ਆਕਲੈਂਡ: ਐਲਰਸਲੀ ਵਿਲੇਜ ਵਿੱਚ ਅੱਜ ਸਵੇਰੇ ਇੱਕ ਬੱਸ ਵੱਲੋਂ ਖੰਭੇ ਨੂੰ ਟੱਕਰ ਮਾਰਨ ਤੋਂ ਬਾਅਦ ਡਿੱਗੇ ਸਾਈਨਪੋਸਟ ਦੀ ਲਪੇਟ ਵਿੱਚ ਆ ਕੇ ਇੱਕ ਸਕੂਲੀ ਵਿਦਿਆਰਥਣ ਜ਼ਖਮੀ ਹੋ ਗਈ।
ਪੁਲਿਸ ਮੁਤਾਬਕ ਇਹ ਹਾਦਸਾ ਸਵੇਰੇ ਕਰੀਬ 8 ਵਜੇ Main Highway, Ellerslie Village ਵਿੱਚ ਵਾਪਰਿਆ। ਵਿਦਿਆਰਥਣ ਉਸ ਸਮੇਂ ਫੁੱਟਪਾਥ ’ਤੇ ਸੀ, ਜਦੋਂ ਇੱਕ ਬੱਸ ਨੇ ਖੰਭੇ ਨੂੰ ਟੱਕਰ ਮਾਰੀ। ਟੱਕਰ ਕਾਰਨ ਖੰਭਾ ਡਿੱਗ ਗਿਆ ਅਤੇ ਵਿਦਿਆਰਥਣ ਇਸ ਦੀ ਲਪੇਟ ਵਿੱਚ ਆ ਗਈ।
ਹਾਦਸੇ ਦੀ ਸੂਚਨਾ ਮਿਲਣ ’ਤੇ St John ਦੀ ਐਂਬੂਲੈਂਸ ਅਤੇ ਇੱਕ ਓਪਰੇਸ਼ਨਜ਼ ਮੈਨੇਜਰ ਮੌਕੇ ’ਤੇ ਪਹੁੰਚੇ। St John ਦੇ ਬੁਲਾਰੇ ਨੇ ਦੱਸਿਆ ਕਿ ਇੱਕ ਮਰੀਜ਼ ਦਾ ਮੌਕੇ ’ਤੇ ਹੀ ਮੁਆਇਨਾ ਕਰਕੇ ਇਲਾਜ ਕੀਤਾ ਗਿਆ। ਵਿਦਿਆਰਥਣ ਦੀ ਹਾਲਤ ਮਾਮੂਲੀ ਦੱਸੀ ਗਈ ਅਤੇ ਉਸ ਨੂੰ ਹਸਪਤਾਲ ਲਿਜਾਣ ਦੀ ਲੋੜ ਨਹੀਂ ਪਈ।
Auckland Transport (AT) ਨੇ ਘਟਨਾ ’ਤੇ ਚਿੰਤਾ ਪ੍ਰਗਟ ਕਰਦਿਆਂ ਕਿਹਾ ਕਿ ਉਹ ਇਸ ਮਾਮਲੇ ਦੀ ਜਾਂਚ ਕਰੇਗਾ। AT ਨੇ ਜ਼ਖਮੀ ਵਿਦਿਆਰਥਣ ਅਤੇ ਉਸ ਦੇ ਪਰਿਵਾਰ ਨਾਲ ਹਮਦਰਦੀ ਜਤਾਈ ਅਤੇ ਕਿਹਾ ਕਿ ਉਹ NZ Police, ਹੋਰ ਐਮਰਜੈਂਸੀ ਸੇਵਾਵਾਂ ਅਤੇ ਬੱਸ ਆਪਰੇਟਰ ਨਾਲ ਮਿਲ ਕੇ ਘਟਨਾ ਦੇ ਹਾਲਾਤਾਂ ਨੂੰ ਸਮਝਣ ਲਈ ਕੰਮ ਕਰੇਗਾ।
ਸੋਸ਼ਲ ਮੀਡੀਆ ’ਤੇ ਸਾਹਮਣੇ ਆਈ ਇੱਕ ਤਸਵੀਰ ਵਿੱਚ ਵਿਦਿਆਰਥਣ ਸੜਕ ’ਤੇ ਡਿੱਗੀ ਦਿਖਾਈ ਦੇ ਰਹੀ ਹੈ, ਜਦਕਿ ਉਸ ਦੇ ਆਲੇ-ਦੁਆਲੇ ਸਕੂਲ ਯੂਨੀਫਾਰਮ ਪਹਿਨੇ ਹੋਰ ਵਿਦਿਆਰਥੀ ਅਤੇ ਕੁਝ ਬਾਲਗ ਮੌਜੂਦ ਹਨ।