ਨੌਰਥਲੈਂਡ ‘ਚ ਬੀਤੀ ਰਾਤ ਇੱਕ ਮਰੀਜ਼ ਨੂੰ ਹਸਪਤਾਲ ਲਿਜਾ ਰਹੀ ਐਂਬੂਲੈਂਸ ਅਤੇ ਇੱਕ ਗੱਡੀ ਦੀ ਟੱਕਰ ਹੋਣ ਕਾਰਨ ਦੋ ਲੋਕ ਜ਼ਖਮੀ ਹੋ ਗਏ, ਜਿਨ੍ਹਾਂ ਵਿੱਚੋਂ ਇੱਕ ਦੀ ਹਾਲਤ ਗੰਭੀਰ ਹੈ। ਐਮਰਜੈਂਸੀ ਸੇਵਾਵਾਂ ਨੇ ਸ਼ੁੱਕਰਵਾਰ ਸ਼ਾਮ 7.50 ਵਜੇ ਦੇ ਕਰੀਬ ਵਾਈਪੂ ਵਿਖੇ ਕੋਵ ਰੋਡ ‘ਤੇ ਦੋ ਵਾਹਨਾਂ ਦੀ ਟੱਕਰ ਦੀਆਂ ਰਿਪੋਰਟਾਂ ਦਾ ਜਵਾਬ ਦਿੱਤਾ ਸੀ। ਸੇਂਟ ਜੌਨ ਨੌਰਥਲੈਂਡ ਡਿਸਟ੍ਰਿਕਟ ਓਪਰੇਸ਼ਨ ਮੈਨੇਜਰ ਬੇਨ ਲੋਕੀ ਨੇ ਪੁਸ਼ਟੀ ਕੀਤੀ ਕਿ ਹਾਦਸੇ ਵਿੱਚ ਇੱਕ ਐਂਬੂਲੈਂਸ ਸ਼ਾਮਿਲ ਸੀ।
ਉਨ੍ਹਾਂ ਕਿਹਾ ਕਿ, “ਘਟਨਾ ਦੇ ਸਮੇਂ ਦੋ ਚਾਲਕ ਦਲ ਦੇ ਮੈਂਬਰ ਐਂਬੂਲੈਂਸ ਵਿੱਚ ਸਵਾਰ ਸਨ ਜੋ ਇੱਕ ਮਰੀਜ਼ ਨੂੰ ਦਰਮਿਆਨੀ ਹਾਲਤ ਵਿੱਚ ਮੰਗਾਵਾਈ ਹੈੱਡਜ਼ ਤੋਂ ਵਾਂਗਾਰੇਈ ਹਸਪਤਾਲ ਲੈ ਜਾ ਰਹੇ ਸਨ।” ਉਨ੍ਹਾਂ ਕਿਹਾ ਕਿ ਦੋ ਐਂਬੂਲੈਂਸਾਂ, ਇੱਕ ਰੈਪਿਡ ਰਿਸਪਾਂਸ ਯੂਨਿਟ, ਇੱਕ ਫਸਟ ਰਿਸਪਾਂਸ ਯੂਨਿਟ, ਇੱਕ ਆਪਰੇਸ਼ਨਲ ਮੈਨੇਜਰ ਅਤੇ ਇੱਕ ਹੈਲੀਕਾਪਟਰ ਹਾਦਸੇ ਵਾਲੀ ਥਾਂ ‘ਤੇ ਪਹੁੰਚੇ ਸਨ। ਨੁਕਸਾਨੀ ਗਈ ਐਂਬੂਲੈਂਸ ਨੂੰ ਮੁਰੰਮਤ ਲਈ ਸੜਕ ਤੋਂ ਹਟਾ ਦਿੱਤਾ ਗਿਆ ਸੀ।