ਕ੍ਰਾਈਸਟਚਰਚ ਦੀ ਇੱਕ ਮਹਿਲਾ ਅਨੋਖੇ ਤਰੀਕੇ ਨਾਲ ਚੋਰਾਂ ਦਾ ਸ਼ਿਕਾਰ ਬਣੀ ਹੈ। ਦਰਅਸਲ ਚੋਰਾਂ ਨੇ ਪਹਿਲਾ ਮਹਿਲਾ ਦੀ ਕਾਰ ਦਾ ਸ਼ੀਸ਼ਾ ਤੋੜਿਆ ਅਤੇ ਫਿਰ ਉਸਦਾ ATM ਚੋਰੀ ਕੀਤਾ ਇਸ ਮਗਰੋਂ ਏਟੀਐਮ ਦੀ ਵਰਤੋਂ ਕਰ ਮਹਿਲਾ ਦੀ ਬਚਤ ਵਿੱਚੋਂ ਹਜ਼ਾਰਾਂ ਡਾਲਰ ਦਾ ਚੂਨਾ ਲਗਾ ਦਿੱਤਾ। ਜ਼ਿਕਰਯੋਗ ਹੈ ਕਿ ਚੋਰਾਂ ਨੇ ਇਹ ਕਾਰਨਾਮਾ ਬਿਨਾਂ ਪਾਸਵਰਡ ਜਾਣੇ ਕੀਤਾ ਹੈ। ਵੇਵੇਨੀ ਟੀਲੇ-ਰੱਸ (Waveney Teale-Russ) ਸ਼ਨੀਵਾਰ ਦੁਪਹਿਰ ਨੂੰ ਸੈਰ ‘ਤੇ ਸੀ, ਜਦੋਂ ਉਸਦੀ ਕਾਰ ਦਾ ਸ਼ੀਸ਼ਾ ਲਿਟੇਲਟਨ ਕਾਰ ਪਾਰਕ ਵਿਚ ਤੋੜਿਆ ਗਿਆ।
ਉਸ ਦਾ ਫ਼ੋਨ ਅਤੇ ਬਟੂਆ ਬੂਟਾਂ ਵਿੱਚ ਛੁਪਾਇਆ ਹੋਇਆ ਸੀ ਜੋ ਕਈ ਹੋਰ ਸਮਾਨ ਸਮੇਤ ਚੋਰੀ ਹੋ ਗਿਆ ਸੀ। ਉਸ ਨੂੰ ਇੱਕ ਹੋਰ ਝਟਕਾ ਓਦੋਂ ਲੱਗਿਆ ਜਦੋਂ ਇੱਕ ਘੰਟੇ ਬਾਅਦ ਉਸਨੇ ਬੈਂਕ ਨੂੰ ਫੋਨ ਕੀਤਾ ਅਤੇ ਪਤਾ ਲੱਗਿਆ ਕਿ ਚੋਰਾਂ ਨੇ ਉਸ ਦੇ ਖਾਤੇ ‘ਚੋਂ ਹਜ਼ਾਰਾਂ ਡਾਲਰ ਉਡਾ ਦਿੱਤੇ ਨੇ। ਮਹਿਲਾ ਨੇ ਦੱਸਿਆ ਕਿ, “ਮੈਂ ਸੋਚਿਆ ਸੀ ਕਿ ਮੈਨੂੰ ਸਿਰਫ ਆਪਣਾ ਕਾਰਡ ਬੰਦ ਕਰਵਾਉਣਾ ਪਏਗਾ ਅਤੇ ਫਿਰ ਮੇਰੀ ਕਿਸਮਤ ਵਾਪਿਸ ਆ ਜਾਵੇਗੀ ਪਰ ਬੈਂਕ ਨੇ ਮੈਨੂੰ ਸੂਚਿਤ ਕੀਤਾ ਕਿ ਇਸ ਕਾਲ ਤੋਂ 15 ਮਿੰਟ ਪਹਿਲਾਂ ਮੇਰਾ ਇੰਟਰਨੈਟ ਬੈਂਕਿੰਗ ਪਾਸਵਰਡ ਬਦਲਿਆ ਗਿਆ ਹੈ ਅਤੇ ਤੁਹਾਡੇ ਬਚਤ ਖਾਤੇ ਵਿੱਚੋਂ ਹਜ਼ਾਰਾਂ ਡਾਲਰ ਕੱਡਵਾਏ ਗਏ ਹਨ।”
Teale-Russ ਨੇ ਕਿਹਾ ਕਿ ਉਹ ਹੈਰਾਨ ਹੈ ਕਿ ਚੋਰਾਂ ਨੇ ਵੱਡੀ ਮਾਤਰਾ ਵਿੱਚ ਪੈਸੇ ਟ੍ਰਾਂਸਫਰ ਕਰ ਦਿੱਤੇ, ਉਸਦਾ ਔਨਲਾਈਨ ਬੈਂਕਿੰਗ ਪਾਸਵਰਡ ਅਤੇ ਉਸਦੇ ਡੈਬਿਟ ਕਾਰਡ ਦਾ ਪਿੰਨ ਨੰਬਰ ਬਦਲ ਦਿੱਤਾ, ਉਹ ਵੀ ਬਿਨਾਂ ਕਿਸੇ ਦਿੱਕਤ ਦੇ। ਉਨ੍ਹਾਂ ਕਿਹਾ ਕਿ ਮੈਨੂੰ ਕੋਈ ਈਮੇਲ ਸੂਚਨਾ ਪ੍ਰਾਪਤ ਨਹੀਂ ਹੋਈ ਸੀ, ਅਤੇ ਜੇਕਰ ਮੈਨੂੰ ਇੱਕ ਕਾਲ ਜਾਂ ਟੈਕਸਟ ਪ੍ਰਾਪਤ ਆਇਆ ਹੋਵੇਗਾ ਤਾਂ ਇਸ ਨਾਲ ਕੋਈ ਫ਼ਰਕ ਨਹੀਂ ਪੈਂਦਾ ਕਿਉਂਕਿ ਮੇਰਾ ਫ਼ੋਨ ਚੋਰੀ ਹੋ ਗਿਆ ਸੀ।