ਨਿਊਜ਼ੀਲੈਂਡ ਦੇ Te Kūiti ਸ਼ਹਿਰ ਵਿੱਚ ਇੱਕ ਡੇਅਰੀ ਸਟੋਰ ‘ਤੇ ਹੋਈ ਹਿੰਸਕ ਲੁੱਟ ਦੀ ਘਟਨਾ ਨੇ ਭਾਰਤੀ ਮੂਲ ਦੇ ਇੱਕ ਪਰਿਵਾਰ ਨੂੰ ਡਰ ਅਤੇ ਅਸੁਰੱਖਿਆ ਦੇ ਮਾਹੌਲ ਵਿੱਚ ਧੱਕ ਦਿੱਤਾ ਹੈ। ਜਾਣਕਾਰੀ ਮੁਤਾਬਿਕ ਚਾਰ ਲੁਟੇਰਿਆਂ ਨੇ ਸਵੇਰੇ ਕਰੀਬ 7 ਵਜੇ Patel’s Mini Market ਵਿੱਚ ਦਾਖਲ ਹੋ ਕੇ ਇੱਕ ਮਿੰਟ ਤੋਂ ਵੀ ਘੱਟ ਸਮੇਂ ਵਿੱਚ ਲੁੱਟ ਦੀ ਵਾਰਦਾਤ ਨੂੰ ਅੰਜਾਮ ਦਿੱਤਾ।
ਦੁਕਾਨ ਦੇ ਮਾਲਕ ਹੇਮੰਤ ਪਟੇਲ ਉਸ ਸਮੇਂ ਇਕੱਲੇ ਕੰਮ ਕਰ ਰਹੇ ਸਨ। ਹਮਲਾਵਰਾਂ ਨੇ ਅੰਦਰ ਦਾਖਲ ਹੁੰਦੇ ਹੀ ਹਥੌੜੇ ਨਾਲ ਦੁਕਾਨ ਦਾ ਸਾਮਾਨ ਨੁਕਸਾਨਿਆ ਅਤੇ ਕਾਊਂਟਰ ‘ਤੇ ਚੜ੍ਹ ਕੇ ਹੇਮੰਤ ਪਟੇਲ ਨਾਲ ਕੁੱਟਮਾਰ ਕੀਤੀ। ਇਸ ਦੌਰਾਨ ਹੋਰ ਹਮਲਾਵਰਾਂ ਨੇ ਤੰਬਾਕੂ ਦੇ ਉਤਪਾਦ ਅਤੇ ਕੈਸ਼ ਰਜਿਸਟਰ ਵਿੱਚ ਪਈ ਨਕਦੀ ਇਕੱਠੀ ਕਰ ਲਈ।
ਪੁਲਿਸ ਅਨੁਸਾਰ, ਲੁਟੇਰੇ ਕਰੀਬ 10,000 ਨਿਊਜ਼ੀਲੈਂਡ ਡਾਲਰ ਮੁੱਲ ਦਾ ਤੰਬਾਕੂ ਅਤੇ ਲਗਭਗ 1,500 ਡਾਲਰ ਨਕਦ ਲੈ ਕੇ ਇੱਕ ਚਿੱਟੀ ਸਟੇਸ਼ਨ ਵੈਗਨ ਵਿੱਚ ਫਰਾਰ ਹੋ ਗਏ। ਹਮਲੇ ਦੌਰਾਨ ਹੇਮੰਤ ਪਟੇਲ ਦੇ ਚਿਹਰੇ ‘ਤੇ ਸੱਟਾਂ ਅਤੇ ਕੱਟ ਲੱਗੇ, ਜਿਨ੍ਹਾਂ ਦਾ ਇਲਾਜ ਕਰਵਾਇਆ ਜਾ ਰਿਹਾ ਹੈ।
ਹੇਮੰਤ ਪਟੇਲ ਅਤੇ ਉਨ੍ਹਾਂ ਦੀ ਪਤਨੀ ਭਾਵਨਾ ਪਟੇਲ ਪਿਛਲੇ ਦਸ ਸਾਲਾਂ ਤੋਂ ਇਹ ਡੇਅਰੀ ਸਟੋਰ ਚਲਾ ਰਹੇ ਹਨ ਅਤੇ ਇਸ ਦੌਰਾਨ ਪਹਿਲਾਂ ਕਦੇ ਵੀ ਅਜਿਹੀ ਗੰਭੀਰ ਘਟਨਾ ਦਾ ਸਾਹਮਣਾ ਨਹੀਂ ਕਰਨਾ ਪਿਆ ਸੀ। ਪਰਿਵਾਰ ਦਾ ਕਹਿਣਾ ਹੈ ਕਿ ਇਸ ਹਮਲੇ ਤੋਂ ਬਾਅਦ ਉਹ ਆਪਣੀ ਸੁਰੱਖਿਆ ਨੂੰ ਲੈ ਕੇ ਗੰਭੀਰ ਚਿੰਤਤ ਹਨ।
ਘਟਨਾ ਤੋਂ ਬਾਅਦ ਪਰਿਵਾਰ ਨੇ ਫੈਸਲਾ ਕੀਤਾ ਹੈ ਕਿ ਭਵਿੱਖ ਵਿੱਚ ਸੁਰੱਖਿਆ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਉਹ ਕਾਊਂਟਰ ਦੇ ਪਿੱਛੇ ਸੁਰੱਖਿਆ ਪਿੰਜਰੇ (ਕੇਜ) ਵਿੱਚੋਂ ਹੀ ਗਾਹਕਾਂ ਨੂੰ ਸੇਵਾਵਾਂ ਮੁਹੱਈਆ ਕਰਵਾਉਣਗੇ। ਪੁਲਿਸ ਨੇ ਮਾਮਲਾ ਦਰਜ ਕਰਕੇ ਹਮਲਾਵਰਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।