ਨਿਊਜ਼ੀਲੈਂਡ: ਨਿਊਜ਼ੀਲੈਂਡ ਵਿੱਚ ਵਿਦੇਸ਼ਾਂ ਤੋਂ ਆਉਣ ਵਾਲੇ ਸੈਲਾਨੀਆਂ ਦੀ ਗਿਣਤੀ ਵਿੱਚ ਵੱਡਾ ਵਾਧਾ ਦਰਜ ਕੀਤਾ ਗਿਆ ਹੈ। ਜੂਨ 2026 ਵਿੱਚ ਖ਼ਤਮ ਹੋਏ ਸਾਲ ਦੌਰਾਨ ਦੇਸ਼ ਵਿੱਚ ਪਹੁੰਚਣ ਵਾਲੇ ਵਿਦੇਸ਼ੀ ਸੈਲਾਨੀਆਂ ਦੀ ਗਿਣਤੀ ਪਿਛਲੇ ਸਾਲ ਦੇ ਮੁਕਾਬਲੇ 9 ਫੀਸਦੀ ਵਧੀ, ਜਦਕਿ ਆਸਟ੍ਰੇਲੀਆ ਤੋਂ ਆਉਣ ਵਾਲੇ ਸੈਲਾਨੀਆਂ ਦੀ ਗਿਣਤੀ ਨਵੇਂ ਰਿਕਾਰਡ ’ਤੇ ਪਹੁੰਚ ਗਈ।
Stats NZ ਮੁਤਾਬਿਕ ਇਸ ਮਿਆਦ ਦੌਰਾਨ ਲਗਭਗ 3 ਲੱਖ ਵਾਧੂ ਵਿਦੇਸ਼ੀ ਸੈਲਾਨੀ ਨਿਊਜ਼ੀਲੈਂਡ ਪਹੁੰਚੇ। ਇਸ ਵਾਧੇ ਵਿੱਚ ਆਸਟ੍ਰੇਲੀਆ ਅਤੇ ਚੀਨ ਦੇ ਸੈਲਾਨੀਆਂ ਦਾ ਲਗਭਗ ਦੋ-ਤਿਹਾਈ ਯੋਗਦਾਨ ਰਿਹਾ। ਆਸਟ੍ਰੇਲੀਆ ਤੋਂ 1,44,400 ਅਤੇ ਚੀਨ ਤੋਂ 67,000 ਵਧੇਰੇ ਸੈਲਾਨੀ ਪਹੁੰਚੇ।
ਜੂਨ 2026 ਤੱਕ ਸਭ ਤੋਂ ਵੱਧ ਸੈਲਾਨੀ ਆਸਟ੍ਰੇਲੀਆ ਤੋਂ ਆਏ, ਜਿਨ੍ਹਾਂ ਦੀ ਗਿਣਤੀ 15.9 ਲੱਖ ਰਹੀ। ਇਸ ਤੋਂ ਬਾਅਦ ਅਮਰੀਕਾ ਤੋਂ 3,85,500, ਚੀਨ ਤੋਂ 3,15,400 ਅਤੇ ਯੂਨਾਈਟਿਡ ਕਿੰਗਡਮ ਤੋਂ 1,96,500 ਸੈਲਾਨੀ ਨਿਊਜ਼ੀਲੈਂਡ ਪਹੁੰਚੇ।
Stats NZ ਦੇ ਅੰਤਰਰਾਸ਼ਟਰੀ ਯਾਤਰਾ ਅੰਕੜਿਆਂ ਦੇ ਬੁਲਾਰੇ ਡੇਵ ਓ’ਡੋਨੋਵਨ ਨੇ ਕਿਹਾ ਕਿ ਜੂਨ 2026 ਵਾਲੇ ਸਾਲ ਵਿੱਚ ਆਸਟ੍ਰੇਲੀਆ ਤੋਂ ਆਏ ਸੈਲਾਨੀਆਂ ਦੀ ਗਿਣਤੀ ਉਸ ਦੇਸ਼ ਤੋਂ ਕਿਸੇ ਵੀ ਸਾਲਾਨਾ ਮਿਆਦ ਲਈ ਸਭ ਤੋਂ ਵੱਧ ਰਹੀ ਹੈ। ਇਹ ਲਗਾਤਾਰ ਬਣ ਰਹੇ ਸਾਲਾਨਾ ਰਿਕਾਰਡਾਂ ਦੀ ਲੜੀ ਦਾ ਹਿੱਸਾ ਹੈ।
ਸਾਊਥ ਆਈਲੈਂਡ ਵਿੱਚ ਵੀ ਸੈਲਾਨੀਆਂ ਦੀ ਵੱਡੀ ਆਮਦ
ਸਾਊਥ ਆਈਲੈਂਡ ਦੇ ਹਵਾਈ ਅੱਡਿਆਂ ’ਤੇ ਵੀ ਵਿਦੇਸ਼ੀ ਸੈਲਾਨੀਆਂ ਦੀ ਗਿਣਤੀ ਵਿੱਚ ਮਹੱਤਵਪੂਰਨ ਵਾਧਾ ਹੋਇਆ। ਜੂਨ 2026 ਤੱਕ ਇੱਕ ਸਾਲ ਵਿੱਚ ਇਨ੍ਹਾਂ ਹਵਾਈ ਅੱਡਿਆਂ ਰਾਹੀਂ 10.5 ਲੱਖ ਵਿਦੇਸ਼ੀ ਸੈਲਾਨੀ ਪਹੁੰਚੇ, ਜਦਕਿ ਜੂਨ 2025 ਵਾਲੇ ਸਾਲ ਵਿੱਚ ਇਹ ਗਿਣਤੀ 8,81,300 ਸੀ।
