ਹੈਮਿਲਟਨ ਪੁਲਿਸ ਨੇ ਫੇਸਬੁੱਕ ਮਾਰਕੀਟਪਲੇਸ ਰਾਹੀਂ ਕਰੀਬ 100,000 ਡਾਲਰ ਦੀ ਕਥਿਤ ਠੱਗੀ ਕਰਨ ਦੇ ਦੋਸ਼ਾਂ ਹੇਠ 26 ਸਾਲਾ ਮਹਿਲਾ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਦੇ ਅਨੁਸਾਰ, ਮਹਿਲਾ ਮਾਰਕੀਟਪਲੇਸ ‘ਤੇ ਸਮਾਨ ਵੇਚਣ ਵਾਲੇ ਲੋਕਾਂ ਨਾਲ ਮਿਲਦੀ ਸੀ ਅਤੇ ਭੁਗਤਾਨ ਕਰਨ ਲਈ ਜਾਅਲੀ ਬੈਂਕ ਟ੍ਰਾਂਸਫਰ ਦੀ ਰਸੀਦ ਦਿਖਾਉਂਦੀ ਸੀ। ਇਸ ਤਰ੍ਹਾਂ ਉਹ ਸਮਾਨ ਆਪਣੇ ਕਬਜ਼ੇ ਵਿੱਚ ਲੈ ਲੈਂਦੀ ਸੀ, ਜਦਕਿ ਅਸਲ ਵਿੱਚ ਕੋਈ ਰਕਮ ਟ੍ਰਾਂਸਫਰ ਨਹੀਂ ਹੁੰਦੀ ਸੀ।
ਪੁਲਿਸ ਦਾ ਦਾਅਵਾ ਹੈ ਕਿ ਪਿਛਲੇ ਦੋ ਮਹੀਨਿਆਂ ਦੌਰਾਨ ਮਹਿਲਾ ਨੇ ਇਸ ਤਰੀਕੇ ਨਾਲ ਕਈ ਉੱਚ ਮੁੱਲ ਵਾਲੀਆਂ ਗੱਡੀਆਂ ਅਤੇ ਇਲੈਕਟ੍ਰਾਨਿਕ ਸਮਾਨ ਸਮੇਤ ਹੋਰ ਕੀਮਤੀ ਚੀਜ਼ਾਂ ਹਾਸਿਲ ਕੀਤੀਆਂ ਸਨ। ਮਹਿਲਾ ਨੂੰ ਸ਼ੁੱਕਰਵਾਰ ਨੂੰ ਹੈਮਿਲਟਨ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿੱਥੇ ਉਸ ‘ਤੇ ਚੋਰੀ ਅਤੇ ਜਾਅਲੀ ਦਸਤਾਵੇਜ਼ ਦੀ ਵਰਤੋਂ ਸਮੇਤ ਕਈ ਦੋਸ਼ ਲਗਾਏ ਗਏ ਹਨ। ਅਦਾਲਤ ਨੇ ਉਸ ਨੂੰ ਜ਼ਮਾਨਤ ‘ਤੇ ਰਿਹਾਅ ਕਰ ਦਿੱਤਾ ਹੈ ਅਤੇ ਮਾਮਲੇ ਦੀ ਅਗਲੀ ਸੁਣਵਾਈ ਜੁਲਾਈ ਦੇ ਅੰਤ ਵਿੱਚ ਹੋਵੇਗੀ।