ਸਿੰਗਾਪੁਰ ਤੋਂ ਆਉਂਦੀ ਏਅਰ ਨਿਊਜ਼ੀਲੈਂਡ ਦੀ ਇੱਕ ਉਡਾਣ ‘ਤੇ ਆਕਲੈਂਡ ਉਤਰਣ ਤੋਂ ਕੁਝ ਮਿੰਟ ਪਹਿਲਾਂ ਬਿਜਲੀ ਡਿੱਗਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਿਸ ਕਾਰਨ ਹਫ਼ਤੇ ਦੇ ਅਖੀਰ ਦੌਰਾਨ ਦੋ ਉਡਾਣਾਂ ਰੱਦ ਕਰਣੀਆਂ ਪਈਆਂ। ਯਾਤਰੀ ਸਾਈਮਨ ਬੈਨੇਟ ਨੇ ਸੋਸ਼ਲ ਮੀਡੀਆ ‘ਤੇ ਦੱਸਿਆ ਕਿ ਇਸ ਘਟਨਾ ਨੇ ਉਸਨੂੰ “ਬਹੁਤ ਡਰਾ ਦਿੱਤਾ”, ਪਰ ਉਸਨੇ ਕ੍ਰਿਊ ਦੀ ਸ਼ਾਂਤ ਅਤੇ ਪੇਸ਼ੇਵਰ ਸੰਭਾਲ ਦੀ ਸਰਾਹਨਾ ਕੀਤੀ।
ਏਅਰ ਨਿਊਜ਼ੀਲੈਂਡ ਦੇ ਚੀਫ ਸੇਫਟੀ ਅਤੇ ਰਿਸਕ ਅਧਿਕਾਰੀ ਨਾਥਨ ਮੈਕਗ੍ਰਾਅ ਨੇ ਕਿਹਾ ਕਿ ਜਹਾਜ਼ ਨੂੰ ਆਉਣ ‘ਤੇ ਇੰਜੀਨੀਅਰਿੰਗ ਜਾਂਚ ਦੀ ਲੋੜ ਸੀ। ਉਨ੍ਹਾਂ ਨੇ ਦੱਸਿਆ, “ਇਸ ਕਾਰਨ ਆਕਲੈਂਡ ਤੋਂ ਸਿੰਗਾਪੁਰ ਜਾਣ ਵਾਲੀ NZ282 ਅਤੇ ਸਿੰਗਾਪੁਰ ਤੋਂ ਆਕਲੈਂਡ ਆਉਣ ਵਾਲੀ NZ281 ਉਡਾਣਾਂ ਰੱਦ ਕਰ ਦਿੱਤੀਆਂ ਗਈਆਂ।” ਕੰਪਨੀ ਵੱਲੋਂ ਪ੍ਰਭਾਵਿਤ ਯਾਤਰੀਆਂ ਨੂੰ ਅਗਲੀ ਉਪਲਬਧ ਉਡਾਣਾਂ ਵਿੱਚ ਸ਼ਾਮਿਲ ਕੀਤਾ ਜਾ ਰਿਹਾ ਹੈ, ਜਿਸ ਵਿੱਚ ਸਾਥੀ ਏਅਰਲਾਈਨਾਂ ਦੀ ਮਦਦ ਵੀ ਲਈ ਜਾ ਰਹੀ ਹੈ। ਉਨ੍ਹਾਂ ਨੇ ਕਿਹਾ, “ਹਾਲਾਂਕਿ ਬਿਜਲੀ ਡਿੱਗਣ ਦੀਆਂ ਘਟਨਾਵਾਂ ਕਾਫੀ ਘੱਟ ਹੁੰਦੀਆਂ ਹਨ, ਸਾਡੇ ਪਾਇਲਟ ਇਸ ਤਰ੍ਹਾਂ ਦੀ ਸਥਿਤੀ ਨੂੰ ਸੰਭਾਲਣ ਲਈ ਪੂਰੀ ਤਰ੍ਹਾਂ ਸਿਖਲਾਈ ਪ੍ਰਾਪਤ ਹਨ।”