ਸ਼੍ਰੇਅਸ ਅਈਅਰ ਭਾਰਤ ਦੇ ਅਗਲੇ ਟੀ-20 ਕਪਤਾਨ ਬਣਨ ਲਈ ਤਿਆਰ ਹਨ। ਉਹ ਸੂਰਿਆਕੁਮਾਰ ਯਾਦਵ ਦੀ ਜਗ੍ਹਾ ਲੈਣਗੇ। ਹਾਲਾਂਕਿ ਐਪੈਕਸ ਕੌਂਸਲ ਦੀ ਔਨਲਾਈਨ ਮੀਟਿੰਗ ਵਿੱਚ ਟੀ-20 ਕਪਤਾਨੀ ਦੇ ਮੁੱਦੇ ‘ਤੇ ਅਧਿਕਾਰਤ ਤੌਰ ‘ਤੇ ਚਰਚਾ ਨਹੀਂ ਕੀਤੀ ਗਈ ਸੀ, ਪਰ ਉੱਚ ਅਧਿਕਾਰੀਆਂ ਨੂੰ ਸ਼੍ਰੇਅਸ ਅਈਅਰ ਨੂੰ ਕਪਤਾਨ ਨਿਯੁਕਤ ਕਰਨ ਦੀ ਇੱਛਾ ਬਾਰੇ ਸੂਚਿਤ ਕਰ ਦਿੱਤਾ ਗਿਆ ਹੈ। 6 ਜੂਨ ਨੂੰ ਕਪਤਾਨ ਦੀ ਚੋਣ ਲਈ ਮੀਟਿੰਗ ਵਿੱਚ ਉਨ੍ਹਾਂ ਨਾਲ ਸਲਾਹ-ਮਸ਼ਵਰਾ ਕੀਤੇ ਜਾਣ ਦੀ ਸੰਭਾਵਨਾ ਹੈ। ਤਿਲਕ ਵਰਮਾ ਨੂੰ ਉਪ ਕਪਤਾਨ ਬਣਾਉਣ ਦੀ ਗੱਲ ਵੀ ਸਾਹਮਣੇ ਆਈ ਹੈ। ਸ਼੍ਰੇਅਸ ਨੂੰ ਕਪਤਾਨ ਬਣਾਉਣ ਦੇ ਨਾਲ ਹੀ ਬੀਸੀਸੀਆਈ ਦੇ ਉੱਚ ਅਧਿਕਾਰੀਆਂ ਨੇ ਵੀ ਤਿਲਕ ਨੂੰ ਉਪ ਕਪਤਾਨ ਬਣਾਉਣ ਲਈ ਸਹਿਮਤੀ ਜਤਾਈ ਹੈ। ਸ਼੍ਰੇਅਸ ਨੂੰ ਕਪਤਾਨ ਅਤੇ ਤਿਲਕ ਨੂੰ ਉਪ ਕਪਤਾਨ ਬਣਾਉਣ ਦਾ ਫੈਸਲਾ ਚੋਣਕਾਰਾਂ ਅਤੇ ਕੋਚਾਂ ਨੇ ਸਰਬਸੰਮਤੀ ਨਾਲ ਲਿਆ ਹੈ।
ਆਇਰਲੈਂਡ ਦੌਰੇ ‘ਤੇ ਹੋਣ ਵਾਲੀ ਟੀ-20 ਲੜੀ ਲਈ ਟੀਮ ਇੰਡੀਆ ਦਾ ਐਲਾਨ 6 ਜੂਨ ਨੂੰ ਕੀਤਾ ਜਾਵੇਗਾ, ਜਿਸ ਵਿੱਚ ਅਈਅਰ ਨੂੰ ਅਧਿਕਾਰਤ ਤੌਰ ‘ਤੇ ਕਪਤਾਨ ਵਜੋਂ ਐਲਾਨਿਆ ਜਾਵੇਗਾ। ਆਇਰਲੈਂਡ ਦੌਰੇ ਵਿੱਚ ਵੈਭਵ ਸੂਰਿਆਵੰਸ਼ੀ ਦੇ ਵੀ ਸ਼ਾਮਿਲ ਹੋਣ ਦੀ ਉਮੀਦ ਹੈ। 15 ਸਾਲਾ ਇਹ ਖਿਡਾਰੀ ਆਈਪੀਐਲ 2026 ਵਿੱਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਖਿਡਾਰੀ ਸੀ। ਉਸਨੇ 16 ਪਾਰੀਆਂ ਵਿੱਚ 776 ਦੌੜਾਂ ਬਣਾਈਆਂ, ਜਿਸ ਵਿੱਚ ਇੱਕ ਸੈਂਕੜਾ ਅਤੇ ਪੰਜ ਅਰਧ ਸੈਂਕੜੇ ਸ਼ਾਮਲ ਹਨ।