ਨਿਊਜ਼ੀਲੈਂਡ ਦੇ Auckland ਦੀ ਸਿਰਫ 14 ਸਾਲਾ ਸੇਲਿੰਗ ਖਿਡਾਰਨ Zofia Wells ਨੇ ਵੱਡੀ ਉਪਲਬਧੀ ਹਾਸਿਲ ਕਰਦਿਆਂ ਦੇਸ਼ ਦੇ ਪ੍ਰਸਿੱਧ ਜੂਨੀਅਰ ਸੇਲਿੰਗ ਟੂਰਨਾਮੈਂਟ New Zealand Optimist National Championships ਦਾ ਓਵਰਆਲ ਖਿਤਾਬ ਆਪਣੇ ਨਾਮ ਕਰ ਲਿਆ ਹੈ। ਉਹ ਇਸ ਮੁਕਾਬਲੇ ਦਾ ਓਵਰਆਲ ਖਿਤਾਬ ਜਿੱਤਣ ਵਾਲੀ ਪਹਿਲੀ ਲੜਕੀ ਬਣ ਗਈ ਹੈ। Zofia ਨੇ 85 ਹੋਰ ਖਿਡਾਰੀਆਂ ਨੂੰ ਪਿੱਛੇ ਛੱਡਦਿਆਂ ਕਰੀਬ 18 ਅੰਕਾਂ ਦੇ ਵੱਡੇ ਫਰਕ ਨਾਲ ਜਿੱਤ ਦਰਜ ਕੀਤੀ ਹੈ।
Glendowie Boating Club ਨਾਲ ਸਬੰਧਿਤ Zofia ਨੇ New Plymouth Yacht Club ਵਿੱਚ ਹੋਏ ਚਾਰ ਦਿਨਾਂ ਦੇ ਇਸ ਟੂਰਨਾਮੈਂਟ ਦੌਰਾਨ ਬੇਹਤਰੀਨ ਪ੍ਰਦਰਸ਼ਨ ਕੀਤਾ। ਉਸਨੇ ਕੁੱਲ 7 ਰੇਸਾਂ ਵਿੱਚ ਜਿੱਤ ਹਾਸਲ ਕੀਤੀ—5 ਕਵਾਲੀਫਾਇੰਗ ਅਤੇ 2 ਫਾਈਨਲ ਰੇਸਾਂ—ਜੋ ਉਸਦੀ ਲਗਾਤਾਰ ਮਜ਼ਬੂਤੀ ਨੂੰ ਦਰਸਾਉਂਦਾ ਹੈ।
ਹਾਲਾਂਕਿ ਲੜਕੀਆਂ ਲਈ ਵੱਖਰੀਆਂ ਸ਼੍ਰੇਣੀਆਂ ਪਹਿਲਾਂ ਤੋਂ ਮੌਜੂਦ ਹਨ, ਪਰ ਪਹਿਲੀ ਵਾਰ ਕਿਸੇ ਲੜਕੀ ਨੇ ਓਵਰਆਲ ਟਾਈਟਲ ਜਿੱਤਿਆ ਹੈ। Zofia, ਜੋ ਪਹਿਲਾਂ ਵੀ ਦੋ ਵਾਰ ਗਰਲਜ਼ ਚੈਂਪਿਅਨ ਰਹਿ ਚੁੱਕੀ ਹੈ, ਨੇ ਆਪਣੀ ਜਿੱਤ ਨੂੰ “ਅਵਿਸ਼ਵਾਸ਼ਯੋਗ” ਕਰਾਰ ਦਿੱਤਾ। Yachting New Zealand ਦੇ ਅਧਿਕਾਰੀਆਂ ਨੇ ਇਸ ਸਫਲਤਾ ਨੂੰ ਇਕ ਵੱਡਾ ਮੀਲ ਪੱਥਰ ਦੱਸਿਆ ਹੈ। ਉਨ੍ਹਾਂ ਮੁਤਾਬਕ, ਇਸ ਵਾਰ ਦੋ ਲੜਕੀਆਂ ਦਾ ਟਾਪ 5 ਵਿੱਚ ਆਉਣਾ ਵੀ ਇੱਕ ਖਾਸ ਗੱਲ ਹੈ, ਜੋ 2009 ਤੋਂ ਬਾਅਦ ਪਹਿਲੀ ਵਾਰ ਦੇਖਣ ਨੂੰ ਮਿਲਿਆ ਹੈ।