ਸਾਈਕਲੋਨ ਵਾਈਆਨੂ ਦੇ ਖਤਰੇ ਨੂੰ ਦੇਖਦੇ ਹੋਏ ਨਾਰਥਲੈਂਡ ਵਿੱਚ ਐਮਰਜੈਂਸੀ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਇਹ ਤੂਫ਼ਾਨ ਐਤਵਾਰ ਨੂੰ ਨਾਰਥ ਆਈਲੈਂਡ ਦੇ ਕੁਝ ਹਿੱਸਿਆਂ ਵਿੱਚ ਤੇਜ਼ ਹਵਾਵਾਂ ਅਤੇ ਭਾਰੀ ਮੀਂਹ ਲਿਆ ਸਕਦਾ ਹੈ। ਨਾਰਥਲੈਂਡ ਸਿਵਲ ਡਿਫੈਂਸ ਇਮਰਜੈਂਸੀ ਮੈਨੇਜਮੈਂਟ ਗਰੁੱਪ ਦੇ ਕੰਟਰੋਲਰ ਡੇਮਿਅਨ ਰਿਓ ਦੇ ਮੁਤਾਬਕ ਇਹ ਐਲਾਨ ਸ਼ੁੱਕਰਵਾਰ ਸ਼ਾਮ 5 ਵਜੇ ਕੀਤਾ ਗਿਆ ਅਤੇ ਇਹ ਸ਼ੁਰੂਆਤੀ ਤੌਰ ‘ਤੇ ਸੱਤ ਦਿਨਾਂ ਲਈ ਲਾਗੂ ਰਹੇਗਾ। ਰਿਓ ਨੇ ਕਿਹਾ ਕਿ, “ਐਮਰਜੈਂਸੀ ਦਾ ਐਲਾਨ ਕਰਨ ਨਾਲ ਅਧਿਕਾਰੀਆਂ ਨੂੰ ਵਿਸ਼ੇਸ਼ ਅਧਿਕਾਰ ਮਿਲ ਜਾਂਦੇ ਹਨ, ਜਿਸ ਨਾਲ ਜਾਨ ਅਤੇ ਸੰਪਤੀ ਦੀ ਰੱਖਿਆ ਲਈ ਜ਼ਰੂਰੀ ਕਦਮ ਤੁਰੰਤ ਚੁੱਕੇ ਜਾ ਸਕਦੇ ਹਨ। “ਇਸ ਨਾਲ ਸਾਨੂੰ ਹਾਲਾਤ ਖਰਾਬ ਹੋਣ ‘ਤੇ ਤੇਜ਼ੀ ਨਾਲ ਕਾਰਵਾਈ ਕਰਨ ਅਤੇ ਲੋਕਾਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਵਿੱਚ ਮਦਦ ਮਿਲਦੀ ਹੈ।”
ਮੌਸਮ ਵਿਭਾਗ ਮੁਤਾਬਿਕ ਕੈਟੇਗਰੀ-2 ਸਾਈਕਲੋਨ ਵਾਈਆਨੂ ਇੱਕ ਵੱਡਾ ਅਤੇ ਨੁਕਸਾਨਦਾਇਕ ਤੂਫ਼ਾਨ ਹੈ, ਜੋ ਸ਼ਨੀਵਾਰ ਦੇ ਦੇਰ ਰਾਤ ਫਾਰ ਨਾਰਥ ‘ਤੇ ਅਸਰ ਕਰੇਗਾ ਅਤੇ ਫਿਰ ਐਤਵਾਰ ਤੱਕ ਦੱਖਣ-ਪੂਰਬ ਵੱਲ ਨਾਰਥ ਆਈਲੈਂਡ ‘ਚ ਫੈਲ ਸਕਦਾ ਹੈ। ਮੌਸਮ ਵਿਭਾਗ ਨੇ ਚਿਤਾਵਨੀ ਦਿੱਤੀ ਹੈ ਕਿ ਤੇਜ਼ ਹਵਾਵਾਂ, ਭਾਰੀ ਮੀਂਹ ਅਤੇ ਸਮੁੰਦਰੀ ਪਾਣੀ ਦੇ ਚੜ੍ਹਾਉ ਦਾ ਮਿਲਾਪ ਇੱਕ ਖਤਰਨਾਕ ਅਤੇ ਜਾਨਲੇਵਾ ਸਥਿਤੀ ਪੈਦਾ ਕਰ ਸਕਦਾ ਹੈ।
