ਆਕਲੈਂਡ: ਨਿਊਜ਼ੀਲੈਂਡ ਵਿੱਚ ਡਰਾਈਵਰ ਟੈਸਟਿੰਗ ਅਫਸਰਾਂ ਖ਼ਿਲਾਫ਼ ਚੱਲ ਰਹੀ ਵੱਡੀ ਜਾਂਚ ਦਰਮਿਆਨ ਮੁਅੱਤਲ ਕੀਤੀ ਗਈ ਆਕਲੈਂਡ ਦੀ ਇੱਕ ਡਰਾਈਵਰ ਟੈਸਟਿੰਗ ਅਫਸਰ ਨੇ ਆਪਣੇ ਟੈਸਟਿੰਗ ਰਿਕਾਰਡ ਦਾ ਬਚਾਅ ਕਰਦਿਆਂ ਕਿਹਾ ਹੈ ਕਿ ਉਸ ਵੱਲੋਂ ਲਏ ਗਏ ਹਰ ਟੈਸਟ “ਨਿਰਪੱਖ ਅਤੇ ਪਾਰਦਰਸ਼ੀ” ਸਨ।
ਨਿਊਜ਼ੀਲੈਂਡ ਟਰਾਂਸਪੋਰਟ ਏਜੰਸੀ (NZTA) ਨੇ ਦੇਸ਼ ਭਰ ਵਿੱਚ ਯਾਤਰੀ ਅਤੇ ਭਾਰੀ ਵਾਹਨਾਂ ਦੇ ਡਰਾਈਵਿੰਗ ਟੈਸਟਾਂ ਦੇ ਅਸਧਾਰਨ ਨਤੀਜਿਆਂ ਦੀ ਜਾਂਚ ਸ਼ੁਰੂ ਕੀਤੀ ਹੈ। ਇਸ ਜਾਂਚ ਦੇ ਹਿੱਸੇ ਵਜੋਂ 16 ਡਰਾਈਵਰ ਟੈਸਟਿੰਗ ਅਫਸਰਾਂ ਨੂੰ ਮੁਅੱਤਲ ਕੀਤਾ ਗਿਆ ਹੈ, ਜਦਕਿ ਹੋਰ ਸੱਤ ਨੂੰ ਡਿਊਟੀ ਤੋਂ ਹਟਾਇਆ ਗਿਆ ਹੈ। ਲਗਭਗ 650 ਡਰਾਈਵਰਾਂ ਨੂੰ ਮੁੜ ਟੈਸਟ ਦੇਣ ਦੀ ਲੋੜ ਪੈ ਸਕਦੀ ਹੈ।
ਆਕਲੈਂਡ ਆਧਾਰਿਤ ਟੈਸਟਿੰਗ ਅਫਸਰ ਮਾਈਕੈਲਾ ਹਾਓ ਵੀ ਮੁਅੱਤਲ ਕੀਤੇ ਗਏ ਅਧਿਕਾਰੀਆਂ ਵਿੱਚ ਸ਼ਾਮਿਲ ਹੈ। ਉਹ VTNZ ABC Manukau ਅਤੇ VTNZ Sylvia Park ਵਿੱਚ ਡਰਾਈਵਿੰਗ ਟੈਸਟ ਲੈਂਦੀ ਸੀ।
ਪਾਸ ਦਰਾਂ ਵਿੱਚ ਵੱਡੇ ਫਰਕ ਦਾ ਹਵਾਲਾ
NZTA ਵੱਲੋਂ ਜੁਲਾਈ ਵਿੱਚ ਹਾਓ ਨੂੰ ਭੇਜੇ ਪੱਤਰ ਵਿੱਚ ਕਿਹਾ ਗਿਆ ਕਿ ਉਸ ਦੀਆਂ ਪਾਸ ਦਰਾਂ ਰਾਸ਼ਟਰੀ ਔਸਤ ਨਾਲੋਂ ਕਾਫ਼ੀ ਜ਼ਿਆਦਾ ਸਨ, ਖਾਸ ਤੌਰ ’ਤੇ ਫਿਲੀਪੀਨਜ਼ ਅਤੇ ਚੀਨ ਵਿੱਚ ਜਨਮੇ ਉਮੀਦਵਾਰਾਂ ਦੇ ਮਾਮਲੇ ਵਿੱਚ।
ਏਜੰਸੀ ਮੁਤਾਬਿਕ ਇੰਨੇ ਉੱਚੇ ਪਾਸ ਰੇਟ ਸਿਰਫ਼ ਇਤਫ਼ਾਕ ਨਾਲ ਹੋਣ ਦੀ ਸੰਭਾਵਨਾ ਬਹੁਤ ਘੱਟ ਸੀ। NZTA ਨੇ ਕਿਹਾ ਕਿ ਇਸ ਨਾਲ ਇਹ ਸੰਕੇਤ ਮਿਲਦਾ ਹੈ ਕਿ ਟੈਸਟ ਕਰਵਾਉਣ ਦੇ ਢੰਗ ਵਿੱਚ ਅੰਤਰ ਇਸ ਦਾ ਕਾਰਨ ਹੋ ਸਕਦਾ ਹੈ।
