Manurewa , ਆਕਲੈਂਡ: ਆਕਲੈਂਡ ਦੇ Manurewa ਵਿੱਚ ਪਿਛਲੇ ਹਫ਼ਤੇ ਚੋਰੀ ਕੀਤੀ ਗੱਡੀ ਦੀ ਸਾਹਮਣੇ ਤੋਂ ਆ ਰਹੀ ਇੱਕ ਹੋਰ ਵਾਹਨ ਨਾਲ ਹੋਈ ਭਿਆਨਕ ਟੱਕਰ ਵਿੱਚ ਮਾਰੀ ਗਈ ਔਰਤ ਦੀ ਪਛਾਣ ਪੁਲਿਸ ਨੇ ਜਾਰੀ ਕਰ ਦਿੱਤੀ ਹੈ।
ਮ੍ਰਿਤਕ ਦੀ ਪਛਾਣ 27 ਸਾਲਾ ਮੋਨਿਕ ਮੈਰੀ ਜੈਨੀਫਰ ਲੇ (Monique Marie Jennifer Lay), ਓਟਾਰਾ ਵਜੋਂ ਹੋਈ ਹੈ।
ਇਹ ਹਾਦਸਾ 27 ਅਗਸਤ ਦੀ ਸ਼ਾਮ ਅਲਫ੍ਰਿਸਟਨ ਰੋਡ, ਮਨੁਰੇਵਾ ’ਤੇ ਵਾਪਰਿਆ ਸੀ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਚੋਰੀ ਕੀਤੀ ਗੱਡੀ ਦੀ ਡਰਾਈਵਰ ਅਤੇ ਇਕਲੌਤੀ ਸਵਾਰ ਮੋਨਿਕ ਲੇ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ।
ਪੁਲਿਸ ਮੁਤਾਬਿਕ ਮਾਮਲਾ ਗ੍ਰੀਨਮੀਡੋਜ਼ ਐਵੇਨਿਊ ’ਤੇ ਹੋਈ ਇੱਕ ਗੰਭੀਰ ਲੁੱਟ ਦੀ ਘਟਨਾ ਤੋਂ ਸ਼ੁਰੂ ਹੋਇਆ ਸੀ। ਦੋਸ਼ ਹੈ ਕਿ ਘਰ ਵਿੱਚ ਮੌਜੂਦ ਇੱਕ ਵਿਅਕਤੀ ਨੂੰ ਕ੍ਰੋਬਾਰ ਦਿਖਾ ਕੇ ਧਮਕਾਇਆ ਗਿਆ ਅਤੇ ਉਸ ਤੋਂ ਬਾਅਦ ਇੱਕ ਗੱਡੀ ਚੋਰੀ ਕਰ ਲਈ ਗਈ।
ਇਸ ਦੌਰਾਨ ਇਲਾਕੇ ਵਿੱਚ ਪਹੁੰਚ ਰਹੇ ਪੁਲਿਸ ਅਧਿਕਾਰੀਆਂ ਨੇ ਇੱਕ ਵਾਹਨ ਨੂੰ ਸੜਕ ਦੇ ਵਿਚਕਾਰ ਬਿਨਾਂ ਹੈੱਡਲਾਈਟਾਂ ਦੇ ਚਲਦੇ ਹੋਏ ਦੇਖਿਆ। ਬਾਅਦ ਦੀ ਜਾਂਚ ਵਿੱਚ ਪੁਸ਼ਟੀ ਹੋਈ ਕਿ ਇਹ ਉਹੀ ਗੱਡੀ ਸੀ ਜੋ ਗ੍ਰੀਨਮੀਡੋਜ਼ ਐਵੇਨਿਊ ਤੋਂ ਚੋਰੀ ਕੀਤੀ ਗਈ ਸੀ।
ਪੁਲਿਸ ਨੇ ਵਾਹਨ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ, ਪਰ ਡਰਾਈਵਰ ਨੇ ਕਥਿਤ ਤੌਰ ’ਤੇ ਗੱਡੀ ਨਹੀਂ ਰੋਕੀ ਅਤੇ ਤੇਜ਼ ਰਫ਼ਤਾਰ ਨਾਲ ਉਥੋਂ ਭੱਜ ਗਿਆ।
ਫਿਰ ਕਰੀਬ ਰਾਤ 9:42 ਵਜੇ ਇਹ ਗੱਡੀ ਅਲਫ੍ਰਿਸਟਨ ਰੋਡ ’ਤੇ ਪਹੁੰਚੀ ਅਤੇ ਸਾਹਮਣੇ ਤੋਂ ਆ ਰਹੀ ਇੱਕ ਹੋਰ ਗੱਡੀ ਨਾਲ ਸਿੱਧੀ ਟੱਕਰ ਹੋ ਗਈ।
ਪੁਲਿਸ ਅਧਿਕਾਰੀਆਂ ਨੇ ਤੁਰੰਤ ਮੌਕੇ ’ਤੇ ਪਹੁੰਚ ਕੇ ਫਸਟ ਏਡ ਦੇਣ ਦੀ ਕੋਸ਼ਿਸ਼ ਕੀਤੀ, ਪਰ ਚੋਰੀ ਕੀਤੀ ਗੱਡੀ ਦੀ ਡਰਾਈਵਰ ਅਤੇ ਇਕਲੌਤੀ ਸਵਾਰ ਨੂੰ ਬਚਾਇਆ ਨਹੀਂ ਜਾ ਸਕਿਆ।
ਦੂਜੀ ਗੱਡੀ ਵਿੱਚ ਸਵਾਰ ਵਿਅਕਤੀ ਨੂੰ ਦਰਮਿਆਨੇ ਦਰਜੇ ਦੀਆਂ ਸੱਟਾਂ ਨਾਲ ਹਸਪਤਾਲ ਲਿਜਾਇਆ ਗਿਆ।
ਸੁਪਰਡੈਂਟ ਸ਼ੈਨਨ ਗ੍ਰੇ ਨੇ ਮੋਨਿਕ ਲੇ ਦੇ ਪਰਿਵਾਰ ਅਤੇ ਕਰੀਬੀਆਂ ਨਾਲ ਇਸ ਦੁੱਖ ਦੀ ਘੜੀ ਵਿੱਚ ਹਮਦਰਦੀ ਪ੍ਰਗਟ ਕੀਤੀ ਹੈ।
ਪੁਲਿਸ ਨੇ ਦੱਸਿਆ ਕਿ ਕ੍ਰਿਟੀਕਲ ਇਨਸੀਡੈਂਟ ਜਾਂਚ ਅਜੇ ਵੀ ਜਾਰੀ ਹੈ ਅਤੇ ਅਧਿਕਾਰੀ ਇਹ ਪਤਾ ਲਗਾਉਣ ਵਿੱਚ ਜੁਟੇ ਹੋਏ ਹਨ ਕਿ ਉਸ ਰਾਤ ਵਾਪਰੀ ਪੂਰੀ ਘਟਨਾ ਦੇ ਹਾਲਾਤ ਅਸਲ ਵਿੱਚ ਕੀ ਸਨ।