Air New Zealand ਦੀ ਆਕਲੈਂਡ ਤੋਂ ਟੌਰੰਗਾ ਜਾ ਰਹੀ ਇੱਕ ਉਡਾਣ ਨੂੰ ਬੀਤੀ ਰਾਤ ਹਵਾਈ ਅੱਡੇ ਦੇ ਨੇੜੇ ਆਸਮਾਨ ਵਿੱਚ ਉੱਡ ਰਹੀਆਂ ਲੈਂਟਰਨਾਂ *Lanterns * ਕਾਰਨ ਲੈਂਡਿੰਗ ਰੱਦ ਕਰਕੇ ਵਾਪਸ ਆਕਲੈਂਡ ਮੋੜਨਾ ਪਿਆ। ਏਅਰ ਨਿਊਜ਼ੀਲੈਂਡ ਦੇ ਬੁਲਾਰੇ ਮੁਤਾਬਕ, ਫਲਾਈਟ NZ5145 ਆਕਲੈਂਡ ਤੋਂ ਟੌਰੰਗਾ ਲਈ ਰਵਾਨਾ ਹੋਈ ਸੀ, ਪਰ ਰਨਵੇ ਦੇ ਨੇੜੇ ਸਕਾਈ ਲੈਂਟਰਨਾਂ ਦੇਖੇ ਜਾਣ ਕਾਰਨ ਜਹਾਜ਼ ਨੂੰ ਵਾਪਸ ਮੋੜਿਆ ਗਿਆ। FlightRadar24 ਦੇ ਡਾਟਾ ਅਨੁਸਾਰ ਜਹਾਜ਼ ਨੇ ਲੈਂਡਿੰਗ ਤੋਂ ਪਹਿਲਾਂ ਕਰੀਬ 20 ਮਿੰਟ ਤੱਕ Matakana Island ਦੇ ਉੱਪਰ ਚੱਕਰ ਲਗਾਏ ਅਤੇ ਬਾਅਦ ਵਿੱਚ ਵਾਪਸ ਆਕਲੈਂਡ ਚਲਾ ਗਿਆ।
ਪੁਲਿਸ ਨੇ ਦੱਸਿਆ ਕਿ ਰਾਤ ਕਰੀਬ 9 ਵਜੇ ਏਅਰ ਟ੍ਰੈਫਿਕ ਕੰਟਰੋਲ ਵੱਲੋਂ ਸੂਚਨਾ ਮਿਲੀ ਸੀ ਕਿ ਕਿਸੇ ਅਣਪਛਾਤੇ ਸਥਾਨ ਤੋਂ ਲੈਂਟਰਨਾਂ ਛੱਡੀਆਂ ਗਈਆਂ ਹਨ ਜੋ Tauranga Airport ਦੇ ਫਲਾਈਟ ਪਾਥ ਵਿੱਚ ਆ ਰਹੀਆਂ ਹਨ। ਪੁਲਿਸ ਵੱਲੋਂ ਸੰਬੰਧਤ ਇਲਾਕੇ ਵਿੱਚ ਜਾਂਚ ਕੀਤੀ ਗਈ, ਪਰ ਉੱਥੇ ਕੋਈ ਵਿਅਕਤੀ ਨਹੀਂ ਮਿਲਿਆ ਅਤੇ ਨਾ ਹੀ ਹੋਰ ਲੈਂਟਰਨਾਂ ਛੱਡੀਆਂ ਗਈਆਂ।
Civil Aviation Authority (CAA) ਨੇ ਵੀ ਘਟਨਾ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦਿਆਂ ਲੋਕਾਂ ਨੂੰ ਹਵਾਈ ਅੱਡਿਆਂ ਦੇ ਨੇੜੇ ਜਾਂ ਜਹਾਜ਼ੀ ਆਵਾਜਾਈ ‘ਤੇ ਅਸਰ ਪਾਉਣ ਵਾਲੀਆਂ ਚੀਜ਼ਾਂ ਹਵਾ ਵਿੱਚ ਨਾ ਛੱਡਣ ਦੀ ਅਪੀਲ ਕੀਤੀ ਜਾਂਦੀ ਹੈ।
ਫਲਾਈਟ ਵਿੱਚ ਸਵਾਰ ਯਾਤਰੀ ਰੇਬੇਕਾ ਸ਼ਾਰਪ ਨੇ ਦੱਸਿਆ ਕਿ ਜਹਾਜ਼ ਲੈਂਡਿੰਗ ਦੇ ਬਹੁਤ ਨੇੜੇ ਸੀ ਜਦੋਂ ਅਚਾਨਕ ਉਸਨੂੰ ਮੋੜ ਦਿੱਤਾ ਗਿਆ। ਉਸਨੇ ਕਿਹਾ, “ਪਾਇਲਟ ਨੇ ਦੱਸਿਆ ਕਿ ਹਵਾਈ ਖੇਤਰ ਵਿੱਚ ਚਾਈਨੀਜ਼ ਲੈਂਟਰਨਾਂ ਆ ਗਈਆਂ ਹਨ ਅਤੇ ਜਹਾਜ਼ ਨੂੰ ਹੋਲਡਿੰਗ ਪੈਟਰਨ ਵਿੱਚ ਰੱਖਿਆ ਗਿਆ ਹੈ। ਬਾਅਦ ਵਿੱਚ ਕਿਹਾ ਗਿਆ ਕਿ ਹਾਲਾਤ ਸੁਰੱਖਿਅਤ ਨਹੀਂ ਹਨ, ਇਸ ਲਈ ਜਹਾਜ਼ ਵਾਪਸ ਆਕਲੈਂਡ ਜਾਵੇਗਾ।”
ਰੇਬੇਕਾ ਨੇ ਦੱਸਿਆ ਕਿ ਉਸਦੀ ਧੀ, ਜੋ ਟੌਰੰਗਾ ਹਵਾਈ ਅੱਡੇ ‘ਤੇ ਉਸਦੀ ਉਡੀਕ ਕਰ ਰਹੀ ਸੀ, ਨੇ ਲੈਂਟਰਨਾਂ ਨੂੰ “ਤਾਰਿਆਂ ਦੇ ਵੱਡੇ ਗੁੱਛੇ” ਵਾਂਗ ਦਿਖਾਈ ਦੇਣ ਬਾਰੇ ਦੱਸਿਆ। ਆਕਲੈਂਡ ਵਾਪਸ ਪਹੁੰਚਣ ਤੋਂ ਬਾਅਦ ਰੇਬੇਕਾ ਨੇ ਕਾਰ ਕਿਰਾਏ ‘ਤੇ ਲੈ ਕੇ ਟੌਰੰਗਾ ਤੱਕ ਸਫ਼ਰ ਕੀਤਾ। ਉਸਨੇ ਕਿਹਾ ਕਿ ਕਈ ਯਾਤਰੀਆਂ ਨੂੰ ਹੋਰ ਪ੍ਰਬੰਧ ਕਰਨ ਲਈ ਕਾਫ਼ੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ ਅਤੇ ਕੁਝ ਲੋਕਾਂ ਨੂੰ ਅਗਲੇ ਦਿਨ ਤੱਕ ਵੀ ਸਫ਼ਰ ਕਰਨਾ ਪਿਆ।