ਪਿਛਲੇ ਦਿਨੀ ਨਿਊਜ਼ੀਲੈਂਡ ਸਰਕਾਰ ਨੇ ਲੋਕਾਂ ਨੂੰ ਆਪਣੇ ਅਦਾਲਤੀ ਜੁਰਮਾਨੇ ਭਰਨ ਲਈ ਮਜਬੂਰ ਕਰਨ ਦਾ ਇੱਕ ਨਵਾਂ ਤਰੀਕਾ ਲੱਭਿਆ ਸੀ – ਦਰਅਸਲ ਪ੍ਰਸ਼ਾਸਨ ਹੁਣ ਕਾਰਾਂ ਕਲੈਂਪ ਜਾਂ ਟੋ ਕਰੇਗਾ। ਹੁਣ ਅਹਿਮ ਗੱਲ ਹੈ ਕਿ ਇਸਦਾ ਅਸਰ ਦਿਖਣਾ ਵੀ ਸ਼ੁਰੂ ਹੋ ਗਿਆ ਹੈ। ਸਥਾਨਕ ਰਿਪੋਰਟ ਮੁਤਾਬਿਕ ਪੰਜ ਬੇਲਿਫ਼ਾਂ ਦੇ ਵੱਲੋਂ ਇੱਕ ਵਾਹਨ ਜ਼ਬਤ ਕੀਤਾ ਗਿਆ ਹੈ ਅਤੇ $32,000 ਤੋਂ ਵੱਧ ਬਕਾਇਆ ਅਦਾਲਤੀ ਜੁਰਮਾਨੇ ਅਤੇ ਮੁਆਵਜ਼ਾ ਇਕੱਠਾ ਕੀਤਾ ਗਿਆ ਕਿਉਂਕਿ ਬੇਲਿਫ਼ਾਂ ਨੇ ਹਫਤੇ ਦੇ ਅੰਤ ਵਿੱਚ ਆਕਲੈਂਡ ਵਿੱਚ ਨਵੀਂ ਨੰਬਰ ਪਲੇਟ ਸਕੈਨਿੰਗ ਤਕਨਾਲੋਜੀ ਦੀ ਪਰਖ ਕਰਦਿਆਂ ਵਰਤੋਂ ਸ਼ੁਰੂ ਕੀਤੀ ਸੀ।
ਨਿਆਂ ਮੰਤਰੀ ਪਾਲ ਗੋਲਡਸਮਿਥ ਨੇ ਸ਼ੁੱਕਰਵਾਰ ਨੂੰ ਇਸ ਸਬੰਧੀ ਐਲਾਨ ਕਰਦੇ ਹੋਏ ਕਿਹਾ ਸੀ ਕਿ: “ਜੇ ਤੁਸੀਂ ਆਪਣੇ ਅਦਾਲਤੀ ਜੁਰਮਾਨੇ ਦਾ ਭੁਗਤਾਨ ਨਹੀਂ ਕੀਤਾ ਹੈ, ਤਾਂ ਤੁਸੀਂ ਜਲਦੀ ਹੀ ਆਪਣੇ ਘਰ ਨੂੰ ਪੈਦਲ ਜਾਂ ਲਿਫਟ ਲੈ ਕੇ ਜਾਣ ਲਈ ਮਜ਼ਬੂਰ ਹੋ ਸਕਦੇ ਹੋ।” ਯਾਨੀ ਕਿ ਤੁਹਾਡਾ ਵਾਹਨ ਜ਼ਬਤ ਕੀਤਾ ਜਾ ਸਕਦਾ ਹੈ। ਹੁਣ ਅਜਿਹਾ ਹੋਣਾ ਸ਼ੁਰੂ ਵੀ ਹੋ ਗਿਆ ਹੈ ਅਤੇ ਇੱਕ ਵਾਹਨ ਨੂੰ ਜ਼ਬਤ ਕੀਤਾ ਗਿਆ ਹੈ। ਪੰਜ ਬੇਲਿਫ਼ਾਂ ਨੇ ਸ਼ੁੱਕਰਵਾਰ ਅਤੇ ਸ਼ਨੀਵਾਰ ਨੂੰ ਦੋ ਪੁਲਿਸ ਚੌਕੀਆਂ ‘ਤੇ 4800 ਤੋਂ ਵੱਧ ਨੰਬਰ ਪਲੇਟਾਂ ਸਕੈਨ ਕੀਤੀਆਂ, ਜਿਸ ਵਿੱਚ ਬਕਾਇਆ ਜੁਰਮਾਨਿਆਂ ਲਈ 208 ਸਕਾਰਾਤਮਕ ਮੈਚ ਪਾਏ ਗਏ।
ਨਿਆਂ ਮੰਤਰਾਲੇ ਦੇ ਰਾਸ਼ਟਰੀ ਸੇਵਾ ਡਿਲੀਵਰੀ ਸਮੂਹ ਦੇ ਮੈਨੇਜਰ ਟਰੇਸੀ ਬੈਗੁਲੇ ਨੇ ਕਿਹਾ ਕਿ ਜ਼ਿਆਦਾਤਰ ਪਹਿਲਾਂ ਹੀ ਸਰਗਰਮ ਭੁਗਤਾਨ ਪ੍ਰਬੰਧਾਂ ਨਾਲ ਆਪਣੇ ਕਰਜ਼ਿਆਂ ਦਾ ਨਿਪਟਾਰਾ ਕਰਨ ਲਈ ਢੁਕਵੇਂ ਕਦਮ ਚੁੱਕ ਚੁੱਕੇ ਹਨ। “ਸੜਕ ‘ਤੇ ਰੋਕ 32 ਲੋਕਾਂ ਵਿਰੁੱਧ ਕਾਰਵਾਈ ਕੀਤੀ ਗਈ ਹੈ ਜਿਸ ਦੇ ਨਤੀਜੇ ਵਜੋਂ 31 ਲੋਕਾਂ ਤੋਂ ਕੁੱਲ $32,000 ਇਕੱਠੇ ਕੀਤੇ ਗਏ। ਜਦਕਿ ਇੱਕ ਵਿਅਕਤੀ ਦੀ ਗੱਡੀ ਜ਼ਬਤ ਕੀਤੀ ਗਈ।” ਨਵੀਂ ਤਕਨਾਲੋਜੀ ਦਾ ਸਾਲ ਦੇ ਅੰਤ ਤੱਕ ਦੇਸ਼ ਭਰ ਵਿੱਚ ਟ੍ਰਾਇਲ ਕੀਤਾ ਜਾਵੇਗਾ।