ਨਿਊਜ਼ੀਲੈਂਡ ਵਿੱਚ ਵੀਰਵਾਰ ਸਵੇਰੇ Westpac ਦੇ ਗਾਹਕਾਂ ਨੂੰ ਉਸ ਵੇਲੇ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ, ਜਦੋਂ ਬੈਂਕ ਦੀ Online Banking ਸੇਵਾ ਵਿੱਚ ਅਚਾਨਕ ਤਕਨੀਕੀ ਖਰਾਬੀ ਆ ਗਈ। ਕਈ ਗਾਹਕ Westpac One ਵਿੱਚ ਲਾਗਇਨ ਨਹੀਂ ਕਰ ਸਕੇ, ਜਦਕਿ ਕੁਝ ਲੋਕਾਂ ਦੇ ਭੁਗਤਾਨ ਗਾਇਬ ਜਾਂ ਗਲਤ ਦਿਖਾਈ ਦੇਣ ਲੱਗੇ।
ਖਰਾਬੀ ਦਾ ਅਸਰ ਸਿਰਫ਼ Online Banking ਤੱਕ ਸੀਮਤ ਨਹੀਂ ਰਿਹਾ। ਗਾਹਕਾਂ ਨੇ ਦੱਸਿਆ ਕਿ ਉਹ ਬਿੱਲਾਂ ਦੀ ਅਦਾਇਗੀ ਅਤੇ ਹੋਰ ਖਾਤਿਆਂ ਵਿੱਚ ਪੈਸੇ ਟ੍ਰਾਂਸਫਰ ਨਹੀਂ ਕਰ ਸਕੇ। ਕੁਝ overnight payments ਵੀ ਦੇਰੀ ਨਾਲ ਪਹੁੰਚੇ। ਇਸ ਦੌਰਾਨ ਕੁਝ ATM ਵੀ ਆਫਲਾਈਨ ਹੋਣ ਦੀ ਜਾਣਕਾਰੀ ਸਾਹਮਣੇ ਆਈ।
ਸੁਪਰਮਾਰਕੀਟਾਂ ‘ਚ ਵੀ ਰੁਕੇ ਭੁਗਤਾਨ
ਕਈ ਗਾਹਕਾਂ ਨੇ ਸ਼ਿਕਾਇਤ ਕੀਤੀ ਕਿ ਉਹ ਸੁਪਰਮਾਰਕੀਟਾਂ ਵਿੱਚ ਵੀ ਭੁਗਤਾਨ ਨਹੀਂ ਕਰ ਸਕੇ। ਕੁਝ ਮਾਮਲਿਆਂ ਵਿੱਚ ਟ੍ਰਾਂਸਫਰ ਕੀਤੀ ਰਕਮ ਖਾਤੇ ਵਿੱਚੋਂ ਕੱਟੀ ਹੋਈ ਦਿਖਾਈ ਦਿੱਤੀ, ਜਿਸ ਕਾਰਨ ਗਾਹਕਾਂ ਵਿੱਚ ਹੋਰ ਚਿੰਤਾ ਪੈਦਾ ਹੋ ਗਈ।
Westpac ਨੇ ਮੰਗੀ ਮਾਫ਼ੀ
ਬੈਂਕ ਨੇ ਸਵੇਰੇ ਕਰੀਬ 10:10 ਵਜੇ ਆਪਣੀ ਵੈੱਬਸਾਈਟ ’ਤੇ ਬਿਆਨ ਜਾਰੀ ਕਰਕੇ Online Banking ਵਿੱਚ ਆ ਰਹੀ ਸਮੱਸਿਆ ਦੀ ਪੁਸ਼ਟੀ ਕੀਤੀ। Westpac ਨੇ ਗਾਹਕਾਂ ਤੋਂ ਮੁਆਫ਼ੀ ਮੰਗਦਿਆਂ ਕਿਹਾ ਕਿ ਉਸਦੀ ਟੀਮ ਸੇਵਾ ਨੂੰ ਜਲਦ ਤੋਂ ਜਲਦ ਬਹਾਲ ਕਰਨ ਲਈ ਕੰਮ ਕਰ ਰਹੀ ਹੈ।
ਇਸ ਤੋਂ ਪਹਿਲਾਂ ਬੈਂਕ ਵੱਲੋਂ ਸੋਸ਼ਲ ਮੀਡੀਆ ’ਤੇ ਇੱਕ ਗਲਤ ਅਪਡੇਟ ਜਾਰੀ ਕਰ ਦਿੱਤਾ ਗਿਆ ਸੀ, ਜਿਸ ਵਿੱਚ ਸੇਵਾ ਆਮ ਤੌਰ ’ਤੇ ਚੱਲਣ ਦਾ ਦਾਅਵਾ ਕੀਤਾ ਗਿਆ। ਗਾਹਕਾਂ ਦੀਆਂ ਸ਼ਿਕਾਇਤਾਂ ਤੋਂ ਬਾਅਦ ਬੈਂਕ ਨੇ ਆਪਣਾ ਅਪਡੇਟ ਠੀਕ ਕਰਦਿਆਂ ਮੁੜ ਮਾਫ਼ੀ ਮੰਗੀ।
ਫਿਲਹਾਲ ਗਾਹਕਾਂ ਦੀਆਂ ਨਜ਼ਰਾਂ ਇਸ ਗੱਲ ’ਤੇ ਹਨ ਕਿ Westpac ਕਦੋਂ ਪੂਰੀ ਤਰ੍ਹਾਂ Online Banking, ਭੁਗਤਾਨ ਅਤੇ ਟ੍ਰਾਂਸਫਰ ਸੇਵਾਵਾਂ ਨੂੰ ਆਮ ਕਰਦਾ ਹੈ।