ਵਾਈਹੀ (Waihi ) ਦੇ ਇੱਕ ਡੇਅਰੀ ਕਿਸਾਨ ਨੂੰ ਡੇਅਰੀ ਐਫਲੂਐਂਟ (ਗੰਦੇ ਪਾਣੀ) ਦੇ ਗੈਰ-ਕਾਨੂੰਨੀ ਨਿਕਾਸ ਦੇ ਮਾਮਲੇ ਵਿੱਚ ਅਦਾਲਤ ਵੱਲੋਂ $39,000 ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਇਹ ਕਾਰਵਾਈ ਵਾਈਕਾਟੋ ਰੀਜਨਲ ਕੌਂਸਲ ਵੱਲੋਂ ਕੀਤੀ ਗਈ ਪ੍ਰੋਸਿਕਿਊਸ਼ਨ ਤੋਂ ਬਾਅਦ ਹੋਈ ਹੈ। ਕੌਂਸਲ ਦੇ ਅਧਿਕਾਰੀਆਂ ਨੇ ਅਕਤੂਬਰ 2023 ਵਿੱਚ ਕੀਥ ਟੋਰੈਂਸ ਦੇ ਫਾਰਮ ਦੀ ਜਾਂਚ ਕੀਤੀ ਸੀ। ਇਸ ਤੋਂ ਪਹਿਲਾਂ ਵੀ ਉਸ ਨੂੰ ਡੇਅਰੀ ਐਫਲੂਐਂਟ ਨਿਯਮਾਂ ਦੀ ਉਲੰਘਣਾ ਕਰਨ ਕਾਰਨ ਐਬੇਟਮੈਂਟ ਨੋਟਿਸ ਜਾਰੀ ਕੀਤਾ ਗਿਆ ਸੀ। ਜਾਂਚ ਦੌਰਾਨ ਫਾਰਮ ‘ਤੇ ਦੋ ਗੈਰ-ਕਾਨੂੰਨੀ ਨਿਕਾਸ ਸਾਹਮਣੇ ਆਏ, ਜਿਨ੍ਹਾਂ ਵਿੱਚ ਇੱਕ ਡੇਅਰੀ ਸ਼ੈੱਡ ਤੋਂ ਅਤੇ ਦੂਜਾ ਵੱਧ ਸਿੰਚਾਈ (Overirrigation) ਕਾਰਨ ਹੋਇਆ ਸੀ। ਅਧਿਕਾਰੀਆਂ ਮੁਤਾਬਿਕ ਇਸ ਨਾਲ ਭੂਮੀਗਤ ਪਾਣੀ ਪ੍ਰਦੂਸ਼ਿਤ ਹੋਣ ਦਾ ਗੰਭੀਰ ਖਤਰਾ ਪੈਦਾ ਹੋ ਗਿਆ ਸੀ।
ਟੌਰੈਂਸ ਦੇ ਫਾਰਮ ‘ਤੇ ਗੰਦੇ ਪਾਣੀ ਨੂੰ ਸਟੋਰ ਕਰਨ ਲਈ ਲੋੜੀਂਦੀ ਸਮਰੱਥਾ ਨਾ ਹੋਣ ਕਾਰਨ ਅਣਉਚਿਤ ਮੌਸਮ ਅਤੇ ਮਿੱਟੀ ਦੀਆਂ ਸਥਿਤੀਆਂ ਵਿੱਚ ਵੀ ਐਫਲੂਐਂਟ ਦੀ ਸਿੰਚਾਈ ਕੀਤੀ ਜਾਂਦੀ ਰਹੀ। ਟੌਰੈਂਸ ਨੇ Resource Management Act ਤਹਿਤ ਲੱਗੇ ਦੋਸ਼ ਨੂੰ ਕਬੂਲ ਕਰ ਲਿਆ, ਜਿਸ ਤੋਂ ਬਾਅਦ ਟੌਰੰਗਾ ਡਿਸਟ੍ਰਿਕਟ ਕੋਰਟ ਦੀ ਜੱਜ ਸ਼ੀਨਾ ਟੇਪਾਨੀਆ ਨੇ ਉਸ ਨੂੰ $39,000 ਜੁਰਮਾਨਾ ਕੀਤਾ।
ਸਜ਼ਾ ਸੁਣਾਉਂਦੇ ਹੋਏ ਜੱਜ ਨੇ ਕਿਹਾ ਕਿ ਇਹ ਲਾਪਰਵਾਹੀ ਦਾ ਮਾਮਲਾ ਸੀ ਅਤੇ ਫਾਰਮ ਮਾਲਕ ਦੀ ਜ਼ਿੰਮੇਵਾਰੀ ਸੀ ਕਿ ਉਹ ਪ੍ਰਭਾਵਸ਼ਾਲੀ ਢਾਂਚਾ ਅਤੇ ਪ੍ਰਬੰਧਨ ਯਕੀਨੀ ਬਣਾਏ। ਅਦਾਲਤ ਨੇ ਇਹ ਵੀ ਨੋਟ ਕੀਤਾ ਕਿ ਟੌਰੈਂਸ ਨੇ ਕਈ ਸਾਲ ਪਹਿਲਾਂ ਐਫਲੂਐਂਟ ਸਟੋਰੇਜ ਬਲੈਡਰ ਖਰੀਦਿਆ ਹੋਇਆ ਸੀ, ਪਰ ਉਸ ਨੂੰ ਕਦੇ ਵੀ ਸਥਾਪਤ ਨਹੀਂ ਕੀਤਾ ਗਿਆ।
ਵਾਈਕਾਟੋ ਰੀਜਨਲ ਕੌਂਸਲ ਦੇ ਕੰਪਲਾਇੰਸ ਮੈਨੇਜਰ ਪੈਟ੍ਰਿਕ ਲਿੰਚ ਨੇ ਕਿਹਾ ਕਿ ਡੇਅਰੀ ਫਾਰਮਾਂ ਦੇ ਐਫਲੂਐਂਟ ਸਿਸਟਮ ਮਜ਼ਬੂਤ ਅਤੇ ਉਦੇਸ਼ ਅਨੁਸਾਰ ਹੋਣੇ ਚਾਹੀਦੇ ਹਨ ਤਾਂ ਜੋ ਵਾਤਾਵਰਣ ਨੂੰ ਨੁਕਸਾਨ ਤੋਂ ਬਚਾਇਆ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਪਹਿਲਾਂ ਚੇਤਾਵਨੀਆਂ ਅਤੇ ਨੋਟਿਸ ਜਾਰੀ ਹੋਣ ਦੇ ਬਾਵਜੂਦ ਨਿਯਮਾਂ ਦੀ ਪਾਲਣਾ ਨਾ ਕਰਨਾ ਗੰਭੀਰ ਮਾਮਲਾ ਹੈ।