ਨਿਊਜ਼ੀਲੈਂਡ ਦੀ ਰਾਜਧਾਨੀ ਵੈਲਿੰਗਟਨ ਵਿੱਚ ਸਮੁੰਦਰੀ ਤੂਫਾਨੀ ਲਹਿਰਾਂ ਦੇ ਵੱਡੇ ਖਤਰੇ ਨੂੰ ਦੇਖਦੇ ਹੋਏ ਦੱਖਣੀ ਤੱਟੀ ਇਲਾਕਿਆਂ ਦੇ ਨਿਵਾਸੀਆਂ ਲਈ ਲਾਜ਼ਮੀ ਘਰ ਖਾਲੀਕਰਨ ਦੇ ਹੁਕਮ ਜਾਰੀ ਕਰ ਦਿੱਤੇ ਗਏ ਹਨ। ਮੌਸਮ ਵਿਭਾਗ ਵੱਲੋਂ ਮੰਗਲਵਾਰ ਨੂੰ 10.5 ਮੀਟਰ ਤੱਕ ਉੱਚੀਆਂ ਲਹਿਰਾਂ ਉੱਠਣ ਦੀ ਭਵਿੱਖਬਾਣੀ ਕੀਤੀ ਗਈ ਹੈ। ਸਥਿਤੀ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਵੈਲਿੰਗਟਨ ਦੇ ਦੱਖਣੀ ਅਤੇ ਪੂਰਬੀ ਵਾਰਡਾਂ ਵਿੱਚ ਐਮਰਜੈਂਸੀ ਦੀ ਸਥਿਤੀ ਐਲਾਨ ਦਿੱਤੀ ਗਈ ਹੈ। ਅਧਿਕਾਰੀਆਂ ਨੇ ਲੋਕਾਂ ਨੂੰ ਸਮੁੰਦਰੀ ਤੱਟਾਂ ਅਤੇ ਤੱਟੀ ਖੇਤਰਾਂ ਤੋਂ ਦੂਰ ਰਹਿਣ ਦੀ ਸਖ਼ਤ ਹਦਾਇਤ ਦਿੱਤੀ ਹੈ।
ਮੌਸਮ ਵਿਭਾਗ ਮੁਤਾਬਕ ਦੇਸ਼ ਵੱਲ ਵਧ ਰਹੀ ਦੱਖਣੀ ਹਵਾਵਾਂ ਵਾਲੀ ਮੌਸਮੀ ਪ੍ਰਣਾਲੀ ਕਾਰਨ ਸੋਮਵਾਰ ਸ਼ਾਮ ਤੋਂ ਬੁੱਧਵਾਰ ਸਵੇਰ ਤੱਕ ਕੂਕ ਸਟ੍ਰੇਟ ਖੇਤਰ ਵਿੱਚ ਬਹੁਤ ਉੱਚੀਆਂ ਅਤੇ ਖਤਰਨਾਕ ਲਹਿਰਾਂ ਬਣਨਗੀਆਂ। ਮੰਗਲਵਾਰ ਸਵੇਰੇ ਲਹਿਰਾਂ ਦੀ ਉਚਾਈ 9.5 ਤੋਂ 10.5 ਮੀਟਰ ਤੱਕ ਪਹੁੰਚ ਸਕਦੀ ਹੈ। ਖਰਾਬ ਸਮੁੰਦਰੀ ਹਾਲਾਤਾਂ ਕਾਰਨ ਕੂਕ ਸਟ੍ਰੇਟ ਰਾਹੀਂ ਚੱਲਣ ਵਾਲੀਆਂ ਇੰਟਰਆਇਲੈਂਡਰ ਅਤੇ ਬਲੂਬ੍ਰਿਜ ਫੈਰੀ ਸੇਵਾਵਾਂ ਨੂੰ ਵੀ ਰੱਦ ਕਰ ਦਿੱਤਾ ਗਿਆ ਹੈ।
