ਨਿਊਜ਼ੀਲੈਂਡ ਵਿੱਚ ਰਹਿੰਦੇ ਪੰਜਾਬੀ ਮੂਲ ਦੇ ਇੱਕ ਜੋੜੇ ਦੇ ਘਰ ਖੁਸ਼ੀਆਂ ਨੇ ਇੱਕੋ ਵਾਰ ਤਿੰਨ ਗੁਣਾ ਦਸਤਕ ਦਿੱਤੀ ਹੈ। Bikramjeet Singh ਅਤੇ ਉਨ੍ਹਾਂ ਦੀ ਪਤਨੀ Neeraj ਦੇ ਘਰ ਕੁਦਰਤੀ ਤੌਰ ‘ਤੇ ਇੱਕੋ ਜਿਹੇ ਟ੍ਰਿਪਲੈਟ ਪੁੱਤਰਾਂ ਦਾ ਜਨਮ ਹੋਇਆ ਹੈ, ਜਿਸਨੂੰ ਡਾਕਟਰ ਬਹੁਤ ਹੀ ਵਿਰਲਾ ਮੈਡੀਕਲ ਮਾਮਲਾ ਮੰਨ ਰਹੇ ਹਨ। Tauranga Hospital ਵਿੱਚ ਬੁੱਧਵਾਰ ਨੂੰ ਹੋਈ ਇਸ ਡਿਲਿਵਰੀ ਨੇ ਪਰਿਵਾਰ ਨੂੰ ਪਹਿਲੀ ਵਾਰ ਮਾਪੇ ਬਣਨ ਦੀ ਖੁਸ਼ੀ ਦਿੱਤੀ। ਖ਼ਾਸ ਗੱਲ ਇਹ ਰਹੀ ਕਿ ਇਹ ਤਿੰਨੇ ਬੱਚੇ ਬਿਨਾਂ IVF ਜਾਂ ਕਿਸੇ ਫਰਟੀਲਿਟੀ ਇਲਾਜ ਦੇ ਕੁਦਰਤੀ ਤੌਰ ‘ਤੇ conceive ਹੋਏ ਸਨ।
ਮੈਡੀਕਲ ਮਾਹਿਰਾਂ ਮੁਤਾਬਕ, ਇੱਕੋ ਜਿਹੇ ਟ੍ਰਿਪਲੈਟ ਬੱਚਿਆਂ ਦਾ ਜਨਮ ਆਪਣੇ ਆਪ ਵਿੱਚ ਬਹੁਤ ਘੱਟ ਹੁੰਦਾ ਹੈ, ਪਰ ਤਿੰਨਾਂ ਵੱਲੋਂ ਇੱਕੋ placenta ਸਾਂਝਾ ਕਰਨਾ ਇਸ ਮਾਮਲੇ ਨੂੰ ਹੋਰ ਵੀ ਵਿਰਲਾ ਬਣਾ ਦਿੰਦਾ ਹੈ। ਡਾਕਟਰਾਂ ਅਨੁਸਾਰ ਅਜਿਹੀ pregnancy ਕਾਫੀ ਸੰਵੇਦਨਸ਼ੀਲ ਅਤੇ ਖਤਰਨਾਕ ਮੰਨੀ ਜਾਂਦੀ ਹੈ, ਜਿਸ ਲਈ ਲਗਾਤਾਰ ਸਕੈਨ ਅਤੇ ਖ਼ਾਸ ਮੈਡੀਕਲ ਨਿਗਰਾਨੀ ਦੀ ਲੋੜ ਪੈਂਦੀ ਹੈ।
ਜੋੜੇ ਨੇ ਦੱਸਿਆ ਕਿ ਇਹ ਸਫ਼ਰ ਖੁਸ਼ੀ ਦੇ ਨਾਲ-ਨਾਲ ਚਿੰਤਾ ਭਰਿਆ ਵੀ ਰਿਹਾ, ਕਿਉਂਕਿ ਪੂਰੀ ਗਰਭ ਅਵਸਥਾ ਦੌਰਾਨ ਡਾਕਟਰਾਂ ਦੀ ਖ਼ਾਸ ਦੇਖਭਾਲ ਲੈਣੀ ਪਈ। ਇਸਦੇ ਬਾਵਜੂਦ ਤਿੰਨਾਂ ਬੱਚਿਆਂ ਦੀ ਸੁਰੱਖਿਅਤ ਡਿਲਿਵਰੀ ਹੋਣਾ ਪਰਿਵਾਰ ਲਈ ਕਿਸੇ ਚਮਤਕਾਰ ਤੋਂ ਘੱਟ ਨਹੀਂ। ਨਿਊਜ਼ੀਲੈਂਡ ਅਤੇ ਪੰਜਾਬ ਵਿੱਚ ਰਹਿੰਦੇ ਪਰਿਵਾਰਕ ਮੈਂਬਰ ਅਤੇ ਦੋਸਤ ਇਸ ਖੁਸ਼ਖਬਰੀ ਨੂੰ ਵੱਡੀ ਖੁਸ਼ਕਿਸਮਤੀ ਮੰਨਦੇ ਹੋਏ ਜਸ਼ਨ ਮਨਾ ਰਹੇ ਹਨ।