ਨਾਰਥਲੈਂਡ ਸਿਵਲ ਡਿਫੈਂਸ ਦੇ ਚੇਅਰ ਕੋਲਿਨ ਕਿਚਨ ਨੇ ਕਿਹਾ ਕਿ ਇਹ ਸਮਾਂ ਇਲਾਕੇ ਲਈ ਚੁਣੌਤੀਪੂਰਨ ਹੈ, ਕਿਉਂਕਿ ਲੋਕ ਹਾਲ ਹੀ ਦੇ ਮੌਸਮੀ ਨੁਕਸਾਨਾਂ ਤੋਂ ਉਭਰ ਰਹੇ ਹਨ। ਉਨ੍ਹਾਂ ਕਿਹਾ, “ਅਸੀਂ ਜਾਣਦੇ ਹਾਂ ਕਿ ਇਹ ਕਈ ਸਮੁਦਾਇਆਂ ਲਈ ਮੁਸ਼ਕਿਲ ਸਮਾਂ ਹੈ, ਪਰ ਨਾਰਥਲੈਂਡ ਦੇ ਲੋਕਾਂ ਨੇ ਹਮੇਸ਼ਾਂ ਆਪਣੀ ਹਿੰਮਤ ਅਤੇ ਇਕਤਾ ਦਿਖਾਈ ਹੈ।” ਉਨ੍ਹਾਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਤਿਆਰੀ ਕਰਕੇ ਰੱਖਣ, ਆਪਣੇ ਗੁਆਂਢੀਆਂ ਦੀ ਮਦਦ ਕਰਨ ਅਤੇ ਸਰਕਾਰੀ ਹਦਾਇਤਾਂ ਦੀ ਪਾਲਣਾ ਕਰਨ।
ਨਾਰਥਲੈਂਡ ਵਿੱਚ ਤੇਜ਼ ਹਵਾਵਾਂ ਲਈ ਓਰੇਂਜ ਚਿਤਾਵਨੀ ਸ਼ਨੀਵਾਰ ਰਾਤ 11 ਵਜੇ ਤੋਂ ਐਤਵਾਰ ਦੁਪਹਿਰ 2 ਵਜੇ ਤੱਕ ਜਾਰੀ ਰਹੇਗੀ। ਇਸਦੇ ਨਾਲ ਹੀ ਬੇ ਆਫ ਆਈਲੈਂਡਜ਼ ਤੋਂ ਹੋਕੀਅੰਗਾ ਹਾਰਬਰ ਤੱਕ ਭਾਰੀ ਮੀਂਹ ਲਈ ਵੀ ਓਰੇਂਜ ਚਿਤਾਵਨੀ ਸ਼ਨੀਵਾਰ ਰਾਤ 9 ਵਜੇ ਤੋਂ ਐਤਵਾਰ ਸਵੇਰੇ 9 ਵਜੇ ਤੱਕ ਲਾਗੂ ਰਹੇਗੀ। ਮੌਸਮ ਵਿਭਾਗ ਨੇ ਦੱਸਿਆ ਕਿ ਸਾਈਕਲੋਨ ਵਾਈਆਨੂ ਦਾ ਪਹਿਲਾ ਅਸਰ ਫਾਰ ਨਾਰਥ ਵਿੱਚ ਸ਼ਨੀਵਾਰ ਦੇ ਦੇਰ ਨਾਲ ਮਹਿਸੂਸ ਕੀਤਾ ਜਾਵੇਗਾ, ਜਿੱਥੇ ਤੇਜ਼ ਹਵਾਵਾਂ, ਭਾਰੀ ਮੀਂਹ ਅਤੇ ਉੱਥਲ-ਪੁੱਥਲ ਸਮੁੰਦਰੀ ਹਾਲਾਤ ਦੇਖਣ ਨੂੰ ਮਿਲਣਗੇ।