ਇਮੀਗ੍ਰੇਸ਼ਨ ਨਿਊਜ਼ੀਲੈਂਡ (INZ) ਇੱਕ ਵਾਰ ਫਿਰ ਆਪਣੇ ਇੱਕ ਫੈਸਲੇ ਦੇ ਕਾਰਨ ‘ਚ ਚਰਚਾ ਦੇ ਵਿੱਚ ਹੈ। ਦਰਅਸਲ ਵਿਭਾਗ ਨੇ ਮੰਗਲਵਾਰ ਨੂੰ ਨਵਦੀਪ ਸਿੰਘ ਧੀਮਾਨ ਨਾਮ ਦੇ ਭਾਰਤੀ ਨਾਗਰਿਕ ਨੂੰ ਦਿੱਲੀ ਭੇਜ ਦਿੱਤਾ ਸੀ ਯਾਨੀ ਕਿ ਡਿਪੋਰਟ ਕਰ ਦਿੱਤਾ ਸੀ ਜਦਕਿ ਉਸ ਕੋਲ ਅਜੇ ਵੀ ਆਪਣੀ ਵੀਜ਼ਾ ਅਪੀਲ ਲਈ ਕਾਨੂੰਨੀ ਸਮਾਂ ਬਾਕੀ ਸੀ। ਪਰ ਹੁਣ ਇਸ ਮਸਲੇ ਦੇ ਚਰਚਾ ‘ਚ ਆਉਣ ਮਗਰੋਂ ਸ਼ੁੱਕਰਵਾਰ ਤੱਕ INZ ਨੇ ਆਪਣੀ ਗਲਤੀ ਮੰਨ ਜਿੱਥੇ ਮਾਫ਼ੀ ਮੰਗੀ ਉੱਥੇ ਹੀ ਉਸ ਦੀ ਵਾਪਸੀ ਦੀ ਟਿਕਟ ਦਾ ਖ਼ਰਚਾ ਚੁਕਾਉਣ ਲਈ ਸਹਿਮਤੀ ਦਿੱਤੀ ਹੈ। ਉਸ ਨੂੰ ਤਿੰਨ ਮਹੀਨੇ ਦਾ ਵਿਜ਼ਟਰ ਵੀਜ਼ਾ ਵੀ ਜਾਰੀ ਕਰ ਦਿੱਤਾ ਗਿਆ ਹੈ ਅਤੇ ਉਸਦੀ ਅਪੀਲ ਦਾ ਅਧਿਕਾਰ ਮੁੜ ਬਹਾਲ ਹੋ ਗਿਆ ਹੈ। ਯਾਨੀ ਕਿ ਭਾਰਤ ਡਿਪੋਰਟ ਕੀਤੇ ਗਏ ਨਵਦੀਪ ਸਿੰਘ ਨੂੰ ਹੁਣ ਸਰਕਾਰੀ ਖ਼ਰਚੇ ‘ਤੇ ਮੁੜ ਨਿਊਜ਼ੀਲੈਂਡ ਵਾਪਸ ਲਿਆਂਦਾ ਜਾ ਰਿਹਾ ਹੈ।
ਨਵਦੀਪ ਸਿੰਘ ਦੇ ਵਕੀਲਾਂ ਨੇ ਕਿਹਾ ਕਿ ਇਮੀਗਰੇਸ਼ਨ ਨੇ ਆਪਣੀ “ਪਾਵਰ ਦੀ ਗਲਤ ਵਰਤੋਂ” ਕੀਤੀ ਹੈ ਪਰ ਹੁਣ ਵਿਭਾਗ ਨੇ ਆਪਣੀ ਗਲਤੀ ਮੰਨ ਲਈ ਹੈ। ਦੱਸ ਦੇਈਏ INZ ਵੱਲੋਂ ਇਸ ਨੂੰ “ਮਨੁੱਖੀ ਗਲਤੀ” ਦੱਸਿਆ ਗਿਆ ਹੈ। ਨਵਦੀਪ ਨੇ ਮਾਮਲੇ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਇਹ ਤਜਰਬਾ ਉਸ ਲਈ ਬਹੁਤ ਹੀ ਸ਼ਰਮਨਾਕ ਸੀ। “35 ਸਾਲਾਂ ਵਿੱਚ ਮੈਂ ਕਦੇ ਕੋਈ ਜੁਰਮ ਨਹੀਂ ਕੀਤਾ, ਨਾ ਹੀ ਭਾਰਤ ਵਿੱਚ, ਨਾ ਹੀ ਨਿਊਜ਼ੀਲੈਂਡ ਵਿੱਚ। ਇਹ ਪਹਿਲੀ ਵਾਰ ਸੀ ਜਦੋਂ ਮੈਨੂੰ ਹੱਥਕੜੀਆਂ ਪਾਈਆਂ ਗਈਆਂ। ਮੈਨੂੰ ਬੇਗੁਨਾਹ ਹੋਣ ਦੇ ਬਾਵਜੂਦ ਅਪਰਾਧੀ ਵਾਂਗ ਸਲੂਕ ਕੀਤਾ ਗਿਆ,”।