ਨਿਊਜ਼ੀਲੈਂਡ ਵਿੱਚ ਵਧ ਰਹੀਆਂ ਤੇਲ ਦੀਆਂ ਕੀਮਤਾਂ ਨੇ ਵਿਦਿਆਰਥੀਆਂ ਦੀ ਜ਼ਿੰਦਗੀ ਨੂੰ ਪ੍ਰਭਾਵਿਤ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਇਸ ਦੇ ਚਲਦਿਆਂ Auckland University of Technology (AUT) ਅਤੇ University of Auckland ਦੇ ਵਿਦਿਆਰਥੀਆਂ ਨੇ ਸਰਕਾਰ ਤੋਂ ਤੁਰੰਤ ਰਾਹਤ ਦੀ ਮੰਗ ਕੀਤੀ ਹੈ। ਦੋਵਾਂ ਯੂਨੀਵਰਸਿਟੀਆਂ ਦੀਆਂ ਵਿਦਿਆਰਥੀ ਐਸੋਸੀਏਸ਼ਨਾਂ ਵੱਲੋਂ ਸਾਂਝੀ ਪਟੀਸ਼ਨ ਦਾਇਰ ਕਰਕੇ ਮੁਫ਼ਤ ਜਨਤਕ ਆਵਾਜਾਈ ਅਤੇ ਵਿੱਤੀ ਸਹਾਇਤਾ ਦੀ ਮੰਗ ਕੀਤੀ ਗਈ ਹੈ। ਵਿਦਿਆਰਥੀ ਆਗੂਆਂ ਦਾ ਕਹਿਣਾ ਹੈ ਕਿ ਮੌਜੂਦਾ ਸਮੇਂ ਵਿੱਚ ਮਿਲ ਰਹੀ 40 ਫੀਸਦੀ ਕਿਰਾਇਆ ਛੂਟ ਵੀ ਵਧ ਰਹੀ ਮਹਿੰਗਾਈ ਦੇ ਸਾਹਮਣੇ ਨਾਕਾਫ਼ੀ ਸਾਬਿਤ ਹੋ ਰਹੀ ਹੈ।
ਵਿਦਿਆਰਥੀ ਐਸੋਸੀਏਸ਼ਨ ਦੇ ਪ੍ਰਧਾਨ ਜੇਮਸ ਪੋਰਟੇਗੀਸ ਨੇ ਕਿਹਾ ਕਿ ਜਦ ਤੱਕ ਤੇਲ ਸੰਕਟ ਜਾਰੀ ਹੈ, ਵਿਦਿਆਰਥੀਆਂ ਲਈ ਬੱਸ ਅਤੇ ਟ੍ਰੇਨ ਦਾ ਸਫ਼ਰ ਪੂਰੀ ਤਰ੍ਹਾਂ ਮੁਫ਼ਤ ਕੀਤਾ ਜਾਣਾ ਚਾਹੀਦਾ ਹੈ। ਇਸਦੇ ਨਾਲ ਹੀ ਉਨ੍ਹਾਂ ਨੂੰ ਸਰਕਾਰ ਦੇ 50 ਡਾਲਰ ਦੇ ਸਹਾਇਤਾ ਪੈਕੇਜ ਵਿੱਚ ਵੀ ਸ਼ਾਮਿਲ ਕਰਨ ਦੀ ਮੰਗ ਕੀਤੀ ਗਈ ਹੈ।
ਕੈਂਪਸ ਤੱਕ ਪਹੁੰਚਣਾ ਬਣਿਆ ਚੁਣੌਤੀ
