Nelson ਦੀ ਅਦਾਲਤ ਨੇ ਡੇਟਿੰਗ ਐਪ ਰਾਹੀਂ ਮਿਲੀ ਮਹਿਲਾ ਨਾਲ ਜਬਰ ਜਨਾਹ ਕਰਨ ਦੇ ਦੋਸ਼ ਵਿੱਚ ਪੰਜਾਬੀ ਟਰੱਕ ਡਰਾਈਵਰ Shamsher Singh ਨੂੰ 6 ਸਾਲ 9 ਮਹੀਨੇ ਦੀ ਕੈਦ ਦੀ ਸਜ਼ਾ ਸੁਣਾਈ ਹੈ। 33 ਸਾਲਾ ਸ਼ਮਸ਼ੇਰ ਸਿੰਘ, ਜੋ ਵਿਆਹਿਆ ਹੋਇਆ ਹੈ ਅਤੇ ਦੋ ਬੱਚਿਆਂ ਦਾ ਪਿਤਾ ਹੈ, ਨੂੰ ਜਨਵਰੀ 2024 ਵਿੱਚ ਨੈਲਸਨ ਅਤੇ Blenheim ਦਰਮਿਆਨ ਇੱਕ ਸੁੰਨਸਾਨ ਹਾਈਵੇ ’ਤੇ ਆਪਣੇ ਟਰੱਕ ਦੇ ਕੈਬਿਨ ਵਿੱਚ ਮਹਿਲਾ ਨਾਲ ਜਬਰ ਜਨਾਹ ਕਰਨ ਦਾ ਦੋਸ਼ੀ ਕਰਾਰ ਦਿੱਤਾ ਗਿਆ।
ਸੁਣਵਾਈ ਦੌਰਾਨ ਪੀੜਤਾ ਨੇ ਅਦਾਲਤ ਵਿੱਚ ਭਾਵੁਕ ਹੋ ਕੇ ਆਪਣਾ ਬਿਆਨ ਪੜ੍ਹਿਆ। ਉਸਨੇ ਕਿਹਾ ਕਿ ਇਸ ਘਟਨਾ ਨੇ ਉਸਦਾ ਵਿਸ਼ਵਾਸ, ਆਤਮ-ਸਨਮਾਨ ਅਤੇ ਟਰੱਕ ਡਰਾਈਵਰ ਪਿਤਾ ਨਾਲ ਜੁੜੀਆਂ ਯਾਦਾਂ ਤੱਕ ਤੋੜ ਕੇ ਰੱਖ ਦਿੱਤੀਆਂ। ਪ੍ਰੋਸੀਕਿਊਟਰ ਨੇ ਦੱਸਿਆ ਕਿ ਮਹਿਲਾ ਉਸ ਵੇਲੇ ਬਹੁਤ ਨਾਜ਼ੁਕ ਹਾਲਤ ਵਿੱਚ ਸੀ ਕਿਉਂਕਿ ਉਹ ਰਾਤ ਦੇ ਸਮੇਂ ਸੁੰਨਸਾਨ ਇਲਾਕੇ ਵਿੱਚ ਇਕੱਲੀ ਟਰੱਕ ਵਿੱਚ ਮੌਜੂਦ ਸੀ। ਮੈਡੀਕਲ ਜਾਂਚ ਵਿੱਚ ਉਸਦੇ ਸਰੀਰ ’ਤੇ ਕਈ ਨੀਲ ਅਤੇ ਜ਼ਖਮ ਮਿਲੇ।
ਜਾਣਕਾਰੀ ਅਨੁਸਾਰ ਦੋਵੇਂ ਇੱਕ ਡੇਟਿੰਗ ਐਪ ’ਤੇ ਮਿਲੇ ਸਨ ਅਤੇ ਬਾਅਦ ਵਿੱਚ ਨੈਲਸਨ ਵਿੱਚ ਇਕੱਠੇ ਖਾਣਾ ਖਾਧਾ। ਮਹਿਲਾ ਨੇ ਦੱਸਿਆ ਕਿ ਉਸਦਾ ਪਿਤਾ ਵੀ ਟਰੱਕ ਡਰਾਈਵਰ ਸੀ, ਜਿਸ ਕਾਰਨ ਉਹ ਟਰੱਕ ਯਾਤਰਾ ਲਈ ਆਸਾਨੀ ਨਾਲ ਤਿਆਰ ਹੋ ਗਈ। ਅਦਾਲਤ ਵਿੱਚ ਦੱਸਿਆ ਗਿਆ ਕਿ ਰਾਤ ਸਮੇਂ ਵਾਪਸੀ ਦੌਰਾਨ Rai Valley ਨੇੜੇ ਟਰੱਕ ਰੋਕ ਕੇ ਸ਼ਮਸ਼ੇਰ ਸਿੰਘ ਨੇ ਮਹਿਲਾ ਨਾਲ ਜਬਰਦਸਤੀ ਕੀਤੀ।
ਜੱਜ Stephen Harrop ਨੇ ਕਿਹਾ ਕਿ ਮਹਿਲਾ ਵੱਲੋਂ ਵਾਰ-ਵਾਰ ਇਨਕਾਰ ਕਰਨ ਦੇ ਬਾਵਜੂਦ ਦੋਸ਼ੀ ਨੇ ਜਬਰ ਜਨਾਹ ਕੀਤਾ। ਅਦਾਲਤ ਨੇ ਇਹ ਵੀ ਮੰਨਿਆ ਕਿ ਪੀੜਤਾ ਉਸ ਵੇਲੇ ਬਹੁਤ ਅਸੁਰੱਖਿਅਤ ਹਾਲਤ ਵਿੱਚ ਸੀ ਅਤੇ ਉਸਨੂੰ ਇਲਾਕੇ ਦੀ ਕੋਈ ਜਾਣਕਾਰੀ ਨਹੀਂ ਸੀ। ਘਟਨਾ ਤੋਂ ਬਾਅਦ ਮਹਿਲਾ ਤੁਰੰਤ ਪੁਲਿਸ ਕੋਲ ਪਹੁੰਚੀ, ਜਦਕਿ ਅਦਾਲਤ ਨੇ ਦੋਸ਼ੀ ਵੱਲੋਂ ਲਗਾਤਾਰ ਦੋਸ਼ ਨਾ ਮੰਨਣ ਨੂੰ ਵੀ ਗੰਭੀਰ ਤੱਥ ਕਰਾਰ ਦਿੱਤਾ।