019 ਵਿੱਚ ਰਿਹਾਇਸ਼ (ਰੇਜ਼ੀਡੈਂਸੀ) ਮਿਲੀ ਸੀ।