ਪਿਛਲੇ ਹਫ਼ਤੇ ਆਕਲੈਂਡ ਦੇ ਗਲੇਨਫੀਲਡ ਮਾਲ ਵਿੱਚ ਇੱਕ ਕਥਿਤ ਦੁਕਾਨ ਤੋਂ ਚੋਰੀ ਦੀ ਕੋਸ਼ਿਸ਼ ਦੌਰਾਨ ਦੋ ਸੁਰੱਖਿਆ ਗਾਰਡਾਂ ਅਤੇ ਇੱਕ ਗਾਹਕ ਦੇ ਉੱਪਰ ਹਮਲਾ ਕੀਤੇ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਹੈਰਾਨੀਜਨਕ ਗੱਲ ਹੈ ਕਿ ਇਹ ਹਮਲਾ 2 ਮਹਿਲਾਵਾਂ ਵੱਲੋਂ ਕੀਤਾ ਗਿਆ ਸੀ। ਪੁਲਿਸ ਨੇ ‘ਹਿੰਸਕ ਹਮਲੇ’ ਦੇ ਇਲਜ਼ਾਮਾਂ ‘ਚ ਦੋ ਮਹਿਲਾਵਾਂ ਨੂੰ ਗ੍ਰਿਫਤਾਰ ਵੀ ਕਰ ਲਿਆ ਹੈ। ਪੁਲਿਸ ਨੂੰ ਸ਼ੁੱਕਰਵਾਰ ਦੁਪਹਿਰ 1.30 ਵਜੇ ਨੌਰਥ ਸ਼ੋਰ ਮਾਲ ਵਿੱਚ ਬੁਲਾਇਆ ਗਿਆ ਸੀ ਜਦੋਂ ਰਿਪੋਰਟਾਂ ਮਿਲੀਆਂ ਕਿ ਦੋ ਸੁਰੱਖਿਆ ਗਾਰਡਾਂ ‘ਤੇ ਹਮਲਾ ਕੀਤਾ ਗਿਆ ਹੈ।
ਕਾਰਜਕਾਰੀ ਸੀਨੀਅਰ ਸਾਰਜੈਂਟ ਐਲੇਕਸ ਵਾਵਰਿਸ ਨੇ ਦੋਸ਼ ਲਗਾਇਆ ਕਿ ਦੋ ਔਰਤਾਂ ਨੇ “ਤਿੰਨ ਲੋਕਾਂ ‘ਤੇ ਹਿੰਸਕ ਹਮਲਾ” ਕੀਤਾ ਹੈ ਜੋ ਉਨ੍ਹਾਂ ਨੂੰ ਮਾਲ ‘ਚੋਂ ਭੱਜਣ ਤੋਂ ਰੋਕਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਉਨ੍ਹਾਂ ਕਿਹਾ ਕਿ :ਦੋ ਪੀੜਤਾਂ ਨੂੰ ਡਾਕਟਰੀ ਇਲਾਜ ਲਈ ਹਸਪਤਾਲ ਲਿਜਾਣ ਦੀ ਲੋੜ ਸੀ।” ਫਿਰ ਪੁਲਿਸ ਨੇ ਮਾਲ ਤੋਂ ਥੋੜ੍ਹੀ ਦੂਰੀ ‘ਤੇ ਕਥਿਤ ਅਪਰਾਧੀਆਂ ਦਾ ਪਤਾ ਲਗਾਇਆ, ਜਿੱਥੇ ਉਨ੍ਹਾਂ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਪੁਲਿਸ ਨੇ ਕਿਹਾ ਕਿ ਕਥਿਤ ਦੁਕਾਨ ਚੋਰੀ ਦੀਆਂ ਚੀਜ਼ਾਂ ਸਟੋਰ ਵਿੱਚ ਵਾਪਸ ਕਰ ਦਿੱਤੀਆਂ ਗਈਆਂ ਸਨ।