ਬਾਲੀਵੁੱਡ ਅਦਾਕਾਰ ਸੈਫ ਅਲੀ ਖਾਨ ਨੂੰ ਮੱਧ ਪ੍ਰਦੇਸ਼ ਹਾਈ ਕੋਰਟ ਤੋਂ ਵੱਡਾ ਝਟਕਾ ਲੱਗਿਆ ਹੈ। ਭੋਪਾਲ ਵਿੱਚ ਨਵਾਬ ਦੀ ਜੱਦੀ ਜਾਇਦਾਦ ਦੇ ਵਿਵਾਦ ‘ਤੇ ਹਾਈ ਕੋਰਟ ਨੇ ਆਪਣਾ ਫੈਸਲਾ ਸੁਣਾ ਦਿੱਤਾ ਹੈ। ਹਾਈ ਕੋਰਟ ਦਾ ਫੈਸਲਾ ਨਵਾਬ ਹਮੀਦੁੱਲਾ ਖਾਨ ਦੇ ਵਾਰਸਾਂ ਦੀ ਅਪੀਲ ‘ਤੇ ਆਇਆ ਹੈ, ਜੋ ਕਿ ਬਾਲੀਵੁੱਡ ਅਦਾਕਾਰ ਸੈਫ ਅਲੀ ਖਾਨ ਦੇ ਹੱਕ ਵਿੱਚ ਨਹੀਂ ਜਾਪਦਾ। ਇਸ ਨਾਲ ਭਵਿੱਖ ਵਿੱਚ ਉਨ੍ਹਾਂ ਦੀਆਂ ਮੁਸ਼ਕਿਲਾਂ ਵੱਧ ਸਕਦੀਆਂ ਹਨ। ਜੱਦੀ ਜਾਇਦਾਦ ਨਾਲ ਸਬੰਧਿਤ ਇਹ ਮਾਮਲਾ ਬਹੁਤ ਪੁਰਾਣਾ ਹੈ ਅਤੇ ਭੋਪਾਲ ਦੀ ਹੇਠਲੀ ਅਦਾਲਤ ਨੇ 25 ਸਾਲ ਪਹਿਲਾਂ ਇਸ ‘ਤੇ ਆਪਣਾ ਫੈਸਲਾ ਦਿੱਤਾ ਸੀ। ਹੁਣ ਨਵਾਬ ਹਮੀਦੁੱਲਾ ਖਾਨ ਦੇ ਵਾਰਸਾਂ ਦੀ ਅਪੀਲ ਤੋਂ ਬਾਅਦ ਇਹ ਫੈਸਲਾ ਰੱਦ ਕਰ ਦਿੱਤਾ ਗਿਆ ਹੈ। ਇਹ ਮਾਮਲਾ ਭੋਪਾਲ ਵਿੱਚ 1500 ਕਰੋੜ ਰੁਪਏ ਦੀ ਜਾਇਦਾਦ ਨਾਲ ਸਬੰਧਿਤ ਹੈ।
ਮੱਧ ਪ੍ਰਦੇਸ਼ ਹਾਈ ਕੋਰਟ ਨੇ ਹੁਣ ਸੈਫ ਅਲੀ ਖਾਨ ਦੀ ਜੱਦੀ ਜਾਇਦਾਦ ਨਾਲ ਜੁੜੇ ਵਿਵਾਦ ਵਿੱਚ ਇੱਕ ਮਹੱਤਵਪੂਰਨ ਫੈਸਲਾ ਸੁਣਾਇਆ ਹੈ। ਅਦਾਲਤ ਦੇ ਅਨੁਸਾਰ, ਭੋਪਾਲ ਦੀ ਹੇਠਲੀ ਅਦਾਲਤ ਦੇ 25 ਸਾਲ ਪੁਰਾਣੇ ਫੈਸਲੇ ਨੂੰ ਰੱਦ ਕਰ ਦਿੱਤਾ ਗਿਆ ਹੈ ਅਤੇ ਇਸ ਵਿੱਚ ਨਵੀਂ ਸੁਣਵਾਈ ਦਾ ਵੀ ਆਦੇਸ਼ ਦਿੱਤਾ ਗਿਆ ਹੈ। ਇਸ ਲਈ, ਅਦਾਲਤ ਨੇ ਇੱਕ ਸਾਲ ਦਾ ਸਮਾਂ ਦਿੱਤਾ ਹੈ। ਤਾਂ ਜੋ ਹੋਰ ਵਾਰਸਾਂ ਨੂੰ ਵੀ ਜਲਦੀ ਤੋਂ ਜਲਦੀ ਇਨਸਾਫ ਮਿਲ ਸਕੇ। ਇਹ ਜੱਦੀ ਜਾਇਦਾਦ ਨਵਾਬ ਦੀ ਵੱਡੀ ਬੇਗਮ ਦੀ ਧੀ ਸਾਜਿਦਾ ਸੁਲਤਾਨ ਨੂੰ ਦਿੱਤੀ ਗਈ ਸੀ, ਜੋ ਸੈਫ ਅਲੀ ਖਾਨ ਦੀ ਪੜਦਾਦੀ ਸੀ। ਪਰ ਬਾਕੀ ਵਾਰਸਾਂ ਨੇ ਮੁਸਲਿਮ ਪਰਸਨਲ ਲਾਅ ਅਨੁਸਾਰ ਜਾਇਦਾਦ ਦੀ ਵੰਡ ਦੀ ਮੰਗ ਉਠਾਈ ਹੈ ਅਤੇ ਇਸਨੂੰ ਪੂਰੀ ਪਾਰਦਰਸ਼ਤਾ ਨਾਲ ਕਰਨ ਦੀ ਬੇਨਤੀ ਕੀਤੀ ਹੈ।
ਸੈਫ ਅਲੀ ਖਾਨ ਨਾਲ ਸਬੰਧਿਤ ਜਾਇਦਾਦ ਵਿਵਾਦ ਦੀ ਗੱਲ ਕਰੀਏ ਤਾਂ 25 ਸਾਲ ਪਹਿਲਾਂ ਬੇਗਮ ਸੁਰੱਈਆ, ਨਵਾਬਜ਼ਾਦੀ ਕਮਰ ਤਾਜ ਰਾਬੀਆ ਸੁਲਤਾਨ, ਨਵਾਬ ਮੇਹਰ ਤਾਜ ਸਾਜਿਦਾ ਸੁਲਤਾਨ ਅਤੇ ਬੇਗਮ ਮੇਹਰ ਤਾਜ ਨਵਾਬ ਸਾਜਿਦਾ ਸੁਲਤਾਨ ਨੇ ਸਾਲ 2000 ਵਿੱਚ ਹਾਈ ਕੋਰਟ ਵਿੱਚ ਅਪੀਲ ਕੀਤੀ ਸੀ। ਇਹ ਮਾਮਲਾ ਅਰਬਾਂ ਦੀ ਜਾਇਦਾਦ ਦਾ ਹੈ ਜਿਸ ਵਿੱਚ ਹਜ਼ਾਰਾਂ ਏਕੜ ਜ਼ਮੀਨ ਅਤੇ ਅਹਿਮਦਾਬਾਦ ਪੈਲੇਸ ਸ਼ਾਮਿਲ ਹੈ। ਹਾਈ ਕੋਰਟ ਦੇ ਇਸ ਫੈਸਲੇ ਤੋਂ ਬਾਅਦ, ਅਗਲੇ ਇੱਕ ਸਾਲ ਲਈ ਅਦਾਲਤ ਵਿੱਚ ਸੈਫ ਦੇ ਪਰਿਵਾਰ ਦੀਆਂ ਚੁਣੌਤੀਆਂ ਵਧ ਗਈਆਂ ਹਨ। ਹੁਣ ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ ਅਦਾਲਤ ਇਸ ਮਾਮਲੇ ਵਿੱਚ ਕੀ ਫੈਸਲਾ ਸੁਣਾਉਂਦੀ ਹੈ।