ਆਕਲੈਂਡ ‘ਚ ਇੱਕ ਬਿਨਾਂ ਲਾਇਸੈਂਸ ਵਾਲਾ ਡੈਂਟਿਸਟ ਫੜਿਆ ਗਿਆ ਹੈ। ਚੈਂਗਲਿਨ ਲੀ ਨਾਮ ਦਾ ਵਿਅਕਤੀ ਆਕਲੈਂਡ ਦੇ ਪੂਰਬੀ ਹਿੱਸੇ ਵਿੱਚ ਬਿਨਾਂ ਰਜਿਸਟ੍ਰੇਸ਼ਨ ਡੈਂਟਿਸਟ ਬਣ ਕੇ ਮਰੀਜ਼ਾਂ ਦਾ ਇਲਾਜ ਕਰਨ ਦੇ ਦੋਸ਼ ਵਿੱਚ ਫੜਿਆ ਗਿਆ ਹੈ। ਹੈਰਾਨੀਜਨਕ ਗੱਲ ਹੈ ਕਿ ਇਸ ਨੇ ਆਪਣੇ ਘਰ ਵਿੱਚ ਬਣਾਏ ਨਕਲੀ ਡੈਂਟਲ ਕਲੀਨਿਕ ‘ਚ ਸੈਂਕੜੇ ਮਰੀਜ਼ਾਂ ਦਾ ਇਲਾਜ਼ ਕੀਤਾ ਹੈ ਜਿਨ੍ਹਾਂ ਵਿੱਚ ਰੂਟ ਕੈਨਾਲ, ਲੋਕਲ ਐਨੇਸਥੇਟਿਕ ਦੇ ਟੀਕੇ ਅਤੇ ਐਕਸ-ਰੇ ਕਰਨਾ ਸ਼ਾਮਿਲ ਹੈ।
ਲੀ ਨੇ ਆਕਲੈਂਡ ਜ਼ਿਲ੍ਹਾ ਅਦਾਲਤ ‘ਚ ਬਿਨਾਂ ਯੋਗਤਾ ਵਾਲੇ ਵਿਅਕਤੀ ਵੱਲੋਂ ਸਿਹਤ ਪ੍ਰੈਕਟੀਸ਼ਨਰ ਬਣਨ ਦਾ ਦਾਵਾ ਕਰਨ, ਪ੍ਰਤਿਬੰਧਿਤ ਮੈਡੀਕਲ ਸਰਗਰਮੀਆਂ ਕਰਨ, ਐਕਸ-ਰੇ ਦੀ ਵਰਤੋਂ ਕਰਨ ਅਤੇ ਅਪਰਾਧਕ ਬੇਪਰਵਾਹੀ ਦੇ ਦੋਸ਼ ਕਬੂਲ ਕਰ ਲਏ ਹਨ। ਪਹਿਲੀ ਸੁਣਵਾਈ ਦੌਰਾਨ ਉਸ ਨੇ ਬਿਨਾਂ ਕਾਨੂੰਨੀ ਆਧਾਰ ਦੇ ਪ੍ਰਿਸਕ੍ਰਿਪਸ਼ਨ ਦਵਾਈਆਂ ਰੱਖਣ ਦਾ ਦੋਸ਼ ਵੀ ਮੰਨਿਆ ਸੀ। ਦੱਸ ਦੇਈਏ ਜਦੋਂ ਪੁਲਿਸ ਅਤੇ ਸਿਹਤ ਮੰਤਰਾਲੇ ਦੇ ਅਧਿਕਾਰੀਆਂ ਨੇ ਉਸ ਦੇ ਕਲੀਨਿਕ ‘ਤੇ ਛਾਪਾ ਮਾਰਿਆ ਤਾਂ ਲੀ ਉਸ ਵੇਲੇ ਵੀ ਇੱਕ ਮਰੀਜ਼ ਦਾ ਦੰਦ ਕੱਢ ਰਿਹਾ ਸੀ।