ਬਾਅਦ ਵਿੱਚ NZTA ਨੇ ਹਾਓ ਦੀ ਡਰਾਈਵਰ ਟੈਸਟਿੰਗ ਅਫਸਰ ਵਜੋਂ ਐਂਡੋਰਸਮੈਂਟ ਰੱਦ ਕਰਨ ਦਾ ਫ਼ੈਸਲਾ ਕੀਤਾ ਅਤੇ ਉਸ ਨੂੰ ਇਹ ਡਿਊਟੀ ਕਰਨ ਤੋਂ ਰੋਕ ਦਿੱਤਾ ਗਿਆ।
NZTA ਦੇ ਅਨੁਸਾਰ, ਉਪਲਬਧ ਜਾਣਕਾਰੀ ਤੋਂ ਇਹ ਖਦਸ਼ਾ ਪੈਦਾ ਹੋਇਆ ਕਿ ਕੁਝ ਟੈਸਟ ਨਿਰਧਾਰਤ ਮਾਪਦੰਡਾਂ ਮੁਤਾਬਕ ਨਹੀਂ ਲਏ ਗਏ ਹੋ ਸਕਦੇ ਹਨ ਅਤੇ ਕੁਝ ਉਮੀਦਵਾਰਾਂ ਨੂੰ ਲੋੜੀਂਦੇ ਹੁਨਰ ਸਾਬਤ ਕੀਤੇ ਬਿਨਾਂ ਲਾਇਸੈਂਸ ਮਿਲਿਆ ਹੋ ਸਕਦਾ ਹੈ। ਏਜੰਸੀ ਨੇ ਇਸ ਨੂੰ ਸੜਕ ਸੁਰੱਖਿਆ ਲਈ ਮਹੱਤਵਪੂਰਨ ਖ਼ਤਰਾ ਦੱਸਿਆ।
ਹਾਓ ਨੇ ਅੰਕੜਿਆਂ ’ਤੇ ਚੁੱਕੇ ਸਵਾਲ
ਹਾਓ ਨੇ ਕਿਹਾ ਕਿ NZTA “ਸਿਰਫ਼ ਠੰਡੇ ਅੰਕੜਿਆਂ” ’ਤੇ ਨਿਰਭਰ ਕਰ ਰਹੀ ਹੈ ਅਤੇ ਟੈਸਟਿੰਗ ਸੈਂਟਰਾਂ ਦੇ ਅਸਲ ਹਾਲਾਤਾਂ ਨੂੰ ਨਜ਼ਰਅੰਦਾਜ਼ ਕੀਤਾ ਜਾ ਰਿਹਾ ਹੈ।
ਉਨ੍ਹਾਂ ਮੁਤਾਬਕ Manukau ਅਤੇ Sylvia Park ਵਰਗੇ ਵੱਡੇ ਆਕਲੈਂਡ ਟੈਸਟਿੰਗ ਸੈਂਟਰਾਂ ਵਿੱਚ ਉਮੀਦਵਾਰਾਂ ਦੀ ਗਿਣਤੀ ਅਤੇ ਪਿਛੋਕੜ ਹੋਰ ਖੇਤਰਾਂ ਨਾਲੋਂ ਵੱਖਰੀ ਹੁੰਦੀ ਹੈ, ਜਿਸ ਕਾਰਨ ਪਾਸ ਦਰਾਂ ਵਿੱਚ ਕੁਦਰਤੀ ਤੌਰ ’ਤੇ ਫ਼ਰਕ ਆ ਸਕਦਾ ਹੈ।
ਹਾਓ ਨੇ ਕਿਹਾ ਕਿ ਉਨ੍ਹਾਂ ਨੇ ਕਦੇ ਵੀ ਕਿਸੇ ਡਰਾਈਵਰ ਨੂੰ ਪਾਸ ਕਰਵਾਉਣ ਲਈ ਕੋਈ ਗਲਤ ਤਰੀਕਾ ਨਹੀਂ ਵਰਤਿਆ।
ਉਨ੍ਹਾਂ ਦਾ ਕਹਿਣਾ ਹੈ, “ਮੇਰੇ ਵੱਲੋਂ ਲਿਆ ਗਿਆ ਹਰ ਟੈਸਟ ਨਿਰਪੱਖ, ਪਾਰਦਰਸ਼ੀ ਅਤੇ ਉਸ ਦਿਨ ਡਰਾਈਵਰ ਦੀ ਅਸਲ ਕਾਰਗੁਜ਼ਾਰੀ ’ਤੇ ਆਧਾਰਿਤ ਸੀ।”
ਉਨ੍ਹਾਂ ਨੇ NZTA ਦੀ ਕਾਰਵਾਈ ਨੂੰ “ਦਰਦਨਾਕ ਅਤੇ ਨਾਇਨਸਾਫ਼” ਕਰਾਰ ਦਿੰਦਿਆਂ ਕਿਹਾ ਕਿ ਏਜੰਸੀ ਨੇ ਉਨ੍ਹਾਂ ਨਾਲ ਬੈਠ ਕੇ ਗੱਲ ਕਰਨ ਜਾਂ ਉਨ੍ਹਾਂ ਦੇ ਟੈਸਟਿੰਗ ਤਰੀਕੇ ਦੀ ਵਿਸਥਾਰ ਨਾਲ ਜਾਂਚ ਕਰਨ ਦਾ ਮੌਕਾ ਨਹੀਂ ਦਿੱਤਾ।
NZTA ਨੇ ਕੀ ਕਿਹਾ?
