ਬੀਤੇ ਦਿਨ ਦੇਸ਼ ਦੇ ਸਕੂਲਾਂ ਨੂੰ ਧਮਕੀਆਂ ਦਿੱਤੀਆਂ ਗਈਆਂ ਸੀ, ਦੱਸ ਦੇਈਏ ਕਿ ਇਹ ਇੱਕ ਹਫਤੇ ‘ਚ ਦੂਜਾ ਮਾਮਲਾ ਹੈ ਜਦੋ ਸਕੂਲਾਂ ਨੂੰ ਧਮਕੀਆਂ ਦਿੱਤੀਆਂ ਗਈਆਂ ਹਨ। ਉੱਥੇ ਹੀ ਪੁਲਿਸ ਸਹਾਇਕ ਕਮਿਸ਼ਨਰ ਬਰੂਸ ਓ’ਬ੍ਰਾਇਨ ਦਾ ਕਹਿਣਾ ਹੈ ਕਿ ਪੁਲਿਸ ਦੇਸ਼ ਭਰ ਦੇ ਸਕੂਲਾਂ ਨੂੰ ਦਿੱਤੀਆਂ ਜਾ ਰਹੀਆਂ ਧਮਕੀਆਂ ਦੇ ਮੂਲ ਨੂੰ ਸਮਝਣ ਅਤੇ ਪਛਾਨਣ ਲਈ ਸਖ਼ਤ ਮਿਹਨਤ ਕਰ ਰਹੀ ਹੈ। ਮਾਸਟਰਟਨ, ਕੈਕੋਉਰਾ, ਗ੍ਰੇਮਾਊਥ, ਕੁਈਨਸਟਾਉਨ, ਲੇਵਿਨ, ਵੰਗਾਨੁਈ, ਰੋਲਸਟਨ, ਟਾਕਾਕਾ, ਗੇਰਾਲਡਾਈਨ, ਡਨਸਟਨ, ਐਸ਼ਬਰਟਨ ਅਤੇ ਪਾਮਰਸਟਨ ਨੌਰਥ ਵਿੱਚ ਘੱਟੋ-ਘੱਟ ਇੱਕ ਦਰਜਨ ਸਕੂਲਾਂ ਨੂੰ ਨਿਸ਼ਾਨਾ ਬਣਾਏ ਜਾਣ ਤੋਂ ਬਾਅਦ ਪੁਲਿਸ ਨੇ ਜਾਂਚ ਸ਼ੁਰੂ ਕੀਤੀ।
ਓ’ਬ੍ਰਾਇਨ ਨੇ ਕਿਹਾ ਕਿ ਜ਼ਿਆਦਾਤਰ ਫ਼ੋਨ ਕਾਲ ਦੀਆਂ ਧਮਕੀਆਂ ਇੱਕ ਵਿਸਫੋਟਕ ਯੰਤਰ ਦਾ ਹਵਾਲਾ ਦੇ ਰਹੀਆਂ ਸਨ, ਜਿਸ ਕਾਰਨ ਪੁਲਿਸ ਦਾ ਮੰਨਣਾ ਹੈ ਕਿ ਕਾਲਾਂ ਇੱਕੋ ਵਿਅਕਤੀ ਕਰ ਰਿਹਾ ਹੈ। ਇਹ ਪੁੱਛੇ ਜਾਣ ‘ਤੇ ਕਿ ਕੀ ਕਾਲ ਕਰਨ ਵਾਲਾ ਪੈਸੇ ਵਰਗੀ ਕਿਸੇ ਚੀਜ਼ ਦੀ ਮੰਗ ਕਰ ਰਿਹਾ ਸੀ ? ਤਾ ਉਨ੍ਹਾਂ ਨੇ ਕਿਹਾ ਕਿ ਉਹ ਸਪੱਸ਼ਟੀਕਰਨ ਵਿੱਚ ਨਹੀਂ ਜਾਣਾ ਚਾਹੁੰਦੇ, ਹਾਲਾਂਕਿ, ਕਾਲਾਂ ਇਸ ਹੱਦ ਤੱਕ ਨੁਕਸਾਨ ਦੀ ਧਮਕੀ ਦੇ ਰਹੀਆਂ ਸਨ ਕਿ ਸਕੂਲਾਂ ਨੂੰ ਉਨ੍ਹਾਂ ਨੂੰ ਗੰਭੀਰਤਾ ਨਾਲ ਲੈਣ ਤੋਂ ਇਲਾਵਾ ਕੋਈ ਵਿਕਲਪ ਨਹੀਂ ਸੀ।