Health and Disability Commissioner ਦੀ ਜਾਂਚ ਰਿਪੋਰਟ ਅਨੁਸਾਰ ਇੱਕ ਥੋੜ੍ਹਾ ਸਮੇਂ ਤੋਂ ਪਹਿਲਾਂ ਜੰਮੇ ਬੱਚੇ ਦੀ ਮੌਤ ਉਸ ਸਮੇਂ ਹੋ ਗਈ ਜਦੋਂ ਉਸ ਦੀ ਦੇਖਭਾਲ ਕਰ ਰਹੀ ਨਰਸ ਬ੍ਰੇਕ ‘ਤੇ ਸੀ ਅਤੇ ਉਸ ਦੌਰਾਨ ਬੱਚੇ ਦੀ ਜਾਂਚ ਹੋਣੀ ਚਾਹੀਦੀ ਸੀ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਇਹ ਮਾਮਲਾ 34 ਤੋਂ 36 ਹਫ਼ਤਿਆਂ ਵਿੱਚ ਜੰਮੇ ਲੇਟ ਪ੍ਰੀ-ਟਰਮ ਬੱਚਿਆਂ ਦੀ ਸੰਭਾਲ ਨਾਲ ਜੁੜੀਆਂ ਚੁਣੌਤੀਆਂ ਨੂੰ ਦਰਸਾਉਂਦਾ ਹੈ। ਇਹ ਬੱਚੇ ਅਕਸਰ ਤੰਦਰੁਸਤ ਦਿਖਾਈ ਦੇਂਦੇ ਹਨ ਪਰ ਉਨ੍ਹਾਂ ਨੂੰ ਵਧੇਰੇ ਸਿਹਤ ਖ਼ਤਰੇ ਹੋ ਸਕਦੇ ਹਨ। ਇਹ ਮਾਮਲਾ Auckland City Hospital ਦਾ ਹੈ। ਉਹ ਬੱਚਾ 35 ਹਫ਼ਤੇ ਅਤੇ ਤਿੰਨ ਦਿਨ ਦੀ ਗਰਭ ਅਵਧੀ ‘ਤੇ “ਸੈਮੀ-ਅਰਜੰਟ” ਸੀਜ਼ੇਰੀਅਨ ਰਾਹੀਂ ਪੈਦਾ ਹੋਇਆ ਸੀ ਅਤੇ ਜਨਮ ਤੋਂ ਦੋ ਦਿਨ ਬਾਅਦ ਉਸ ਦੀ ਮੌਤ ਹੋ ਗਈ ਸੀ।
ਬੱਚੇ ਦੀ ਮਾਤਾ ਨੇ ਕਮਿਸ਼ਨਰ ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੈ। ਉਨ੍ਹਾਂ ਕਿਹਾ ਕਿ ਬੱਚੇ ਦੀ ਦੇਖਭਾਲ ਜਲਦੀ-ਜਲਦੀ ਅਤੇ ਬਿਨਾਂ ਸੰਵੇਦਨਸ਼ੀਲਤਾ ਦੇ ਕੀਤੀ ਗਈ ਅਤੇ ਉਸ ਦੀਆਂ ਚਿੰਤਾਵਾਂ ਨੂੰ ਗੰਭੀਰਤਾ ਨਾਲ ਨਹੀਂ ਲਿਆ ਗਿਆ। ਉਸ ਨੇ ਇਹ ਵੀ ਕਿਹਾ ਕਿ ਉਸ ਦੀ ਇਜਾਜ਼ਤ ਬਿਨਾਂ ਬੱਚੇ ਨੂੰ ਫੀਡਿੰਗ ਟਿਊਬ ਲਗਾਈ ਗਈ ਸੀ। ਮਾਤਾ ਅਤੇ ਬੱਚੇ ਨੂੰ 17 ਘੰਟਿਆਂ ਤੱਕ ਮੈਟਰਨਲ ਕਾਮਪਲੈਕਸ ਕੇਅਰ ਖੇਤਰ ਵਿੱਚ ਰੱਖਣ ਤੋਂ ਬਾਅਦ ਬੱਚੇ ਨੂੰ ਐਨਆਈਸੀਯੂ ਦੀ ਬਜਾਏ ਮਾਂ ਦੇ ਨਾਲ ਪੋਸਟ-ਨੈਟਲ ਵਾਰਡ ਵਿੱਚ ਭੇਜਿਆ ਗਿਆ।