ਇੱਕ ਚੈੱਨਲ ਦੇ ਸਵਾਲਾਂ ਦੇ ਜਵਾਬ ਵਿੱਚ NZTA ਨੇ ਕਿਹਾ ਕਿ ਹਾਓ ਵੱਲੋਂ ਲਏ ਗਏ ਟੈਸਟਾਂ ਵਿੱਚ ਦੋ ਦੇਸ਼ਾਂ ਦੇ ਉਮੀਦਵਾਰਾਂ ਦੀ ਪਾਸ ਦਰ ਰਾਸ਼ਟਰੀ ਔਸਤ ਨਾਲੋਂ “ਕਾਫ਼ੀ ਜ਼ਿਆਦਾ” ਸੀ।
ਏਜੰਸੀ ਅਨੁਸਾਰ, ਫਿਲੀਪੀਨਜ਼ ਵਿੱਚ ਜਨਮੇ ਉਮੀਦਵਾਰਾਂ ਦੀ ਹਾਓ ਵੱਲੋਂ ਲਏ ਗਏ ਟੈਸਟਾਂ ਵਿੱਚ ਪਾਸ ਦਰ 70.2 ਫ਼ੀਸਦੀ ਸੀ, ਜਦਕਿ ਰਾਸ਼ਟਰੀ ਔਸਤ 40.1 ਫ਼ੀਸਦੀ ਸੀ। ਚੀਨ ਵਿੱਚ ਜਨਮੇ ਉਮੀਦਵਾਰਾਂ ਲਈ ਇਹ ਦਰ 75.9 ਫ਼ੀਸਦੀ ਸੀ, ਜਦਕਿ ਰਾਸ਼ਟਰੀ ਔਸਤ 47.3 ਫ਼ੀਸਦੀ ਸੀ।
NZTA ਨੇ ਕਿਹਾ ਕਿ ਅੰਕੜਿਆਂ ਦਾ ਵਿਸ਼ਲੇਸ਼ਣ “ਢੁਕਵਾਂ ਅਤੇ ਮਜ਼ਬੂਤ” ਸੀ ਅਤੇ ਇਸ ਦਾ ਮਕਸਦ ਉਨ੍ਹਾਂ ਪਾਸ ਦਰਾਂ ਦੀ ਪਛਾਣ ਕਰਨਾ ਸੀ ਜੋ ਆਮ ਕੁਦਰਤੀ ਤਬਦੀਲੀ ਰਾਹੀਂ ਸਮਝਾਉਣੀਆਂ ਮੁਸ਼ਕਲ ਸਨ।
ਏਜੰਸੀ ਨੇ ਇਹ ਵੀ ਦੱਸਿਆ ਕਿ ਉਸ ਨੇ ਹਾਓ ਵਰਗੀਆਂ ਪਾਸ ਦਰਾਂ ਦੇ ਸਿਰਫ਼ ਇਤਫ਼ਾਕ ਨਾਲ ਸਾਹਮਣੇ ਆਉਣ ਦੀ ਸੰਭਾਵਨਾ ਦਾ ਮੁਲਾਂਕਣ ਕਰਨ ਲਈ ਇੱਕ ਬਾਹਰੀ ਅੰਕੜਾ ਵਿਗਿਆਨੀ ਦੀ ਸਹਾਇਤਾ ਵੀ ਲਈ।
ਹਾਓ ਦਾ ਡਰਾਈਵਿੰਗ ਇੰਸਟ੍ਰਕਟਰ ਐਂਡੋਰਸਮੈਂਟ ਵੀ ਮੁਅੱਤਲ ਹੈ। NZTA ਨੇ ਕਿਹਾ ਹੈ ਕਿ ਕੁਝ ਨਿਰਧਾਰਤ ਸ਼ਰਤਾਂ ਪੂਰੀਆਂ ਕਰਨ ਤੋਂ ਬਾਅਦ ਇਸ ਮੁਅੱਤਲੀ ਨੂੰ ਵਾਪਸ ਲਿਆ ਜਾ ਸਕਦਾ ਹੈ। ਹਾਓ ਨੂੰ ਇਸ ਫ਼ੈਸਲੇ ਖ਼ਿਲਾਫ਼ ਅਪੀਲ ਕਰਨ ਦਾ ਹੱਕ ਵੀ ਦਿੱਤਾ ਗਿਆ ਹੈ।