ਆਕਲੈਂਡ ਦੀ ਮਸ਼ਹੂਰ ਟਰੱਕਿੰਗ ਕੰਪਨੀ, ਯੂਵੀ ਕੈਰੀਅਰਜ਼ ਇਸ ਵੇਲੇ ਵਿੱਤੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰ ਰਹੀ ਹੈ ਇੱਥੇ ਹੀ ਬੱਸ ਨਹੀਂ ਕੰਪਨੀ ਸੰਭਾਵੀ ਬੰਦ ਹੋਣ ਦੇ ਕਿਨਾਰੇ ਹੈ, ਜਿਸ ਕਾਰਨ ਇਸਦੇ ਕਰਮਚਾਰੀ ਵੀ ਬਿਨਾਂ ਤਨਖਾਹਾਂ ਦੇ ਕੰਮ ਕਰ ਰਹੇ ਹਨ ਅਤੇ ਕਾਨੂੰਨੀ ਲੜਾਈਆਂ ਦਾ ਸਾਹਮਣਾ ਕਰ ਰਹੇ ਹਨ। ਕਰਮਚਾਰੀ ਦਾਅਵਾ ਕਰ ਰਹੇ ਹਨ ਕਿ ਉਹਨਾਂ ਨੂੰ ਅਕਤੂਬਰ 2024 ਤੋਂ ਤਨਖਾਹਾਂ ਨਹੀਂ ਮਿਲੀਆਂ ਹਨ ਅਤੇ ਉਹਨਾਂ ਨੇ ਕੰਮ ਸੁਰੱਖਿਅਤ ਕਰਨ ਲਈ ਗੈਰ-ਕਾਨੂੰਨੀ ਨੌਕਰੀ ਪ੍ਰੀਮੀਅਮ ਅਦਾ ਕੀਤੇ ਸਨ, ਜਦੋਂ ਕਿ ਕੰਪਨੀ ਦੇ ਡਾਇਰੈਕਟਰ ਇਹਨਾਂ ਦਾਅਵਿਆਂ ਤੋਂ ਇਨਕਾਰ ਕਰਦੇ ਹਨ। 2 ਦਰਜਨ ਤੋਂ ਵਧੇਰੇ ਪੰਜਾਬੀ ਡਰਾਈਵਰਾਂ ਨੇ ਦਾਅਵਾ ਕਰਦੇ ਕਿਹਾ ਕਿ ਉਨ੍ਹਾਂ ਦੀ $13,000 ਅਤੇ $35,000 ਦੇ ਵਿਚਕਾਰ ਅਦਾਇਗੀ ਨਾ ਕੀਤੀ ਗਈ ਤਨਖਾਹ ਹੈ।
ਇਸ ਦੌਰਾਨ ਇੱਕ ਸਥਾਨਕ ਰਿਪੋਰਟ ਦੇ ਅਨੁਸਾਰ, ਆਕਲੈਂਡ-ਅਧਾਰਿਤ ਇੱਕ ਹੋਰ ਕੰਪਨੀ, ਆਰ-ਲਿਟਸ ਕੰਟਰੈਕਟਿੰਗ ਦਾ $7 ਮਿਲੀਅਨ ਤੋਂ ਵੱਧ ਦਾ ਬਕਾਇਆ ਹੈ, ਜੋ ਕਿ ਨਿਊਜ਼ੀਲੈਂਡ ਟਰੱਕਿੰਗ ਉਦਯੋਗ ਵਿੱਚ ਲਿਕਵੀਡੇਸ਼ਨ ਦੇ ਵੱਧ ਰਹੇ ਰੁਝਾਨ ਨੂੰ ਉਜਾਗਰ ਕਰਦੀ ਹੈ। ਕੰਪਨੀ ਉੱਤੇ IRD ਦਾ $1.3 ਮਿਲੀਅਨ ਬਕਾਇਆ ਹੈ, ਜਦਕਿ ਹਾਰਟਲੈਂਡ ਬੈਂਕ ਨੇ ਮਾਰਚ ਵਿੱਚ 8 ਟਰੱਕ ਤੇ ਟ੍ਰੇਲਰ ਜ਼ਬਤ ਕਰ ਲਏ, ਕਿਉਂਕਿ $734,385 ਦੀ ਮੌਰਟਗੇ ਦੀ ਭੁਗਤਾਨੀ ਨਹੀਂ ਹੋਈ।