ਨਿਊਜ਼ੀਲੈਂਡ ਦੇ ਟੀ ਅਨਾਉ (Te Anau) ਨੇੜੇ ਸ਼ਨੀਵਾਰ ਦੁਪਹਿਰ 5.2 ਤੀਬਰਤਾ ਦਾ ਭੂਚਾਲ ਦਰਜ ਕੀਤਾ ਗਿਆ ਹੈ। ਸਰਕਾਰੀ ਭੂਚਾਲ ਨਿਗਰਾਨੀ ਏਜੰਸੀ GeoNet ਅਨੁਸਾਰ ਭੂਚਾਲ ਦਾ ਕੇਂਦਰ ਟੀ ਅਨਾਉ ਤੋਂ ਕਰੀਬ 35 ਕਿਲੋਮੀਟਰ ਉੱਤਰ-ਪੱਛਮ ਵੱਲ ਸੀ ਅਤੇ ਇਸ ਦੀ ਗਹਿਰਾਈ ਲਗਭਗ 102 ਕਿਲੋਮੀਟਰ ਮਾਪੀ ਗਈ ਹੈ।
ਭੂਚਾਲ ਦੁਪਹਿਰ 3:23 ਵਜੇ ਆਇਆ, ਜਿਸ ਤੋਂ ਬਾਅਦ 1,400 ਤੋਂ ਵੱਧ ਲੋਕਾਂ ਨੇ GeoNet ਨੂੰ ਝਟਕੇ ਮਹਿਸੂਸ ਹੋਣ ਦੀ ਜਾਣਕਾਰੀ ਦਿੱਤੀ। ਜ਼ਿਆਦਾਤਰ ਲੋਕਾਂ ਨੇ ਭੂਚਾਲ ਨੂੰ ਹਲਕੇ ਜਾਂ ਕਮਜ਼ੋਰ ਝਟਕਿਆਂ ਵਜੋਂ ਮਹਿਸੂਸ ਕੀਤਾ। GeoNet ਨੇ ਕਿਹਾ ਕਿ ਇਸ ਤਰ੍ਹਾਂ ਦੇ ਡੂੰਘੇ ਭੂਚਾਲ ਆਮ ਤੌਰ ‘ਤੇ ਕਾਫ਼ੀ ਵੱਡੇ ਖੇਤਰ ਵਿੱਚ ਮਹਿਸੂਸ ਕੀਤੇ ਜਾਂਦੇ ਹਨ।
ਇਸ ਤੋਂ ਪਹਿਲਾਂ ਵੀ ਪਿਛਲੇ ਹਫ਼ਤੇ ਟਾਊਮਾਰੁਨੂਈ (Taumarunui) ਨੇੜੇ 5.9 ਤੀਬਰਤਾ ਦਾ ਭੂਚਾਲ ਦਰਜ ਕੀਤਾ ਗਿਆ ਸੀ, ਜਦਕਿ ਉਸ ਤੋਂ ਇੱਕ ਹਫ਼ਤਾ ਪਹਿਲਾਂ ਟੀ ਅਨਾਉ ਦੇ ਉੱਤਰ ਵੱਲ ਵੀ 5.9 ਤੀਬਰਤਾ ਦਾ ਭੂਚਾਲ ਆਇਆ ਸੀ।
ਇਸ ਦੌਰਾਨ ਸ਼ੁੱਕਰਵਾਰ ਦੇਰ ਰਾਤ ਵੀ ਲੋਅਰ ਨੌਰਥ ਆਈਲੈਂਡ ਅਤੇ ਅੱਪਰ ਸਾਊਥ ਆਈਲੈਂਡ ਦੇ ਵਸਨੀਕਾਂ ਨੇ 4.6 ਤੀਬਰਤਾ ਦੇ ਭੂਚਾਲ ਦੇ ਝਟਕੇ ਮਹਿਸੂਸ ਕੀਤੇ। ਇਹ ਭੂਚਾਲ ਰਾਤ 11:09 ਵਜੇ ਪੋਰੀਰੂਆ (Porirua) ਤੋਂ ਲਗਭਗ 30 ਕਿਲੋਮੀਟਰ ਉੱਤਰ-ਪੱਛਮ ਵਿੱਚ ਆਇਆ ਸੀ, ਜਿਸ ਦੀ ਜਾਣਕਾਰੀ ਵੈਲਿੰਗਟਨ, ਮਨਾਵਾਤੂ-ਵਾਂਗਾਨੂਈ, ਟਾਰਾਨਾਕੀ ਅਤੇ ਅੱਪਰ ਸਾਊਥ ਆਈਲੈਂਡ ਸਮੇਤ ਕਈ ਖੇਤਰਾਂ ਤੋਂ ਕਰੀਬ 9,000 ਲੋਕਾਂ ਨੇ GeoNet ਨੂੰ ਦਿੱਤੀ ਸੀ।