ਵਿਦਿਆਰਥੀਆਂ ਮੁਤਾਬਿਕ ਆਕਲੈਂਡ ਵਿੱਚ ਮਹਿੰਗੀ ਰਿਹਾਇਸ਼ ਕਾਰਨ ਜ਼ਿਆਦਾਤਰ ਵਿਦਿਆਰਥੀ ਕੈਂਪਸ ਤੋਂ ਕਾਫ਼ੀ ਦੂਰ ਰਹਿਣ ਲਈ ਮਜਬੂਰ ਹਨ। ਖ਼ਾਸ ਤੌਰ ‘ਤੇ ਨਰਸਿੰਗ ਦੇ ਵਿਦਿਆਰਥੀਆਂ ਨੂੰ ਆਪਣੀਆਂ ਪਲੇਸਮੈਂਟਾਂ ਲਈ ਲੰਬਾ ਸਫ਼ਰ ਕਰਨਾ ਪੈਂਦਾ ਹੈ। ਵਧ ਰਹੇ ਟਰਾਂਸਪੋਰਟ ਅਤੇ ਖਾਣ-ਪੀਣ ਦੇ ਖਰਚਿਆਂ ਕਾਰਨ ਕਈ ਵਿਦਿਆਰਥੀ ਹੁਣ ਲੈਕਚਰ ਛੱਡਣ ਲਈ ਮਜਬੂਰ ਹੋ ਰਹੇ ਹਨ।
ਭੋਜਨ ਸੰਕਟ ਵੀ ਗੰਭੀਰ
ਇੱਕ ਤਾਜ਼ਾ ਸਰਵੇਖਣ ਅਨੁਸਾਰ ਲਗਭਗ 45 ਫੀਸਦੀ ਵਿਦਿਆਰਥੀਆਂ ਨੂੰ ਪੌਸ਼ਟਿਕ ਅਤੇ ਸਸਤਾ ਭੋਜਨ ਨਹੀਂ ਮਿਲ ਰਿਹਾ। ਘਰੋਂ ਦੂਰ ਰਹਿਣ ਵਾਲੇ ਵਿਦਿਆਰਥੀਆਂ ਵਿੱਚ ‘ਫੂਡ ਇਨਸਿਕਿਊਰਿਟੀ’ ਦੀ ਸਮੱਸਿਆ ਵੱਧ ਰਹੀ ਹੈ।
ਇਸਦੇ ਨਾਲ ਹੀ ਫੂਡ ਬੈਂਕਾਂ ‘ਤੇ ਨਿਰਭਰਤਾ ਵੀ ਤੇਜ਼ੀ ਨਾਲ ਵਧੀ ਹੈ। ਜਿੱਥੇ 2020 ਵਿੱਚ ਹਫ਼ਤੇ ਵਿੱਚ 150 ਪੈਕੇਜ ਵੰਡੇ ਜਾਂਦੇ ਸਨ, ਉੱਥੇ 2025 ਤੱਕ ਇਹ ਗਿਣਤੀ 1800 ਪ੍ਰਤੀ ਹਫ਼ਤਾ ਤੱਕ ਪਹੁੰਚ ਗਈ ਹੈ।
ਵਿਦਿਆਰਥੀ ਆਗੂਆਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇ ਸਰਕਾਰ ਵੱਲੋਂ ਜਲਦ ਹੀ ਕੋਈ ਢੁਕਵਾਂ ਕਦਮ ਨਾ ਚੁੱਕਿਆ ਗਿਆ, ਤਾਂ ਬਹੁਤ ਸਾਰੇ ਵਿਦਿਆਰਥੀਆਂ ਲਈ ਆਪਣੀ ਪੜ੍ਹਾਈ ਜਾਰੀ ਰੱਖਣਾ ਮੁਸ਼ਕਲ ਹੋ ਜਾਵੇਗਾ। ਯੂਨੀਵਰਸਿਟੀ ਪ੍ਰਸ਼ਾਸਨ ਹਾਲਾਤਾਂ ‘ਤੇ ਨਜ਼ਰ ਰੱਖ ਰਿਹਾ ਹੈ, ਪਰ ਵਿਦਿਆਰਥੀ ਤੁਰੰਤ ਸਰਕਾਰੀ ਦਖ਼ਲ ਦੀ ਉਮੀਦ ਕਰ ਰਹੇ ਹਨ।