ਇੱਕ ਔਰਤ ਨੂੰ ਪ੍ਰਭਾਵਿਤ (impress ) ਕਰਨ ਦੇ ਚੱਕਰ ‘ਚ ਪੁਲਿਸ ਸਟੇਸ਼ਨ ਨੂੰ ਅੱਗ ਲਗਾਉਣ ਦੀ ਕੋਸ਼ਿਸ਼ ਕਰਨ ਵਾਲੇ ਇੱਕ ਆਦਮੀ ਨੂੰ ਦੋ ਸਾਲ ਅਤੇ ਤਿੰਨ ਮਹੀਨੇ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਪਰ ਸਜ਼ਾ ਸੁਣਾਉਣ ਦੌਰਾਨ ਜੱਜ ਨੇ ਉਸਦੇ ਰੋਮਾਂਸ ਪ੍ਰਤੀ ਵੀ ਸਪੱਸ਼ਟ ਸਲਾਹ ਦਿੱਤੀ। ਜੱਜ ਜੀਨ ਟੌਮਲਿਨਸਨ ਨੇ ਵਿਅਕਤੀ ਨੂੰ ਕਿਹਾ ਕਿ, “ਕੋਈ ਵੀ ਔਰਤ ਜੋ ਤੁਹਾਡੇ ਵੱਲੋਂ ਪੁਲਿਸ ਸਟੇਸ਼ਨ ਨੂੰ ਸਾੜਨ ਤੋਂ ਪ੍ਰਭਾਵਿਤ ਹੋਈ ਹੈ, ਉਹ impress ਕਰਨ ਦੇ ਯੋਗ ਹੀ ਨਹੀਂ ਹੋ ਸਕਦੀ।” 31 ਸਾਲਾ ਜ਼ੈਨ ਗੋਰਡਨ ਵੀਰਵਾਰ ਨੂੰ ਵਾਂਗਰੇਈ ਜ਼ਿਲ੍ਹਾ ਅਦਾਲਤ ਵਿੱਚ ਅੱਗ ਲਗਾਉਣ ਦੀ ਕੋਸ਼ਿਸ਼, ਗਲਾ ਘੁੱਟਣ ਅਤੇ ਅਯੋਗ ਠਹਿਰਾਏ ਜਾਣ ਮਗਰੋਂ ਵੀ ਗੱਡੀ ਚਲਾਉਣ ਦੇ ਦੋਸ਼ ਵਿੱਚ ਪੇਸ਼ ਹੋਇਆ ਸੀ।
ਇਹ ਮਾਮਲਾ 12 ਦਸੰਬਰ 2024 ਸਵੇਰੇ 3.15 ਵਜੇ ਦੇ ਕਰੀਬ ਦਾ ਸੀ, ਜਦੋ ਸੀਸੀਟੀਵੀ ਨੇ ਗੋਰਡਨ ਨੂੰ ਕੈਕੋਹੇ ਪੁਲਿਸ ਸਟੇਸ਼ਨ ਦੇ ਸਾਹਮਣੇ ਵਾਲੇ ਪ੍ਰਵੇਸ਼ ਦੁਆਰ ਦੇ ਰੈਂਪ ‘ਤੇ ਦੌੜਦੇ ਹੋਏ ਕੈਪਚਰ ਕੀਤਾ ਸੀ। ਉਸਨੇ ਸਾਹਮਣੇ ਵਾਲੇ ਦਰਵਾਜ਼ੇ ‘ਤੇ ਜਸਟ ਜੂਸ ਦੀ ਇੱਕ ਬੋਤਲ ਰੱਖੀ ਜਿਸਦੇ ਉੱਪਰੋਂ ਟਿਸ਼ੂ ਪੇਪਰ ਨਿਕਲ ਰਿਹਾ ਸੀ, ਅਸਲ ਵਿੱਚ ਇਹ ਇੱਕ ਮੋਲੋਟੋਵ ਕਾਕਟੇਲ ਸੀ। ਟਿਸ਼ੂ ਨੂੰ ਅੱਗ ਲਗਾਉਣ ਤੋਂ ਬਾਅਦ, ਗੋਰਡਨ ਸੁਰੱਖਿਆ ਕੈਮਰੇ ਦੇ ਦ੍ਰਿਸ਼ ਤੋਂ ਬਾਹਰ ਆ ਗਿਆ ਪਰ ਅੱਗ ਨਹੀਂ ਲੱਗੀ। ਇਸ ਮਗਰੋਂ ਗੋਰਡਨ ਵਾਪਸ ਆਇਆ ਅਤੇ ਬੋਤਲ ਨੂੰ ਦੁਬਾਰਾ ਅੱਗ ਲਗਾਈ। ਇਸ ਵਾਰ ਇਸ ਵਿੱਚ ਅੱਗ ਲੱਗ ਗਈ ਅਤੇ ਫਿਰ ਦਰਵਾਜ਼ੇ ਦੇ ਕੋਲ ਹੀ ਫਟ ਗਈ, ਜਿਸ ਨਾਲ ਸਟੇਸ਼ਨ ਦੇ ਸਾਹਮਣੇ ਕਾਫੀ ਨੁਕਸਾਨ ਹੋਇਆ।
ਘਟਨਾ ਦੌਰਾਨ, ਗੋਰਡਨ ਇੱਕ ਫੋਨ ‘ਤੇ ਰਿਕਾਰਡਿੰਗ ਕਰ ਰਿਹਾ ਸੀ ਅਤੇ ਕਿਸੇ ਨਾਲ ਗੱਲ ਕਰ ਰਿਹਾ ਸੀ। ਜਦੋਂ ਉਸਨੂੰ ਗ੍ਰਿਫ਼ਤਾਰ ਕੀਤਾ ਗਿਆ, ਤਾਂ ਉਸਨੇ ਸਮਝਾਇਆ ਕਿ ਇਹ ਪੁਲਿਸ ‘ਤੇ ਸਿੱਧਾ ਹਮਲਾ ਨਹੀਂ ਸੀ, ਸਗੋਂ ਉਹ ਇੱਕ ਕੁੜੀ ਨੂੰ ਪ੍ਰਭਾਵਿਤ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਜੱਜ ਟੌਮਲਿਨਸਨ ਨੇ ਕਿਹਾ ਕਿ ਗੋਰਡਨ ਦੀਆਂ ਕਾਰਵਾਈਆਂ ਮੂਰਖਤਾਪੂਰਨ ਅਤੇ ਬਚਕਾਨਾ ਸਨ। ਉਨ੍ਹਾਂ ਨੇ ਕਿਹਾ ਕਿ ਇੱਕ ਪੁਲਿਸ ਸਟੇਸ਼ਨ ਨੂੰ ਨਿਸ਼ਾਨਾ ਨਹੀਂ ਬਣਾਇਆ ਜਾਣਾ ਚਾਹੀਦਾ।