ਨਿਊਜ਼ੀਲੈਂਡ ਵਿੱਚ ਰਹਿ ਰਹੇ ਭਾਰਤੀ ਮੂਲ ਦੇ 5 ਸਾਲਾ ਔਟਿਜ਼ਮ ਪੀੜਤ ਬੱਚੇ Aidhan Nithin ਦੇ ਹੱਕ ਵਿੱਚ ਹਜ਼ਾਰਾਂ ਲੋਕ ਖੜ੍ਹੇ ਹੋ ਗਏ ਹਨ। ਬੱਚੇ ਅਤੇ ਉਸਦੇ ਪਰਿਵਾਰ ਨੂੰ ਦੇਸ਼ ਵਿੱਚ ਰਹਿਣ ਦੀ ਇਜਾਜ਼ਤ ਦਿਵਾਉਣ ਲਈ 13 ਹਜ਼ਾਰ ਤੋਂ ਵੱਧ ਲੋਕਾਂ ਵੱਲੋਂ ਸਾਈਨ ਕੀਤੀ ਪਟੀਸ਼ਨ ਸੰਸਦ ਵਿੱਚ ਪੇਸ਼ ਕੀਤੀ ਗਈ ਹੈ। Immigration New Zealand ਨੇ ਪਿਛਲੇ ਸਾਲ Aidhan ਨੂੰ ਰਹਾਇਸ਼ ਦੀ ਮਨਜ਼ੂਰੀ ਦੇਣ ਤੋਂ ਇਨਕਾਰ ਕਰ ਦਿੱਤਾ ਸੀ। ਵਿਭਾਗ ਦਾ ਕਹਿਣਾ ਸੀ ਕਿ ਬੱਚੇ ਦੀਆਂ ਸਿਹਤ ਅਤੇ ਸਿੱਖਿਆ ਨਾਲ ਜੁੜੀਆਂ ਲੋੜਾਂ ਕਾਰਨ ਸਰਕਾਰੀ ਖਰਚ ਵੱਧ ਸਕਦਾ ਹੈ।
Aidhan ਦੇ ਮਾਤਾ-ਪਿਤਾ ਦੋਵੇਂ ਨਿਊਜ਼ੀਲੈਂਡ ਦੇ ਸਿਹਤ ਖੇਤਰ ਵਿੱਚ ਕੰਮ ਕਰਦੇ ਹਨ। ਉਸਦੇ ਪਿਤਾ ਨਿਥਿਨ ਮੰਕੀਲ elder care nurse ਹਨ, ਜਦਕਿ ਮਾਤਾ senior healthcare assistant ਵਜੋਂ ਸੇਵਾ ਨਿਭਾ ਰਹੀ ਹੈ। ਪਰਿਵਾਰ ਨੇ ਕਿਹਾ ਕਿ ਉਹ ਡਰ ਦੇ ਸਾਏ ਹੇਠ ਜੀ ਰਹੇ ਹਨ ਕਿ ਕਿਤੇ ਉਨ੍ਹਾਂ ਨੂੰ ਵੱਖ ਨਾ ਕਰ ਦਿੱਤਾ ਜਾਵੇ।
ਇਹ ਪਟੀਸ਼ਨ MPs Rachel Boyack ਅਤੇ Ricardo Menéndez March ਨੂੰ ਸੌਂਪੀ ਗਈ। ਦੋਵਾਂ ਨੇ ਸਰਕਾਰ ਨੂੰ ਮਾਮਲੇ ਵਿੱਚ ਦਖ਼ਲ ਦੇਣ ਦੀ ਅਪੀਲ ਕੀਤੀ ਹੈ। Rachel Boyack ਨੇ ਕਿਹਾ ਕਿ Nelson ਖੇਤਰ ਨੂੰ ਅਜਿਹੇ healthcare workers ਦੀ ਬਹੁਤ ਲੋੜ ਹੈ ਅਤੇ ਇਹ ਪਰਿਵਾਰ ਕਮਿਊਨਿਟੀ ਲਈ ਮਹੱਤਵਪੂਰਨ ਯੋਗਦਾਨ ਪਾ ਰਿਹਾ ਹੈ।
ਉਨ੍ਹਾਂ ਦੱਸਿਆ ਕਿ Aidhan ਨੂੰ ਅਸਥਾਈ ਛੂਟ ਦੇ ਕੇ ਸਕੂਲ ਜਾਣ ਦੀ ਆਗਿਆ ਦਿੱਤੀ ਗਈ ਹੈ ਅਤੇ ਉਹ ਸਕੂਲ ਵਿੱਚ ਚੰਗੀ ਤਰ੍ਹਾਂ ਘੁਲਮਿਲ ਰਿਹਾ ਹੈ। ਅਧਿਆਪਕਾਂ ਨੇ ਵੀ ਉਸਨੂੰ ਖੁਸ਼ਮਿਜ਼ਾਜ਼ ਅਤੇ ਪਿਆਰਾ ਬੱਚਾ ਦੱਸਿਆ ਹੈ।
Aidhan ਦੇ ਪਿਤਾ ਨੇ ਕਿਹਾ ਕਿ ਉਨ੍ਹਾਂ ਦਾ ਪੁੱਤਰ ਜਲਦੀ ਹੀ 6 ਸਾਲ ਦਾ ਹੋਣ ਵਾਲਾ ਹੈ ਅਤੇ ਪਰਿਵਾਰ ਸਿਰਫ਼ ਇਕੱਠੇ ਰਹਿਣਾ ਚਾਹੁੰਦਾ ਹੈ। ਉਨ੍ਹਾਂ ਨੇ ਸਰਕਾਰ ਕੋਲ ਮਨੁੱਖਤਾ ਦੇ ਆਧਾਰ ’ਤੇ ਮਦਦ ਦੀ ਅਪੀਲ ਕੀਤੀ ਹੈ।