ਕ੍ਰਾਈਸਟਚਰਚ ਏਅਰਪੋਰਟ ਨੇ ਸਾਊਥ ਆਈਲੈਂਡ ਵਿੱਚ ਸੈਲਾਨੀਆਂ ਦੀ ਵਧੀ ਆਮਦ ਵਿੱਚ ਸਭ ਤੋਂ ਵੱਡਾ ਯੋਗਦਾਨ ਪਾਇਆ, ਜਿਸ ਤੋਂ ਬਾਅਦ ਕਵੀਨਸਟਾਊਨ ਏਅਰਪੋਰਟ ਦਾ ਨੰਬਰ ਰਿਹਾ।
ਆਸਟ੍ਰੇਲੀਆਈ ਸੈਲਾਨੀਆਂ ਨੇ ਲੰਬੀ ਦੂਰੀ ਵਾਲੇ ਬਾਜ਼ਾਰਾਂ ਦੀ ਕਮੀ ਪੂਰੀ ਕੀਤੀ
Infometrics ਦੇ ਮੁੱਖ ਅਰਥਸ਼ਾਸਤਰੀ ਨਿਕ ਬਰੰਸਡਨ ਮੁਤਾਬਕ ਸਾਲ ਦੀ ਸ਼ੁਰੂਆਤ ਵਿੱਚ ਸੈਲਾਨੀਆਂ ਦੀ ਆਮਦ ਵਿੱਚ ਤੇਜ਼ੀ ਆਈ ਸੀ, ਪਰ ਮੱਧ ਪੂਰਬ ਵਿੱਚ ਜੰਗ ਕਾਰਨ ਬਾਅਦ ਵਿੱਚ ਇਸ ’ਤੇ ਕੁਝ ਅਸਰ ਪਿਆ। ਇਸ ਦੇ ਬਾਵਜੂਦ ਆਸਟ੍ਰੇਲੀਆ ਤੋਂ ਆਉਣ ਵਾਲੇ ਸੈਲਾਨੀਆਂ ਦੀ ਮਜ਼ਬੂਤ ਗਿਣਤੀ ਨੇ ਯੂਰਪ ਵਰਗੇ ਲੰਬੀ ਦੂਰੀ ਵਾਲੇ ਬਾਜ਼ਾਰਾਂ ਤੋਂ ਘੱਟ ਆਮਦ ਦਾ ਪ੍ਰਭਾਵ ਘਟਾਇਆ।
ਉਨ੍ਹਾਂ ਮੁਤਾਬਿਕ ਆਸਟ੍ਰੇਲੀਆ ਤੋਂ ਸੈਲਾਨੀਆਂ ਦੀ ਆਮਦ ਹੁਣ 2019 ਦੇ ਪੱਧਰ ਨਾਲੋਂ 106 ਫੀਸਦੀ ਹੋ ਚੁੱਕੀ ਹੈ। ਇਸ ਦੇ ਉਲਟ, ਯੂਰਪ ਤੋਂ ਆਉਣ ਵਾਲੇ ਯਾਤਰੀ ਹਵਾਈ ਕਿਰਾਇਆਂ ਅਤੇ ਜੈੱਟ ਫਿਊਲ ਦੀਆਂ ਕੀਮਤਾਂ ਪ੍ਰਤੀ ਵਧੇਰੇ ਸੰਵੇਦਨਸ਼ੀਲ ਰਹਿੰਦੇ ਹਨ।
ਚੀਨ ਤੋਂ ਆਉਣ ਵਾਲੇ ਸੈਲਾਨੀਆਂ ਦੀ ਗਿਣਤੀ ਵਿੱਚ ਵੀ ਵਾਧੇ ਨੂੰ ਇੱਕ ਸਾਲ ਦੇ ਵੀਜ਼ਾ-ਮੁਕਤ ਟ੍ਰਾਇਲ ਨਾਲ ਮਦਦ ਮਿਲੀ। ਅਰਥਸ਼ਾਸਤਰੀ ਨੇ ਚੇਤਾਵਨੀ ਦਿੱਤੀ ਕਿ ਜੇਕਰ ਇਹ ਵਿਵਸਥਾ ਅੱਗੇ ਨਾ ਵਧਾਈ ਗਈ ਤਾਂ ਚੀਨੀ ਸੈਲਾਨੀਆਂ ਦੀ ਗਿਣਤੀ ਮੁੜ ਘਟ ਸਕਦੀ ਹੈ।
ਉਨ੍ਹਾਂ ਕਿਹਾ ਕਿ ਤੇਲ ਦੀਆਂ ਕੀਮਤਾਂ ਵਿੱਚ ਕੁਝ ਕਮੀ ਆਈ ਹੈ, ਪਰ ਵਿਸ਼ਵ ਪੱਧਰ ’ਤੇ ਅਜੇ ਵੀ ਅਨਿਸ਼ਚਿਤਤਾ ਬਣੀ ਹੋਈ ਹੈ। ਇਸ ਕਾਰਨ ਆਉਣ ਵਾਲੇ ਛੇ ਮਹੀਨਿਆਂ ਦੌਰਾਨ ਸੈਲਾਨੀਆਂ ਦੀ ਆਮਦ ਵਿੱਚ ਕੁਝ ਸਮੇਂ ਲਈ ਸਥਿਰਤਾ ਦੇਖਣ ਨੂੰ ਮਿਲ ਸਕਦੀ ਹੈ।