ਸਿਵਲ ਡਿਫੈਂਸ ਵੱਲੋਂ ਜਾਰੀ ਐਮਰਜੈਂਸੀ ਚੇਤਾਵਨੀ ਅਨੁਸਾਰ ਓਵ੍ਹੀਰੋ ਬੇ, ਆਇਲੈਂਡ ਬੇ, ਹਾਊਟਨ ਬੇ ਅਤੇ ਬ੍ਰੇਕਰ ਬੇ ਦੇ ਸਮੁੰਦਰੀ ਕਿਨਾਰੇ ਸਥਿਤ ਘਰਾਂ ਲਈ ਮੰਗਲਵਾਰ ਸਵੇਰੇ 9 ਵਜੇ ਤੋਂ ਲਾਜ਼ਮੀ ਖਾਲੀਕਰਨ ਹੁਕਮ ਲਾਗੂ ਕੀਤੇ ਗਏ ਸਨ। ਲਿਆਲ ਬੇ ਨੂੰ ਇਸ ਹੁਕਮ ਤੋਂ ਬਾਹਰ ਰੱਖਿਆ ਗਿਆ ਹੈ। ਅਧਿਕਾਰੀਆਂ ਨੇ ਪ੍ਰਭਾਵਿਤ ਇਲਾਕਿਆਂ ਦੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਸੋਮਵਾਰ ਰਾਤ ਹੀ ਆਪਣੇ ਘਰ ਛੱਡ ਦੇਣ, ਕਿਉਂਕਿ ਮੰਗਲਵਾਰ ਸਵੇਰੇ ਤੋਂ ਬਾਅਦ ਇਲਾਕਾ ਛੱਡਣਾ ਖਤਰਨਾਕ ਹੋ ਸਕਦਾ ਹੈ। ਨਿਵਾਸੀਆਂ ਨੂੰ ਇਹ ਵੀ ਕਿਹਾ ਗਿਆ ਹੈ ਕਿ ਸੁਰੱਖਿਆ ਸੰਬੰਧੀ ਅਧਿਕਾਰਕ ਮਨਜ਼ੂਰੀ ਮਿਲਣ ਤੱਕ ਉਹ ਆਪਣੇ ਘਰਾਂ ਵਿੱਚ ਵਾਪਸ ਨਾ ਜਾਣ।
ਵੈਲਿੰਗਟਨ ਸਿਟੀ ਕੌਂਸਲ ਨੇ ਦੱਖਣੀ ਤੱਟੀ ਇਲਾਕਿਆਂ ਦੇ ਵਸਨੀਕਾਂ ਨੂੰ ਅਸਥਾਈ ਤੌਰ ‘ਤੇ ਕਿਸੇ ਹੋਰ ਸੁਰੱਖਿਅਤ ਥਾਂ ਰਹਿਣ ਦੀ ਸਲਾਹ ਦਿੱਤੀ ਹੈ। ਜਿਨ੍ਹਾਂ ਲੋਕਾਂ ਕੋਲ ਜਾਣ ਲਈ ਕੋਈ ਥਾਂ ਨਹੀਂ ਹੈ, ਉਨ੍ਹਾਂ ਲਈ ਐਮਰਜੈਂਸੀ ਸਹਾਇਤਾ ਕੇਂਦਰ ਵੀ ਸਥਾਪਤ ਕੀਤਾ ਗਿਆ ਹੈ। ਸਿਵਲ ਡਿਫੈਂਸ ਦੇ ਬੁਲਾਰੇ ਡੈਨ ਨੀਲੀ ਨੇ ਚੇਤਾਵਨੀ ਦਿੱਤੀ ਹੈ ਕਿ ਭਾਵੇਂ ਮੌਸਮ ਆਮ ਦਿੱਸੇ, ਫਿਰ ਵੀ ਲੋਕ ਸਮੁੰਦਰ ਵਿੱਚ ਜਾਣ ਜਾਂ ਬੀਚਾਂ ਦੇ ਨੇੜੇ ਜਾਣ ਤੋਂ ਪਰਹੇਜ਼ ਕਰਨ, ਕਿਉਂਕਿ ਲਹਿਰਾਂ ਅਚਾਨਕ ਅਤੇ ਬਹੁਤ ਖਤਰਨਾਕ ਹੋ ਸਕਦੀਆਂ ਹਨ।