ਨਿਊਜ਼ੀਲੈਂਡ ਦੇ ਦੱਖਣੀ ਟਾਪੂ ਵਿੱਚ ਪੈ ਰਹੀ ਕੜਾਕੇ ਦੀ ਠੰਢ ਨੇ ਲੋਕਾਂ ਦੀ ਰੋਜ਼ਮਰ੍ਹਾ ਦੀ ਜ਼ਿੰਦਗੀ ਨੂੰ ਪ੍ਰਭਾਵਿਤ ਕਰ ਦਿੱਤਾ ਹੈ। ਵਾਨਾਕਾ ਸ਼ਹਿਰ ਦੀ ਇੱਕ ਮਹਿਲਾ ਸਵੇਰੇ ਜਦੋਂ ਬਾਥਰੂਮ ਵਿੱਚ ਪਹੁੰਚੀ ਤਾਂ ਹੈਰਾਨ ਰਹਿ ਗਈ, ਕਿਉਂਕਿ ਚੱਲ ਰਹੀ ਟੂਟੀ ਦਾ ਪਾਣੀ ਹੀ ਬਰਫ਼ ਵਿੱਚ ਤਬਦੀਲ ਹੋ ਗਿਆ ਸੀ। ਮੈਕੈਂਜ਼ੀ ਖੇਤਰ ਵਿੱਚ ਤਾਪਮਾਨ ਘਟ ਕੇ -8 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਗਿਆ, ਜਦਕਿ ਟਵਾਈਜ਼ਲ ਵਿੱਚ ਵੀ ਪਾਰਾ -7 ਡਿਗਰੀ ਸੈਲਸੀਅਸ ਤੋਂ ਹੇਠਾਂ ਦਰਜ ਕੀਤਾ ਗਿਆ। ਸਾਫ਼ ਆਸਮਾਨ ਅਤੇ ਸ਼ਾਂਤ ਹਵਾਵਾਂ ਕਾਰਨ ਰਾਤ ਦੇ ਸਮੇਂ ਠੰਢ ਵਿੱਚ ਹੋਰ ਵਾਧਾ ਹੋਇਆ।
ਮੌਸਮ ਵਿਭਾਗ ਨੇ ਦੱਸਿਆ ਕਿ ਸਰਦੀਆਂ ਦੇ ਮੌਸਮ ਦੌਰਾਨ ਅਜਿਹੇ ਤਾਪਮਾਨ ਆਮ ਗੱਲ ਹਨ, ਪਰ ਸੜਕਾਂ ਉੱਤੇ ਜੰਮੀ ਬਰਫ਼ ਕਾਰਨ ਵਾਹਨ ਚਾਲਕਾਂ ਨੂੰ ਵਧੀਕ ਸਾਵਧਾਨੀ ਵਰਤਣ ਦੀ ਸਲਾਹ ਦਿੱਤੀ ਗਈ ਹੈ। ਵਿਭਾਗ ਨੇ ਇਹ ਵੀ ਸੰਕੇਤ ਦਿੱਤਾ ਹੈ ਕਿ ਅਗਲੇ ਹਫ਼ਤੇ ਦੇ ਅੰਤ ਤੱਕ ਇੱਕ ਹੋਰ ਬਰਫ਼ਬਾਰੀ ਦਾ ਦੌਰ ਦੇਖਣ ਨੂੰ ਮਿਲ ਸਕਦਾ ਹੈ।