ਸ਼ਿਕਾਇਤ ‘ਚ ਕਿਹਾ ਗਿਆ ਹੈ ਕਿ ਜਿਸ ਰਾਤ ਬੱਚੇ ਦੀ ਮੌਤ ਹੋਈ, ਉਸ ਦੀ ਦੇਖਭਾਲ ਕਰ ਰਹੀ ਨਰਸ ਇੱਕ ਘੰਟੇ ਦੀ ਖਾਣੇ ਦੀ ਛੁੱਟੀ ‘ਤੇ ਗਈ ਹੋਈ ਸੀ। ਵਾਪਸੀ ‘ਤੇ ਉਸ ਨੇ ਦੇਖਿਆ ਕਿ ਬੱਚੇ ਨੇ ਬਹੁਤ ਉਲਟੀ ਕੀਤੀ ਹੋਈ ਸੀ ਅਤੇ ਉਹ ਸਾਹ ਨਹੀਂ ਲੈ ਰਿਹਾ ਸੀ ਇਸ ਦੌਰਾਨ ਉਸ ਨੂੰ ਬਚਾਇਆ ਨਹੀਂ ਜਾ ਸਕਿਆ। ਹੈਲਥ ਐਨਜ਼ੈੱਡ ਦਾ ਕਹਿਣਾ ਹੈ ਕਿ ਆਮ ਤੌਰ ‘ਤੇ ਹਰ ਘੰਟੇ ਬੱਚੇ ਦੀ ਜਾਂਚ ਕਰਨਾ ਲਾਜ਼ਮੀ ਨਹੀਂ ਸੀ ਅਤੇ ਜੇ ਬੱਚੇ ਨੂੰ ਬਹੁਤ ਨੇੜਲੀ ਨਿਗਰਾਨੀ ਦੀ ਲੋੜ ਹੁੰਦੀ ਤਾਂ ਉਸ ਨੂੰ ਐਨਆਈਸੀਯੂ ਵਿੱਚ ਰੱਖਿਆ ਜਾਂਦਾ।
ਡਿਪਟੀ ਕਮਿਸ਼ਨਰ ਰੋਜ਼ ਵਾਲ ਨੇ ਬੱਚੇ ਦੇ ਪਰਿਵਾਰ ਨਾਲ ਦੁੱਖ ਪ੍ਰਗਟਾਇਆ ਅਤੇ ਕਿਹਾ ਕਿ ਇਹ ਗੰਭੀਰ ਸ਼ਿਕਾਇਤ ਧਿਆਨ ਨਾਲ ਜਾਂਚੀ ਗਈ ਹੈ। ਇੱਕ ਮਾਹਿਰ ਨਰਸ ਨੇ ਕਿਹਾ ਕਿ ਬੱਚੇ ਦੀ ਘੱਟੋ-ਘੱਟ ਇੱਕ ਵਾਰ ਨਰਸ ਦੀ ਬ੍ਰੇਕ ਦੌਰਾਨ ਜਾਂਚ ਹੋਣੀ ਚਾਹੀਦੀ ਸੀ ਕਿਉਂਕਿ ਉਹ ਇਨਕਿਊਬੇਟਰ ਵਿੱਚ ਲਾਈਟਾਂ ਹੇਠ ਸੀ, ਉਸ ਨੂੰ ਓਰੋਗੈਸਟ੍ਰਿਕ ਟਿਊਬ ਲੱਗੀ ਹੋਈ ਸੀ, ਉਹ premature ਜਨਮਿਆ ਸੀ ਅਤੇ ਉਸ ਦੀ ਮਾਂ ਗਹਿਰੀ ਨੀਂਦ ਵਿੱਚ ਸੀ। ਰਿਪੋਰਟ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਸਟਾਫ਼ ਅਤੇ ਮਾਂ ਵਿਚਕਾਰ ਫੀਡਿੰਗ ਟਿਊਬ ਬਾਰੇ ਸੰਚਾਰ ਵਿੱਚ ਕਮੀ ਰਹੀ ਅਤੇ ਮਾਂ ਨੂੰ ਇਸ ਦੀ ਲੋੜ ਬਾਰੇ ਵਧੇਰੇ ਜਾਣਕਾਰੀ ਦਿੱਤੀ ਜਾਣੀ ਚਾਹੀਦੀ ਸੀ।