ਵੱਡੇ ਸੁਪਨੇ ਦੇਖੋ, ਸਖ਼ਤ ਮਿਹਨਤ ਕਰੋ, ਅਤੇ ਕਦੇ ਹਾਰ ਨਾ ਮੰਨੋ – ਇਹੀ ਮਹਾਨਤਾ ਦਾ ਰਸਤਾ ਹੈ। ਕਾਂਸਟੇਬਲ ਗੁਰਸਿਮਰਨ ਸਿੰਘ ਬੈਂਸ ਨੇ ਵੀ ਕੁਝ ਅਜਿਹਾ ਹੀ ਕਰ ਦਿਖਾਇਆ ਹੈ ਕਿ ਮਿਹਨਤ, ਦ੍ਰਿੜਤਾ ਅਤੇ ਸਮਰਪਣ ਨਾਲ, ਭਾਰਤੀ ਹਵਾਈ ਸੈਨਾ ਵਿੱਚ ਇੱਕ ਅਧਿਕਾਰੀ ਵੱਜੋਂ ਵੀ ਆਕਾਸ਼ ਦੀਆਂ ਉੱਚਾਈਆਂ ਨੂੰ ਛੂਹਿਆ ਜਾ ਸਕਦਾ ਹੈ। ਪੰਜਾਬ ਪੁਲਿਸ ਦੇ ਇਸ ਨੌਜਵਾਨ ਕਾਂਸਟੇਬਲ ਨੇ ਅਜਿਹਾ ਸੁਪਨਾ ਪੂਰਾ ਕੀਤਾ ਹੈ, ਜਿਸਦੀ ਬਹੁਤ ਸਾਰੇ ਇੱਛਾ ਰੱਖਦੇ ਹਨ ਪਰ ਕੁੱਝ ਹੀ ਪੂਰਾ ਕਰ ਪਾਉਂਦੇ ਹਨ। 22 ਸਾਲ ਦੇ ਕਾਂਸਟੇਬਲ ਗੁਰਸਿਮਰਨ ਸਿੰਘ ਬੈਂਸ ਇਸ ਸਮੇਂ ਮੋਹਾਲੀ ‘ਚ ਤਾਇਨਾਤ ਹਨ। ਗੁਰਸਿਮਰਨ ਨੇ ਵੱਕਾਰੀ ਸਰਵਿਸਿਜ਼ ਸਿਲੈਕਸ਼ਨ ਬੋਰਡ (SSB) ਇੰਟਰਵਿਊ ਪਾਸ ਕਰ ਲਈ ਹੈ ਅਤੇ ਗੁਰਸਿਮਰਨ ਨੂੰ ਹੁਣ ਭਾਰਤੀ ਹਵਾਈ ਫ਼ੌਜ ਦੀ ਫਲਾਇੰਗ ਬ੍ਰਾਂਚ ਲਈ ਚੁਣਿਆ ਗਿਆ ਹੈ।
ਗੁਰਸਿਮਰਨ ਸਿੰਘ ਬੈਂਸ ਰੋਪੜ ਜ਼ਿਲ੍ਹੇ ਦਾ ਰਹਿਣ ਵਾਲਾ ਹੈ ਜੋ ਅਗਸਤ 2022 ‘ਚ ਪੰਜਾਬ ਪੁਲਿਸ ‘ਚ ਭਰਤੀ ਹੋਇਆ ਸੀ ਪਰ ਆਪਣੀ ਖ਼ਾਕੀ ਵਰਦੀ ਦੇ ਪਿੱਛੇ ਉਸਨੇ ਹਮੇਸ਼ਾ ਅਸਮਾਨ ‘ਚ ਉੱਡਣ ਦੀ ਇੱਛਾ ਨੂੰ ਪਾਲਿਆ। ਗੁਰਸਿਮਰਨ ਸਿੰਘ ਐੱਸ. ਐੱਸ. ਬੀ. ‘ਚ ਚੌਥੀ ਕੋਸ਼ਿਸ਼ ਮਗਰੋਂ ਸਫਲ ਹੋਇਆ ਹੈ। ਡੀ.ਜੀ.ਪੀ ਪੰਜਾਬ ਨੇ ਵੀ ਨੌਜਵਾਨ ਕਰਮਚਾਰੀਆਂ ਨੂੰ ਗੁਰਸਿਮਰਨ ਦੀ ਯਾਤਰਾ ਤੋਂ ਪ੍ਰੇਰਨਾ ਲੈਣ ਦੀ ਅਪੀਲ ਕੀਤੀ ਹੈ ਉਨ੍ਹਾਂ ਕਿਹਾ ਕਿ, “ਉੱਚ ਟੀਚਿਆਂ ਲਈ ਯਤਨ ਕਰੋ, ਚੁਣੌਤੀਆਂ ਨੂੰ ਅਪਣਾਓ, ਅਤੇ ਇਮਾਨਦਾਰੀ ਅਤੇ ਮਾਣ ਨਾਲ ਦੇਸ਼ ਦੀ ਸੇਵਾ ਕਰੋ।”