ਨਿਊਜ਼ੀਲੈਂਡ ਦੇ ਵੈਲਿੰਗਟਨ ਸ਼ਹਿਰ ਵਿੱਚ ਜਾਨਸਨਵਿਲ ਰੇਲ ਲਾਈਨ ‘ਤੇ ਯਾਤਰੀ ਰੇਲ ਸੇਵਾਵਾਂ ਬੁੱਧਵਾਰ ਤੋਂ ਮੁੜ ਸ਼ੁਰੂ ਹੋਣ ਜਾ ਰਹੀਆਂ ਹਨ। ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਹੋਏ ਇੱਕ ਟ੍ਰੇਨ ਹਾਦਸੇ ਕਾਰਨ ਇਹ ਸੇਵਾਵਾਂ ਅਸਥਾਈ ਤੌਰ ‘ਤੇ ਬੰਦ ਕਰ ਦਿੱਤੀਆਂ ਗਈਆਂ ਸਨ। 6 ਜੂਨ ਨੂੰ ਖੰਡਾਲਾਹ ਸਟੇਸ਼ਨ ਤੋਂ ਰਵਾਨਾ ਹੋ ਰਹੀ ਇੱਕ ਟ੍ਰੇਨ ਨੇ ਲਾਲ ਸਿਗਨਲ ਪਾਰ ਕਰ ਦਿੱਤਾ ਸੀ ਅਤੇ ਅੱਗੇ ਬਣੇ ਕੰਕਰੀਟ ਸੁਰੱਖਿਆ ਬੈਰੀਅਰ ਨਾਲ ਟਕਰਾ ਗਈ ਸੀ। ਇਸ ਹਾਦਸੇ ਵਿੱਚ ਕਈ ਯਾਤਰੀ ਜ਼ਖ਼ਮੀ ਹੋ ਗਏ ਸਨ।
ਘਟਨਾ ਤੋਂ ਤੁਰੰਤ ਬਾਅਦ ਮੌਕੇ ‘ਤੇ ਪਹੁੰਚੇ ਸਥਾਨਕ ਲੋਕਾਂ ਨੇ ਦੱਸਿਆ ਕਿ ਟ੍ਰੇਨ ਦੇ ਅੱਗਲੇ ਹਿੱਸੇ ਵਿੱਚ ਸੀਟਾਂ ਆਪਣੀ ਜਗ੍ਹਾ ਤੋਂ ਉਖੜ ਗਈਆਂ ਸਨ ਅਤੇ ਡੱਬੇ ਦੇ ਅੰਦਰ ਖੂਨ ਦੇ ਨਿਸ਼ਾਨ ਵੀ ਦੇਖਣ ਨੂੰ ਮਿਲੇ ਸਨ। ਕੀਵੀਰੇਲ (KiwiRail) ਨੇ ਜਾਣਕਾਰੀ ਦਿੱਤੀ ਹੈ ਕਿ ਟਰੈਕ ਦੀ ਮੁਰੰਮਤ ਦਾ ਸਾਰਾ ਕੰਮ ਹੁਣ ਪੂਰਾ ਕਰ ਲਿਆ ਗਿਆ ਹੈ।
ਵੈਲਿੰਗਟਨ ਮੈਟਰੋ ਨੈੱਟਵਰਕ ਦੇ ਜਨਰਲ ਮੈਨੇਜਰ ਐਂਡੀ ਲਾਇਨ ਨੇ ਕਿਹਾ ਕਿ 11 ਜੂਨ ਦੀ ਰਾਤ ਨੂੰ ਕਰੇਨਾਂ ਦੀ ਮਦਦ ਨਾਲ ਨੁਕਸਾਨੀ ਗਈ ਮਾਤਾਂਗੀ ਟ੍ਰੇਨ ਯੂਨਿਟ ਨੂੰ ਟਰੈਕ ਤੋਂ ਹਟਾਉਣ ਤੋਂ ਬਾਅਦ ਟੀਮਾਂ ਨੇ ਲਗਾਤਾਰ ਮੁਰੰਮਤ ਅਤੇ ਜਾਂਚ ਦਾ ਕੰਮ ਕੀਤਾ। ਉਨ੍ਹਾਂ ਦੱਸਿਆ ਕਿ ਹਾਦਸੇ ਦੌਰਾਨ ਟੁੱਟੀਆਂ ਰੇਲ ਪਟੜੀਆਂ ਦੀ ਮੁਰੰਮਤ ਕੀਤੀ ਗਈ, ਖਿਸਕ ਚੁੱਕੇ ਟਰੈਕ ਨੂੰ ਦੁਬਾਰਾ ਠੀਕ ਥਾਂ ‘ਤੇ ਲਿਆਂਦਾ ਗਿਆ ਅਤੇ ਕਰੇਨਾਂ ਦੀ ਕਾਰਵਾਈ ਲਈ ਹਟਾਈਆਂ ਗਈਆਂ ਬਿਜਲੀ ਦੀਆਂ ਓਵਰਹੈੱਡ ਤਾਰਾਂ ਨੂੰ ਵੀ ਮੁੜ ਸਥਾਪਿਤ ਕੀਤਾ ਗਿਆ ਹੈ।
ਲਾਇਨ ਮੁਤਾਬਿਕ ਮੁਰੰਮਤ ਦੇ ਬਾਅਦ ਵਿਸਤ੍ਰਿਤ ਟੈਸਟਿੰਗ ਪ੍ਰਕਿਰਿਆ ਵੀ ਕੀਤੀ ਗਈ, ਜਿਸ ਦੌਰਾਨ ਟ੍ਰਾਂਸਡੈਵ ਵੱਲੋਂ ਟੈਸਟ ਟ੍ਰੇਨਾਂ ਚਲਾ ਕੇ ਇਹ ਯਕੀਨੀ ਬਣਾਇਆ ਗਿਆ ਕਿ ਸਾਰੇ ਸਿਸਟਮ ਠੀਕ ਤਰ੍ਹਾਂ ਕੰਮ ਕਰ ਰਹੇ ਹਨ ਅਤੇ ਯਾਤਰੀਆਂ ਲਈ ਨੈੱਟਵਰਕ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ। ਰੇਲ ਅਧਿਕਾਰੀਆਂ ਨੇ ਇਸ ਦੌਰਾਨ ਯਾਤਰੀਆਂ ਵੱਲੋਂ ਦਿਖਾਏ ਗਏ ਧੀਰਜ ਅਤੇ ਸਹਿਯੋਗ ਲਈ ਉਨ੍ਹਾਂ ਦਾ ਧੰਨਵਾਦ ਵੀ ਕੀਤਾ।
ਇਸ ਦੇ ਨਾਲ ਹੀ ਕੀਵੀਰੇਲ ਨੇ ਐਲਾਨ ਕੀਤਾ ਹੈ ਕਿ ਸ਼ਨੀਵਾਰ ਨੂੰ ਹੋਣ ਵਾਲੇ ਹਰੀਕੇਨਜ਼ ਅਤੇ ਚੀਫ਼ਸ ਵਿਚਾਲੇ ਸੁਪਰ ਰਗਬੀ ਫਾਈਨਲ ਮੈਚ ਲਈ ਦਰਸ਼ਕਾਂ ਦੀ ਸਹੂਲਤ ਵਾਸਤੇ ਜਾਨਸਨਵਿਲ, ਹੱਟ ਵੈਲੀ ਅਤੇ ਕਾਪਿਟੀ ਲਾਈਨਾਂ ‘ਤੇ ਵਾਧੂ ਰੇਲ ਸੇਵਾਵਾਂ ਵੀ ਚਲਾਈਆਂ ਜਾਣਗੀਆਂ।