ਦੱਖਣੀ ਆਕਲੈਂਡ ਦੇ ਇੱਕ ਸਕੂਲ ‘ਚ ਸੋਮਵਾਰ ਸਵੇਰੇ ਲੌਕਡਾਊਨ ਲਗਾਉਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਹਾਲਾਂਕਿ ਕੁਝ ਸਮੇਂ ਦੇ ਬਾਅਦ ਕਲਾਸਾਂ ਦੁਬਾਰਾ ਸ਼ੁਰੂ ਕਰ ਦਿੱਤੀਆਂ ਗਈਆਂ ਸਨ। ਪਾਪਾਟੋਏਟੋਏ ਦੇ ਔਰੇਰੇ ਕਾਲਜ ਨੇ ਸੋਸ਼ਲ ਮੀਡੀਆ ‘ਤੇ ਦੱਸਿਆ ਹੈ ਕਿ ਸਕੂਲ ਵਿੱਚ ਕਈ ਲੋਕਾਂ ਦੇ ਆਉਣ ਕਾਰਨ ਸਕੂਲ ਨੂੰ ਤਾਲਾਬੰਦ ਕਰ ਦਿੱਤਾ ਗਿਆ ਹੈ। ਕਾਲਜ ਨੇ ਕਿਹਾ ਕਿ ਲੋਕਾਂ ਦੇ ਗਰੁੱਪ ਨੂੰ ਬਿਨਾਂ ਕਿਸੇ ਘਟਨਾ ਦੇ ਸਕੂਲ ਦੇ ਮੈਦਾਨ ਤੋਂ ਹਟਾ ਦਿੱਤਾ ਗਿਆ ਸੀ ਅਤੇ ਸਾਰੇ ਵਿਦਿਆਰਥੀ ਸੁਰੱਖਿਅਤ ਹਨ। ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਪੁਲਿਸ ਸਾਵਧਾਨੀ ਦੇ ਤੌਰ ‘ਤੇ ਪਹੁੰਚੀ ਸੀ ਅਤੇ ਮਾਮਲਾ ਹੱਲ ਹੋ ਗਿਆ ਹੈ।
ਇੱਕ ਬਿਆਨ ਵਿੱਚ, ਪੁਲਿਸ ਨੇ ਕਿਹਾ ਕਿ ਉਨ੍ਹਾਂ ਨੂੰ ਸੋਮਵਾਰ ਸਵੇਰੇ 11.10 ਵਜੇ ਔਰੇਰੇ ਕਾਲਜ ਬੁਲਾਇਆ ਗਿਆ ਸੀ ਜਦੋਂ ਰਿਪੋਰਟਾਂ ਆਈਆਂ ਕਿ ਲੋਕਾਂ ਦਾ ਇੱਕ ਅਣਪਛਾਤਾ ਸਮੂਹ ਸਕੂਲ ਦੇ ਮੈਦਾਨ ਵਿੱਚ ਦਾਖਲ ਹੋਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਪੁਲਿਸ ਨੇ ਕਿਹਾ ਕਿ, “ਇਸ ਸਮੂਹ ਨੇ ਹਮਲਾਵਰ ਵੱਜੋਂ ਐਂਟਰੀ ਕੀਤੀ ਹੈ ਅਤੇ ਸਕੂਲ ਨੇ ਆਪਣੀ ਮਰਜੀ ਅਨੁਸਾਰ ਤਾਲਾਬੰਦੀ ਕੀਤੀ ਸੀ।” ਪੁਲਿਸ ਨੇ ਕਿਹਾ ਕਿ, ਇਸ ਮਗਰੋਂ ਸਟਾਫ ਮੈਂਬਰਾਂ ਨੇ ਸਮੂਹ ਨੂੰ ਸਕੂਲ ਤੋਂ ਬਾਹਰ ਕੱਢਿਆ ਅਤੇ ਉਨ੍ਹਾਂ ਨੂੰ ਦੁਬਾਰਾ ਦਾਖਲ ਹੋਣ ਤੋਂ ਰੋਕਿਆ।ਪੁਲਿਸ ਨੇ ਕਿਹਾ ਕਿ ਉਹ ਤਾਲਾਬੰਦੀ ਹਟਾਏ ਜਾਣ ਤੱਕ ਸਕੂਲ ਵਿੱਚ ਹੀ ਰਹੇ। ਇਸ ਮਗਰੋਂ ਕਾਲਜ ਨੇ ਫੇਸਬੁੱਕ ‘ਤੇ ਪੋਸਟ ਕੀਤਾ ਕਿ ਪੁਲਿਸ ਮੌਕੇ ‘ਤੇ ਸੀ ਅਤੇ “ਚਿੰਤਾ ਦਾ ਕੋਈ ਕਾਰਨ ਨਹੀਂ” ਸੀ, ਬਾਅਦ ਵਿੱਚ ਤਾਲਾਬੰਦੀ ਹਟਾ ਦਿੱਤੀ ਗਈ ਸੀ। ਇੱਕ ਪੁਲਿਸ ਬੁਲਾਰੇ ਨੇ ਕਿਹਾ ਕਿ ਉਹ ਲੋਕਾਂ ਦੇ ਇੱਕ ਸਮੂਹ ਵਿਚਕਾਰ ਹੰਗਾਮੇ ਦੀਆਂ ਰਿਪੋਰਟਾਂ ਕਾਰਨ ਹਾਜ਼ਰ ਹੋਏ ਸਨ, ਪਰ ਕੋਈ ਜ਼ਖਮੀ ਨਹੀਂ ਹੋਇਆ ਅਤੇ ਨਾ ਹੀ ਕੋਈ ਸ਼ਿਕਾਇਤ ਕੀਤੀ ਗਈ ਸੀ।